~~~~~~~~⊰❂ Unicode Version ❂⊱~~~~~~~~

တာချီလိတ်မြို့နယ်အတွင်းရှိ သတ္တုတူးဖေါ်ရေးကုမ္ပဏီဝန်းတစ်ခုအတွင်းမှ မူးယစ်ဆေးထုတ်သည့်စက်များနှင့် လက်နက်ခဲယမ်းများ ဖမ်းမိ
**************
မြန်မာ - ထိုင်းနယ်စပ် ရှမ်းပြည်နယ်အရှေ့ပိုင်း တာချီလိတ်မြို့တွင် မူးယစ်ဆေး၊ လက်နက်ခဲယမ်းများဖမ်းမိသည့်နေအိမ်ပိုင်ရှင်၏ သတ္တုတူးဖေါ်ရေးကုမ္ပဏီလုပ်ငန်းဝန်းအတွင်းမှ လက်နက်ခဲယမ်းများနှင့် မူးယစ်ဆေးထုတ်လုပ်သည့်စက်ပစ္စည်းများကို ထပ်မံဖမ်းဆီးရမိထားကြောင်း သိရသည်။

မူးယစ်ဆေးများနှင့် လက်နက်ခဲယမ်းမျိုးစုံဖမ်းဆီးရမိထားသည့် ဆေခမ်းရပ်ကွက်ရှိ နေအိမ်ပိုင်ရှင် ပီနိုင်(ခ)ညီညီနိုင်၏ နိုင်ရတနာရွှေတြိဂံကုမ္ပဏီလီမိတက် တည်ရှိရာ တာချီလိတ်မြို့နယ်၊ မိုင်းလင်း(အရှေ့)ကျေးရွာအုပ်စု၊မိုင်းလင်းဘုန်းကြီးကျောင်းသွားလမ်းဘေးရှိ ခြံဝန်းအတွင်း ၂၀၁၉ ခုနှစ်၊ ဇွန်လ (၂၃)ရက်နေ့က မူးယစ်တပ်ဖွဲ့စု(၃၀)နှင့်သက်ဆိုင်ရာရဲတပ်ဖွဲ့ဝင်များပါဝင်သည့် ပူးပေါင်းအဖွဲ့ဖြင့် ဝင်ရောက်စစ်ဆေးရာ လူတစ်ဦးတစ်ယောက်မှ မတွေ့ရဘဲ အဆိုပါဝန်းအတွင်းရှိ (၁၀)ခန်းတွဲတိုက်တန်းလျားအတွင်းမှ စိတ်ကြွဆေးပြားထုတ်လုပ်သည့်စက် (၁)လုံး၊ စတီးကန်တော့(၁)ခု၊ သတ္တုဗန်း (၃)ခု၊ တစ်ထပ်တိုက်တစ်လုံးအတွင်းမှ ဂျာမနီနိုင်ငံလုပ် ပွိုင့် ၂၂ သေနတ်တစ်လက်၊ RPJ တစ်လက်၊ M 22 ကျည် (၁၀၀)တောင့်၊ ပွိုင့် ၂၂ ကျည် (၃၀)တောင့်၊ M 22 ကျည်ဘောက်တစ်ခု၊ M 16 ကျည်ဘောက်တစ်ခုတို့ကို သိမ်းဆည်းရမိကြောင်း သိရသည်။

ကုမ္ပဏီဝန်းအတွင်းရှိ ဘက်ဟိုးယာဉ်(၁)စီး၊ CIUGONG လုတ်တာယာဉ် (၁)စီး၊ (၁၂)ဘီးယာဉ် (၁)စီး၊ (၆)ဘီးယာဉ် (၁)စီးနှင့် YAMAHA 250 R အမျိုးအစား ခဲ/ပြာရောင် ဆိုင်ကယ်(၁)စီးတို့ကို သိမ်းဆည်းရမိထားကြောင်း သိရသည်။

လက်နက်ခဲယမ်းများ၊ မူးယစ်ဆေးဝါးများဖမ်းဆီးရမိထားသည့် နေအိမ်နှင့် ကုမ္ပဏီပိုင်ရှင်ဖြစ်သူ ပီနိုင်(ခ) ညီညီနိုင်မှာ လွတ်မြောက်နေဆဲဖြစ်ပြီး ဖမ်းဆီးရမိမှုများမှ ဆက်လက်စစ်ဆေးဖေါ်ထုတ်နေဆဲဖြစ်ကြောင်း သိရသည်။

Tachileik News Agency