~~~~~~~~⊰❂ Unicode Version ❂⊱~~~~~~~~

ပဋိပက္ခများအား စီမံခန့်ခွဲခြင်းနှင့် ငြိမ်းချမ်းရေးလုပ်ငန်းစဉ် အထောက်အကူပေးရေးဆိုင်ရာ အလုပ်ရုံဆွေးနွေးပွဲ ကျင်းပ
************
ငြိမ်းချမ်းရေးလုပ်ငန်းစဉ်များ၌ ပဋိပက္ခများအား စီမံခန့်ခွဲခြင်းနှင့် ငြိမ်းချမ်းရေးလုပ်ငန်းစဉ်အား အထောက်အကူပေးရေးဆိုင်ရာ လုပ်ငန်းများဆိုင်ရာ အလုပ်ရုံဆွေးနွေးပွဲကို ဖင်လန်နိုင်ငံအခြေစိုက် Crisis Management Initiative (CMI) နှင့် ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ (JMC) ရုံးအဖွဲ့တို့က ရန်ကုန်မြို့၌  ၂၀၁၉ ခုနှစ်၊ ဇွန်လ (၁၇) ရက်နှင့် (၁၈) ရက်နှစ်ရက်တာ ကျင်းပသည်။

အလုပ်ရုံဆွေးနွေးပွဲသို့ CMI မှ တာဝန်ရှိသူများ၊ မြန်မာနိုင်ငံဆိုင်ရာ ဖင်လန်နိုင်ငံသံရုံးမှ ကောင်စစ်ဝန် မစ္စ ကာတီရား ဟာဗိုနမ် နှင့် JMC အဆင့်ဆင့်မှ ရုံးဝန်ထမ်းများ ပါဝင်တက်ရောက်ကြကြောင်း သိရသည်။

ဆွေးနွေးပွဲ၌ CMI မှ ပညာရှင်များဖြစ်သော နော်ဝေနိုင်ငံမှ အငြိမ်းစားဗိုလ်မှူးချုပ် Jan Erik Wilhelmsen နှင့် ဖင်လန်နိုင်ငံမှ အငြိမ်းစားဗိုလ်ချုပ် Jaakko Oksanen တို့က အင်ဒိုနီးရှား၊ ဖိလစ်ပိုင်နှင့် နီပေါနိုင်ငံတို့ အပါအဝင် နိုင်ငံတကာ ငြိမ်းချမ်းရေး လုပ်ငန်းစဉ်များမှ အတွေ့အကြုံနှင့် သင်ခန်းစာများ၊ ပဋိပက္ခ စီမံခန့်ခွဲရေးဆိုင်ရာ နည်းနာများအား ရှင်းလင်း ဆွေးနွေးခြင်းဖြစ်ကြောင်း သိရသည်။

Crisis Management Initiative (CMI) သည် ဖင်လန်နိုင်ငံ အခြေစိုက် ပညာရှင်အဖွဲ့အစည်းဖြစ်ပြီး ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေး ကော်မတီ (JMC) အား နည်းပညာပိုင်းဆိုင်ရာ အထောက်အကူ ပေးအပ်နေသော အဖွဲ့ဖြစ်သည်။

Tachileik News Agency
ဓါတ်ပုံ -JMC