~~~~~~~~⊰❂ Unicode Version ❂⊱~~~~~~~~

အမြန်လမ်းမကြီးကို ဖြတ်ကူးစဉ် ယာဉ်တိုက်ခံရပြီး သေဆုံးသွားသည့် ဒုရဲအုပ်အား အမြန်လမ်းမကြီးဥပဒေဖြင့် အမှုဖွင့်
***************
နေပြည်တော် - ရန်ကုန်အမြန်လမ်း မိုင်တိုင် (၁၅၈)အနီးရှိ စမိုးရဲကင်းမှ ဒုရဲအုပ်တစ်ဦး ၂၀၁၉ ခုနှစ်၊ ဇွန်လ (၉)ရက်နေ့ ည(၁၀)နာရီခွဲဝန်းကျင်က လမ်းဖြတ်ကူးစဉ် ယာဉ်တိုက်မိ၍ နေရာတွင်သေဆုံးသွားသဖြင့် အမြန်လမ်းမကြီးဥပဒေဖြင့် အမှုဖွင့်ထားကြောင်း သိရသည်။

ရန်ကုန်-နေပြည်တော် အမြန်လမ်း မိုင်တိုင် (၁၅၈) အနီးရှိ စမိုးရဲကင်းမှ ဒုရဲအုပ်ထွန်းဝင်းသည် လမ်းတစ်ဖက်ရှိ ထမင်းဆိုင်မှ ထမင်းစားပြီး အပြန်လမ်း ဖြတ်ကူးလာစဉ် နေပြည်တော်ဘက်မှ ရန်ကုန်ဘက်သို့ ယာဉ်မောင်း ချစ်ကိုကိုလွင် မောင်းနှင်လာသည့် မော်တော်ယာဉ်က ဝင်တိုက်မိခြင်းဖြစ်ကြောင်း အမြန်လမ်းမကြီးရဲတပ်ဖွဲ့မှူးရုံးက သတင်းထုတ်ပြန်သည်။

 အဆိုပါယာဉ်တိုက်မှုအား အမြန်လမ်းမကြီးရဲတပ်ဖွဲ ့ ဇီးပင်သာစခန်းမှတပ်ဖွဲ ့ဝင်များနှင့် အထောက်အကူပြု အဖွဲ ့များက ကူညီဆောင်ရွက်ပေးထားပြီး တာဝန်အပ အမြန်လမ်းမပေါ် ဖြတ်သန်းသွားလာသည့် ဒုရဲအုပ်အား အမြန်လမ်းမကြီးဥပဒေဖြင့် အမှုဖွင့်လိုက်ခြင်းဖြစ်ကြောင်း သိရသည်။
အမြန်လမ်းမကြီးဥပဒေအရ အမြန်လမ်းမကြီးပေါ်တွင် မောင်းနှင်ခွင့်မပြုသည့် မော်တော်ယာဉ်၊ လှည်းနှင့် ဖြတ်သန်းသွားလာခွင့်မပြုသည့် လူ၊ တိရစ္ဆာန်များ ဖြတ်သန်းသွားလာခြင်း သို့မဟုတ် ရပ်နားခြင်းကြောင့် လူနှင့်ပစ္စည်း ထိခိုက်မှု သို့မဟုတ် သေဆုံးမှုဖြစ်ပေါ်ပါက စည်းကမ်းလိုက်နာပြီး မောင်းနှင်သည့်မော်တော်ယာဉ်၏ ယာဉ်မောင်းတွင် တာဝန်မရှိစေရဟု ပြဌာန်းထားခြင်းဖြစ်သည်။

Tachileik News Agency
ဓါတ်ပုံ - အမြန်လမ်းမကြီးရဲတပ်ဖွဲ့မှူးရုံး