~~~~~~~~⊰❂ Unicode Version ❂⊱~~~~~~~~

မကွေးတိုင်းအတွင်း  H1N1 ဖြစ်ပွားသူမရှိသေးသော်လည်း စောင့်ကြပ်ကြည့်ရှုသတင်းပို့သည့်စနစ်ဖြင့် ကြိုတင်ကာကွယ်မှုများ ဆောင်ရွက်နေ
*************
မကွေးတိုင်းတွင် ပြင်းထန်ရာသီတုပ်ကွေး H1N1 ဖြစ်ပွားသူမရှိသေးသော်လည်း မြို့နယ်အဆင့်၊ ခရိုင်အဆင့်နှင့် သက်ဆိုင်ရာ ဆေးရုံများသို့ စမ်းသပ်ပစ္စည်းများနှင့် လိုအပ်သည့်ဆေးဝါးများ ဖြန့်ဖြူးပေးထားပြီး စောင့်ကြပ်ကြည့်ရှု သတင်းပို့သည့်စနစ် အားကောင်းစေရန် ဆောင်ရွက်လျှက်ရှိနေကြောင်း မကွေးတိုင်း ပြည်သူ့ကျန်းမာရေးဦးစီးဌာနမှ သိရသည်။

 “ရာသီတုပ်ကွေးဟာ သာမန်အားဖြင့်တော့ ရောဂါမပြင်းထန်ပါဘူး။ တစ်ချို့ နာတာရှည်ရောဂါအခံရှိတဲ့လူတွေ၊ အသက်ကြီးတဲ့လူတွေ၊ ကလေးတွေနဲ့ ကိုယ်ဝန်ဆောင်မိခင်တွေမှာတော့ ပြင်းထန်တုပ်ကွေး ဖြစ်နိုင်ခြေများတယ်ပေါ့။ ရာသီတုပ်ကွေး၊ ပြင်းထန်တုပ်ကွေးနဲ့ ပတ်သက်ပြီး သက်ဆိုင်ရာမြို့နယ်အဆင့် ခရိုင်အဆင့်နဲ့ သက်ဆိုင်ရာဆေးရုံတွေမှာ စောင့်ကြပ်ကြည့်ရှုတဲ့စနစ်အားကောင်းအောင် ရုံးချုပ်ရဲ့ညွှန် ကြားချက်နဲ့ တိုင်းကျန်းမာကနေပြီးတော့ ဆောင်ရွက်ထားပါတယ်။ သက်ဆိုင်ရာမြို့နယ်အဆင့်တွေထိ ရာသီတုပ်ကွေးနဲ့ပတ်သက်ပြီး ချက်ချင်း စစ်ဆေးလို့ရတဲ့ RTT ပစ္စည်းတွေနဲ့ လိုအပ်တဲ့ ဆေးဝါးတွေကိုလည်း ဖြန့်ထားပါတယ်”ဟု မကွေးတိုင်းပြည်သူ့ကျန်းမာရေးဦးစီးဌာန၊ တိုးချဲ့ကာကွယ်ဆေးထိုးလုပ်ငန်း၊ လက်ထောက်ညွှန်ကြားရေးမှူး ဒေါက်တာခင်မောင်သန်းက ဇွန်လ(၂၂)ရက်နေ့တွင် တာချီလိတ်သတင်းအေဂျင်စီသို့ ပြောသည်။

သာမန်အားဖြင့် ပြင်းထန်အဆင့်မရောက်သေးသည့် ရာသီတုပ်ကွေးဖြစ်ပါက နှာရည်ယိုခြင်း၊ ချောင်းဆိုးခြင်း၊ ဖျားခြင်း၊ အရိုးအဆစ်များကိုက်ခဲခြင်း၊ လည်ချောင်းနာ၍ တံတွေးမြိုရခက်ခြင်း လက္ခဏာများတွေ့ရှိရပြီး   ပြင်းထန်တုပ်ကွေးအဆင့်တွင် အသက်ရှူကြပ်ခြင်း၊ အဖျားကြီးခြင်းနှင့် သတိလစ်ခြင်းတို့ဖြစ်ပွားပြီး အသက်အန္တရာယ်ရှိနိုင်ကြောင်း သိရသည်။

“ရောဂါပိုးရှိတဲ့သူက နှာချေလိုက်မယ်။ ချောင်းဆိုးလိုက်မယ်ဆိုရင် လေထုထဲကနေ တိုက်ရိုက်ကူးစက်သွား နိုင်သလို ရောဂါရှိနေသူရဲ့ သလိပ်တွေ၊ ချွဲတွေနဲ့ ခန္ဒာကိုယ်က အရည်တွေကို ထိတွေ့ကိုင်တွယ်ရာက လည်း ကူးစက်နိုင်ပါတယ်။ ရောဂါရှိသူသုံးစွဲတဲ့ ပစ္စည်းတွေကို ထိတွေ့ကိုင်တွယ်ရာကနေလည်း ကူးစက် နိုင်ပါတယ်။ ရောဂါရှိသူအနေနဲ့ အခြားသူတွေကို ကူးစက်ခြင်းမရှိအောင် နှာချေ ချောင်းဆိုးတဲ့အခါမှာ လက်ကိုင်ပဝါတို့ Mask တို့ရဲ့ အကာအကွယ်ယူတာမျိုး လူထူထပ်တဲ့နေရာတွေကို ရှောင်တာမျိုး၊ ရော ဂါမရှိသူတွေကလည်း ကူးစက်မခံရအောင် လူထူထပ်တဲ့နေရာတွေကို မသွားသင့်ပါဘူး။ အဓိက လုပ် ဆောင်ရမှာတွေကတော့ လက်ဆေးမယ်၊ တစ်ကိုယ်ရေသန့်ရှင်းမှုကို ဂရုစိုက်မယ်၊ အိပ်ရေးဝအောင် အိပ်မယ်၊ အစားအသောက်ကို အာဟာရဖြစ်အောင်စားသောက်မယ် ဆိုရင် အကောင်းဆုံးကာကွယ်မှုပါပဲ” ဟု ဒေါက်တာ ခင်မောင်သန်းက ပြောသည်။

H1N1 ရာသီတုပ်ကွေးအတွက် ကာကွယ်ဆေးရှိသော်လည်း ကျန်းမာရေးဌာန တိုးချဲ့ကာကွယ်ဆေးထိုး လုပ်ငန်း အနေဖြင့်မူ ကာကွယ်ဆေးအခမဲ့ထိုးပေးသည့် အစီအစဉ်မရှိသေးကြောင်းနှင့် ကာကွယ်ဆေး လုံလောက်မှုရှိနိုင် မရှိနိုင်ဆိုသည်ကိုလည်း ပြင်ပဆေးအရောင်းဆိုင်များ၌ တင်၍ ရောင်းချနေခြင်းဖြစ်သော ကြောင့် ဌာနအနေဖြင့် မသိနိုင်ဟု ဆိုသည်။

၂၀၁၇ ခုနှစ်တွင် မကွေးတိုင်းအတွင်း  ရာသီတုပ်ကွေးဖြစ်ပွားသူ (၂၀)ဦး၊     အသက်ရှူလမ်းကြောင်း၌ ပြင်းထန်သည့်ကူးစက်မှုလက္ခဏာရှိသူ  (၂၇)ဦး၊ နေပြည်တော်သို့ပို့စစ်၍ H1N1 Positive  (၁၄)ဦး ၊ သေ ဆုံးသူ(၂)ဦး ရှိခဲ့ကြောင်း သိရပြီး ၂၀၁၈ ခုနှစ်တွင် ရောဂါဖြစ်ပွားမှုမရှိခဲ့ဘဲ ၂၀၁၉ ခုနှစ်တွင်လည်း ယနေ့ ဇွန်လ(၂၂)ရက်နေ့အထိ မကွေးတိုင်းအတွင်း H1N1 ပိုးတွေ့ရှိသူ မရှိသေးကြောင်း မကွေးတိုင်း ပြည်သူ့ ကျန်းမာရေးဦးစီး ဌာနမှ သိရသည်။

သတင်း၊ဓါတ်ပုံ #ဖီးနစ်