Ref: CNN

~~~~~~~~⊰❂ Unicode Version ❂⊱~~~~~~~~

ကော်လိုရာဒိုတွင် Google map ၏ လမ်းညွှန်မှုမှားသွားပြီး ရာဂဏန်းခန့်ရှိသည့်ကားများ ကွင်းပြင် ရွှံ့ထူလမ်းတွင် ပိတ်မိ
*****************
အမေရိကန်ပြည်ထောင်စု၊ ကော်လိုရာဒိုတွင် google map ကပြသည့်ဖြတ်လမ်းအတိုင်း မောင်းနှင်ရာမှ ကားစီးရေ (၁၀၀)ခန့်မှာ ကွင်းပြင်တစ်ခုရှိ ရွှံ့ထူထပ်သောလမ်းတွင် ပိတ်မိသွားကြကြောင်း သိရသည်။

 ယာဉ်ကြောပိတ်ဆို့နေသည့် ပဲန်နာဘိုးလ်ဗတ်လမ်းမှ ဒင်ဗာအပြည်ပြည်ဆိုင်ရာလေဆိပ်ဘက်သို့ သွားသည့်ဖြတ်လမ်းသို့ ၂၀၁၉ ခုနှစ်၊ ဇွန်လ (၂၃)ရက်နေ့က မောင်းနှင်ကြရာမှ ရွှံ့ထူသည့်လမ်းဘက်ရောက်သွားကြခြင်းဖြစ်ကာ အချို့ကားများမှာ ရွှံ့ထဲနစ်နေကြကာ လမ်းပိတ်ဆို့သွားကြောင်း သိရသည်။

လေဆိပ်သို့ သွားသည့်ကားများမှ ခရီးသည်များမှာ လေယာဉ်အချိန်မီရေးအတွက် ဆက်လက်မောင်းနှင်နိုင်သည့် ကားများဖြင့် ခရီးလမ်းကြုံစုပေါင်းစီးနင်းခဲ့ကြရကြောင်း သိရသည်။

မော်တော်ယာဉ်မောင်းများအတွက် အကောင်းဆုံးလမ်းညွှန်နိုင်ရန် လုပ်ဆောင်ထားခြင်းဖြစ်သော်လည်း ရာသီဥတုကဲ့သို့ ခန့်မှန်းမရနိုင်သည့်အကြောင်းအရာများကြောင့် ဖြစ်ပွားရခြင်းဖြစ်နိုင်သည်ဟု google က သတင်းထုတ်ပြန်ချက်တွင် ဖေါ်ပြထားသည်။

Tachileik News Agency
Ref: CNN