~~~~~~~~⊰❂ Unicode Version ❂⊱~~~~~~~~

ဘန်ကောက်တွင် မျက်နှာနှင့် ခန္ဓာကိုယ်သွင်ပြင် ပြုပြင်သည့် ပစ္စည်းအတု စုစုပေါင်း ဘတ်သန်း (၈၀)ဖိုး ဖမ်းဆီးရမိ
*************
ထိုင်းနိုင်ငံ၊ ဘန်ကောက်ရှိ အလှပြင်ဆိုင် (၁၂)ဆိုင်နှင့် ကုန်သိုလှောင်ရုံများတွင် ဘိုတောက်စ်ဆေးအပါအဝင် ခန္ဓာကိုယ်သွင်ပြင်ပြုပြင်ရာ၌ အသုံးပြုသည့် ပစ္စည်းအတု စုစုပေါင်း ဘတ်သန်း(၈၀)ဖိုးကို  အထူးစုံစမ်းရေးအဖွဲ့နှင့် FDA တို့က သိမ်းဆည်းလိုက်ကြောင်း သိရသည်။

အထူးစုံစမ်းရေးအဖွဲ့က ၂၀၁၉ ခုနှစ်၊ ဇွန်လ (၁၂)ရက်နေ့တွင် ဘန်ကောက်မြို့ရှိ နယ်မြေ(၉)ခု၌ ဝင်ရောက်စစ်ဆေးရာ ခန္ဓာကိုယ်သွင်ပြင်ပြုပြင်ရန် အသုံးပြုသည့်ပစ္စည်းအတုအရေအတွက် စုစုပေါင်း (၄)သိန်းကို စစ်ဆေးတွေ့ရှိရခြင်းဖြစ်ကြောင်း သိရသည်။

အဆိုပါ ကုန်ပစ္စည်းအတုများ စစ်ဆေးတွေ့ရှိရသည့် အလှပြုပြင်ရေးဆိုင်များနှင့် ကုန်သိုလှောင်ရုံများမှ ငွေကြေးအလွှဲအပြောင်း စုစုပေါင်းဘတ်သန်းပေါင်း (၈၀၀)ရှိသည်ကို စစ်ဆေးတွေ့ရှိထားကြောင်း သိရသည်။

တရားမဝင်တင်သွင်းထားသည့် အဆိုပါကုန်ပစ္စည်းအတုများကို အင်စတာဂရမ်နှင့် Line ကဲ့သို့ လူမှုကွန်ယက်များကို အသုံးပြု၍ ကြော်ငြာကြပြီး အလှပြုပြင်ရေးဆိုင်များသာမက ကိုယ်တိုင်သုံးစွဲသူများအတွက်ပါ ဖြန့်ဖြူးပေးနေခြင်းဖြစ်ကြောင်း သိရသည်။

မျက်နှာအပါအဝင် ခန္ဓာကိုယ်ပြုပြင်ရာတွင် အသုံးပြုသည့်ဆေးဝါးများမှာ အထူးကျွမ်းကျင်သည့် ဆရာဝန်များကသာ အသုံးပြုရမည်ဖြစ်ပြီး ကျွမ်းကျင်ပညာရှင်များ၏ အကူအညီမပါဘဲ အသုံးပြုပါက ပြင်းထန်သည့် အသက်ရှုလမ်းကြောင်းဆိုင်ရာ ရောဂါများ၊ မျက်မမြင်ဖြစ်ခြင်း၊ ယောင်ယမ်းခြင်းအပြင် အသက်ဆုံးရှုံးသည်အထိ ဖြစ်ပွားနိုင်ကြောင်း သိရသည်။

Tachileik News Agency
Ref: Bangkok Post