~~~~~~~~⊰❂ Unicode Version ❂⊱~~~~~~~~

ထိုင်းနိုင်ငံတွင် အိုက်စ် (၁.၄၉)တန်နှင့် ကတ်တမင်း (၉၁) ကီလိုဂရမ်တို့ကို သိုလှောင်ထားသည့် ဂိုဒေါင်အား စစ်ဆေးတွေ့ရှိ
****************
ထိုင်းနိုင်ငံ၊ ပထုန်ဌာနီတွင် မူးယစ်ဆေးသိုလှောင်၊ ထုပ်ပိုးရာ ဂိုဒေါင်တစ်ခုကို ရဲတပ်ဖွဲ့က စစ်ဆေးတွေ့ရှိပြီး အိုက်စ်  (၁.၄၉)တန်၊ ကတ်တမင်း (၉၁)ကီလိုဂရမ်၊ သေနတ်တစ်လက်တို့ သိမ်းဆည်းရမိကာ အသက်(၂၆)နှစ်အရွယ်လူငယ်တစ်ဦးကို ဖမ်းဆီးရမိထားကြောင်း သိရသည်။

ပထုန်ဌာနီတွင် ၂၀၁၉ ခုနှစ် ဇွန်လ (၄)ရက်နေ့ နံနက်ပိုင်းက ဝင်ရောက်ဖမ်းဆီးခဲ့ခြင်းဖြစ်ကြောင်း ဇွန်လ (၅)ရက်နေ့ သတင်းစာရှင်းလင်းပွဲတွင် ပြောကြားသည်။

ဒေသခံများ၏ သတင်းပေးမှုနှင့် ကွင်းဆက်ဖေါ်ထုတ်ချက်အရ ရဲတပ်ဖွဲ့က ဇွန်လ (၄)ရက်နေ့ နံနက် (၂)နာရီခန့်တွင် ဂိုဒေါင်အနီးရောက်လာသည့် မော်တော်ယာဉ်အား ရပ်တန့်စစ်ဆေးရာ ယာဉ်ပေါ်ပါသည့် အမျိုးသားနှစ်ဦးအနက် တစ်ဦးမှာ ထွက်ပြေးလွတ်မြောက်သွားကြောင်း သိရသည်။

မော်တော်ယာဉ်အား စစ်ဆေးရာ အိုက်စ် (၁၀၀)ကီလိုဂရမ်နှင့် ကတ်တမင်း (၉၁)ကီလိုဂရမ်တို့ကို ဖမ်းဆီးရမိခြင်းဖြစ်ပြီး ဂိုဒေါင်အား ဆက်လက်စစ်ဆေးရာ ခြောက်ဘီးယာဉ်တစ်စီး၌ ဝှက်ထားသည့် အိုက်စ် (၁.၃၉) တန်ကို ထပ်မံဖမ်းဆီးရမိခြင်းဖြစ်ကြောင်း သိရသည်။

အဆိုပါဂိုဒေါင်ကို ငှားရမ်းထားခြင်းဖြစ်ကာ အိမ်နီးချင်းနိုင်ငံမှ တင်သွင်းလာသည့် မူးယစ်ဆေးများသိုလှောင်ပြီး သြစတေးလျ၊ အင်ဒိုနီးရှား၊ ဂျပန်၊ မလေးရှားနှင့် တောင်ကိုရီးယားတို့သို့ တင်ပို့ရန် ထုပ်ပိုးနေရာအဖြစ် အသုံးပြုနေခြင်းဖြစ်ကြောင်း သိရသည်။

မူးယစ်ဆေးဖမ်းဆီးရမိမှုနှင့်ပတ်သက်၍ ဆက်စပ်သူများကို ဆက်လက်ဖေါ်ထုတ်စုံစမ်းနေကြောင်း သိရသည်။
Tachileik News Agency
Ref: Bangkok Post