~~~~~~~~⊰❂ Unicode Version ❂⊱~~~~~~~~

တာချီလိတ်ရှိ မြန်မာ-ထိုင်း ချစ်ကြည်ရေးတံတား အမှတ် (၂) ကို အများပြည်သူဖြတ်သန်းခွင့်အတွက် လိုအပ်သည့်ပြင်ဆင်မှုများပြုလုပ်ရန် ပြည်နယ်အဆင့်ဆွေးနွေးနေ
***********
ထိုင်းနိုင်ငံနှင့်နယ်စပ် ရှမ်းပြည်နယ်အရှေ့ပိုင်း၊ တာချီလိတ်မြို့ရှိ မြန်မာ - ထိုင်းချစ်ကြည်ရေးတံတားအမှတ် (၂)ကို ကုန်သွယ်ရေးအတွက်သုံးနေရာမှ အများပြည်သူဖြတ်သန်းသွားလာနိုင်ခွင့်ပြုရန် လိုအပ်သည့်ပြင်ဆင်မှုများအတွက် ပြည်နယ်အဆင့် ဆွေးနွေးနေဆဲဖြစ်ပြီး ပြည်ထောင်စုသို့ ဆက်လက်တင်ပြသွားမည်ဖြစ်ကြောင်း သိရသည်။

အမှတ်(၁)တံတားတွင် ယာဉ်ကြောကျပ်တည်းမှုနှင့် ယာဉ်ကြောပိတ်ဆို့မှု ဖြစ်ပွားနေသဖြင့် အမှတ်(၂)တံတားတွင်လည်း အများပြည်သူဖြတ်သန်းသွားလာခွင့်ပြုမည်ဆိုပါက ထိုင်းနိုင်ငံဘက်က အဆင်သင့်ပြင်ဆင်ထားပြီးဖြစ်ကြောင်း ၂၀၁၈ ခုနှစ် သြဂုတ်လ (၁၇)ရက်နေ့က ကျင်းပသည့် နှစ်နိုင်ငံ မြို့နယ်အဆင့်နယ်ခြားကော်မတီ(TBC)အစည်းအဝေးတွင် ထိုင်းနိုင်ငံဘက်က တင်ပြဆွေးနွေးထားခဲ့ရာ မြန်မာဘက်ကလည်း ခွင့်ပြုနိုင်ရန် ဒေသအုပ်ချုပ်ရေးအဖွဲ့က ပြည်နယ်အစိုးရထံ တင်ပြထားခြင်းဖြစ်သည်။

"အဲဒီတံတားကနေ ဖြတ်သန်းသွားလာဖို့ကို အစိုးရအဖွဲ့ အစည်းအဝေးမှာ ဝိုင်းဆွေးနွေးပြီးတော့ ကျွန်တော်တို့ ဥပဒေနဲ့အညီ ဆောင်ရွက်ဖို့ရှိပါတယ်ဗျ။ ဒါကိုလည်း ဝန်ကြီးချုပ်ကြီးက ခရီးစဉ်မှာ ပြောခဲ့ပါတယ်ဗျ။ လုပ်ထုံးလုပ်နည်းနဲ့လည်းညီအောင် အားလုံးလည်း အထစ်အငေါ့မရှိအောင် နောက်ပြီးတော့ တချို့ဌာနတွေက ဝန်ထမ်းတွေဘာတွေဖြည့်ဆည်းစရာတွေရှိတယ်။ အဲဒါလေးတွေ ညှိနှိုင်းဆောင်ရွက်ပြီးရင်တော့ ကျွန်တော်တို့ ဆက်လုပ်ဖို့ရှိပါတယ်။ ပြည်ထောင်စုအစိုးရလည်း ဆက်တင်ပြရမှာပေါ့"ဟု ရှမ်းပြည်နယ်အစိုးရအဖွဲ့အတွင်းရေးမှူး၊ ပြည်နယ်အုပ်ချုပ်ရေးမှူး ဦးစိုးစိုးဇော်က တာချီလိတ်သတင်းအေဂျင်စီသို့ပြောသည်။

၂၀၁၉ ခုနှစ် ဧပြီလ (၃၀) ရက်နေ့တွင် ကျင်းပသည့် (၉၅) ကြိမ်မြောက် မြန်မာ-ထိုင်းနှစ်နိုင်ငံ မြို့နယ်အဆင့်နယ်ခြားကော်မတီ အစည်းအဝေးတွင် ထိုင်းနိုင်ငံဘက်မှ အများပြည်သူသွားလာရာတွင် လွယ်ကူအဆင်ပြေ ချောမွေ့စေရေးအတွက် အမှတ် (၂) ချစ်ကြည်ရေးတံတားအား ဖွင့်လှစ်အသုံးပြုသွားရန် အမှတ်(၂)တံတားအား အများပြည်သူဖြတ်သန်းခွင့်ပြုနိုင်ရန် နှစ်နိုင်ငံမြို့နယ်အဆင့် နယ်ခြားကော်မတီ အစည်းအဝေးများတွင် ထိုင်းနိုင်ငံက ၂၀၁၈ခုနှစ် သြဂုတ်လ (၁၇)ရက်နေ့က ဆွေးနွေးခဲ့ပြီးနောက် ဒီဇင်ဘာလ (၁၉)ရက်နေ့ အစည်းအဝေးနှင့် ၂၀၁၉ ခုနှစ် ဧပြီလ(၃၀)ရက်နေ့အစည်းအဝေးများတွင် ထပ်မံဆွေးနွေးထားခြင်းဖြစ်သည်။

မြန်မာ - ထိုင်း ချစ်ကြည်ရေး အမှတ်(၁)တံတားမှ ခြေလျင်ဖြတ်သန်းသူများ၊ အိမ်သုံးကား၊ ဆိုင်ကယ်တို့အပြင် တစ်နိုင်တစ်ပိုင်ကုန်သွယ်မှုအတွက် ပစ္စည်းသယ်သည့် သုံးဘီးဆိုင်ကယ်များ၊ မော်တော်ယာဉ်များ ဖြတ်သန်းသွားလာနေသည့် မော်တော်ယာဉ်များပြားခြင်းနှင့် နှစ်နိုင်ငံကြား လက်ဝဲ၊ လက်ယာ ယာဉ်ကြောသတ်မှတ်မှုမှာလည်း ဆန့်ကျင်ဘက်ဖြစ်နေ၍ တံတားအလယ် နယ်နမိတ်တွင် မော်တော်ယာဉ်များ ကန့်လန့်ဖြတ်ကူးသန်းနေရခြင်းများကြောင့် ယာဉ်ကြောပိတ်ဆို့မှုဖြစ်ပွားနေခြင်းဖြစ်သည်။

တာချီလိတ်မြို့နှင့် ထိုင်းနိုင်ငံမယ်ဆိုင်ကို ဆက်သွယ်ထားသည့် ချစ်ကြည်ရေးတံတား (၂)စင်းရှိသည့်အနက် ချစ်ကြည်ရေးတံတား (၁)ကို အများပြည်သူဖြတ်သန်းသွားလာခြင်းနှင့် ချစ်ကြည်ရေးတံတား (၂)ကို ကုန်သွယ်ရေးအတွက် သီးခြားစီအသုံးပြုနေခြင်းဖြစ်သည်။

ထိုင်းနိုင်ငံ၊ လာအိုနိုင်ငံတို့ဖြင့် နယ်နမိတ်ထိစပ်နေသည့် ရှမ်းပြည်နယ်(အရှေ့ပိုင်း) တာချီလိတ်ခရိုင်အတွင်း နယ်စပ်ဝင်ထွက်ပေါက်များအဖြစ် တာချီလိတ်နှင့် ထိုင်းနိုင်ငံမယ်ဆိုင်ကို ဆက်သွယ်ထားသည့် မြန်မာ - ထိုင်းချစ်ကြည်ရေးတံတား(၁)၊ ဝမ်ပုံနှင့် လာအိုနိုင်ငံ လုံတားထိုင်းကိုဆက်သွယ်ထားသည့် ဝမ်ပုံဆိပ်ကမ်းနှင့် ကျိုင်းလပ်နှင့် လာအိုနိုင်ငံစီအင်ကောက်ဆက်သွယ်ထားသည့် မြန်မာ - လာအိုချစ်ကြည်ရေးတံတားတို့တွင် ခွင့်ပြုထားခြင်းဖြစ်သည်။

သတင်း #ဟန်စိုးထိုက်