~~~~~~~~⊰❂ Unicode Version ❂⊱~~~~~~~~

 ထိုင်းဗိုလ်ချုပ်အယောင်ဆောင်ထားသူ၏ ဘန်ကောက်ရှိနေအိမ်ကို ဝင်ရောက်ဖမ်းဆီး
************
ထိုင်းနိုင်ငံ၊ ဘန်ကောက်တွင် ဗိုလ်ချုပ်အယောင်ဆောင်ထားသည့် အသက် (၃၁)နှစ်အရွယ် လူငယ်၏နေအိမ်မှ တပ်ဝတ်စုံယူနီဖောင်းများ၊ တောရိုင်းတိရိစ္တာန်ပစ္စည်းများနှင့်အတူ ဖမ်းဆီးရမိထားကြောင်း သိရသည်။

ဘန်ကောက် ချက်တူချပ်ရှိ ဝမ်ကဆတ်ဖရွန်ထုန်၏နေအိမ်အား သဘာဝပတ်ဝန်းကျင်ထိန်းသိမ်းရေးဌာန အရာရှိများက ၂၀၁၉ ခုနှစ်၊ မေလ (၁၈)ရက်နေ့က ဝင်ရောက်စစ်ဆေးရာ  ခြင်္သေ့အရေခွံအပါအဝင် တောရိုင်းတိရစ္ဆာန်ပစ္စည်းများကို ဖမ်းဆီးရမိခြင်းဖြစ်ကြောင်း သိရသည်။

မှုခင်းစုံစမ်းရေးဌာနက မသင်္ကာဖွယ်အချက်အလက်များ တွေ့ရှိရသဖြင့် သဘာဝပတ်ဝန်းကျင် ထိန်းသိမ်းရေးဌာနထံ အကြောင်းကြားရာမှ ယင်းကဲ့သို့ဖမ်းဆီးရမိခြင်းဖြစ်ကြောင်း သိရသည်။

အဆိုပါနေအိမ်မှ ထိုင်းစစ်ဗိုလ်ချုပ်ဝတ်စုံ (၂)စုံနှင့် အဆောင်အယောင်များကိုလည်း စစ်ဆေးတွေ့ရှိရသည့်အပြင်  ဘတ် (၅)သိန်းမှ ဘတ်(၅)သန်းအထိ ချေးငွေစာချုပ်များကိုလည်း စစ်ဆေးတွေ့ရှိထားကြောင်း သိရသည်။

အဆိုပါ အယောင်ဆောင်ဗိုလ်ချုပ်က အစိုးရအဖွဲ့ထိပ်ပိုင်းအရာရှိများနှင့် ရင်းနှီးကျွမ်းဝင်ဟန်ဖြင့် အစိုးရလုပ်ငန်းတင်ဒါဆွဲသူများထံမှ ငွေကြေးရယူလုပ်ဆောင်ပေးခြင်းများကိုလည်း စစ်ဆေးတွေ့ရှိထားကြောင်းသိရသည်။

ယင်းကဲ့သို့ ဖမ်းဆီးမခံရမီ (၂)ရက်အလိုက ထိုင်းတော်ဝင်တပ်မတော်ကလပ်တွင်ကျင်းပသည့် ထိုင်းဝန်ကြီးချုပ်ဟောင်း၊ ဗိုလ်ချုပ်ကြီး ချာဗလစ်ယောင်ချာယု၏ (၈၇)နှစ်မြောက်မွေးနေ့တွင် အဆင့်မြင့်အရာရှိများ၊ နိုင်ငံရေးသမားများနှင့်အတူ တက်ရောက်ခဲ့ကြောင်း သိရသည်။

Tachileik News Agency
Ref: Bangkok Post