~~~~~~~~⊰❂ Unicode Version ❂⊱~~~~~~~~

ထိုင်းနိုင်ငံတွင် သာသနာ့ရန်ပုံငွေအလွဲသုံးစားပြုမှုဖြင့် ဘုန်းတော်ကြီးနှစ်ပါးကို ထောင်ဒဏ်အသီးသီးချမှတ်
*********
ထိုင်းနိုင်ငံတွင် ဘုန်းတော်ကြီးကျောင်းများပြုပြင်ရန် အစိုးရထောက်ပံ့ငွေအား အလွဲသုံးစားပြုလုပ်မှုဖြင့် အမှုရင်ဆိုင်နေရသည့် ကျောင်းထိုင်ဘုန်းတော်ကြီးနှစ်ပါးကို ထောင်ဒဏ်အသီးသီးချမှတ်လိုက်ကြောင်း သိရသည်။

ဝပ်ဆန်ဘုန်းတော်ကြီးကျောင်း၏ ယခင်ကျောင်းထိုင်ဘုန်းတော်ကြီးကို ထောင်ဒဏ် (၆)နှစ်နှင့် လက်ထောက်ဆရာတော်အား ထောင်ဒဏ် (၃)နှစ်အသီးသီးချမှတ်လိုက်ခြင်းဖြစ်ကြောင်း သိရသည်။
လက်ရှိထောင်ဒဏ် (၆)နှစ်ကျခံရသည့် ဘုန်းတော်ကြီးမှာ ၂၀၁၈ ခုနှစ် တရားစွဲဆိုခြင်းမခံရမီက ဘန်ကောက် သံဃာ့အဖွဲ့အစည်းအကြီးအကဲဆရာတော်ဖြစ်သည့်အပြင် သံဃာ့မဟာနာယကအဖွဲ့ဝင်လည်းဖြစ်ခဲ့၍ သံဃာတော်များ၏ ကြည်ညိုလေးစားမှုကို ရရှိထားခဲ့ခြင်းဖြစ်သည်။

ဘုန်းတော်ကြီးကျောင်းများပြုပြင်မွမ်းမံရေး အစိုးရစီမံကိန်းမှ ကျောင်းများပြုပြင်ရန် ထောက်ပံ့ပေးထားသည့် ဘတ် (၅)သန်းကို အလွဲသုံးစားပြုမှုဖြင့် အဆိုပါ ကျောင်းထိုင်ဆရာတော်နှင့် လက်ထောက်ဆရာတော်တို့အား တရားစွဲဆိုခဲ့ခြင်းဖြစ်သည်။

စီမံကိန်းမှထောက်ပံ့ငွေရယူရာတွင် ဘုန်းတော်ကြီးကျောင်းပြုပြင်ရန်အပြင် အဆိုပါ ဘုန်းတော်ကြီးကျောင်းတွင် စာသင်ကျောင်းအတွက်ပါ ရယူထားခြင်းဖြစ်သော်လည်း စာသင်ကျောင်းမှာ အမှန်တကယ်ဆောက်လုပ်ထားခြင်းမရှိသဖြင့် အရေးယူခံရခြင်းဖြစ်ကြောင်း သိရသည်။

အစိုးရက ဘုန်းတော်ကြီးကျောင်းပြုပြင်ရန်အတွက် ဘတ် (၈)သန်းနှင့် ဘုန်းတော်ကြီးကျောင်းတွင် အမှန်တကယ်မရှိခဲ့သည့် စာသင်ကျောင်းအတွက် ဘတ် (၅)သန်းချထားပေးသည့်အနက် ဘတ် (၃.၅)သန်းကို ရန်ပုံငွေရရှိသည်နှင့် အခြားဘဏ်အကောင့်တစ်ခုသို့ ချက်ချင်းလွှဲပြောင်းပေးထားသည်ကို စစ်ဆေးတွေ့ရှိရပြီး အဆိုပါဘဏ်အကောင့်အမှာ ဆောက်လုပ်ရေးစရိတ်ပေးခြင်းဖြစ်သည်ဟု တရားရုံးတွင် ပြန်လည်ချေပထားကြောင်း သိရသည်။
အဆောက်အဦဆောက်လုပ်ရန်ရန်ပုံငွေမှ အချို့ကို အမျိုးသမီးတစ်ဦးက ထုတ်ယူထားသည်ကိုလည်း တွေ့ရပြီး အဆိုပါအမျိုးသမီးက ဆောက်လုပ်ရေးအတွက် ကြိုတင်ထုတ်ပေးငွေမှ အတိုးရယူထားသည်ကို စစ်ဆေးတွေ့ရှိထားခြင်းဖြစ်ကြောင်း သိရသည်။

အဆိုပါဆရာတော်(၂)ပါးမှာ တရားစွဲဆိုခံရချိန်မှစ၍ သင်္ကန်းဝတ်ခွင့်မရတော့ဘဲ အမှုရင်ဆိုင်နေရခြင်းဖြစ်ပြီး အမှုအား နောက်ဆုံးအမိန့်ချသည့် ၂၀၁၉ ခုနှစ်၊ မေလ (၁၆)ရက်နေ့က တရားရုံးတွင် ဆရာတော်များ၏ တပည့်ဒါယကာ၊ ဒါယိကာမ (၅၀)ခန့်လည်း လာရောက်ကြကြောင်း သိရသည်။

၂၀၁၈ ခုနှစ်အတွင်းက သာသနာ့ရန်ပုံငွေချထားပေးမှုများအား စစ်ဆေးခဲ့ရာ ရန်ပုံငွေ အလွဲသုံးစားပြုမှုဖြင့် ဘုန်းတော်ကြီးများနှင့် သာသနာ့ရန်ပုံငွေအဖွဲ့မှ အရာရှိများ တရားရင်ဆိုင်ခဲ့ကြရခြင်းဖြစ်သည်။

ဧပြီလအတွင်းကလည်း သာသနာ့ရန်ပုံငွေအလွဲသုံးစားပြုမှုဖြင့် ကျောင်းထိုင်ဘုန်းတော်ကြီးတစ်ပါးကို ထောင်ဒဏ် (၂၆)နှစ်အထိ ချမှတ်ခဲ့ခြင်းဖြစ်သည်။

Tachileik News Agency