~~~~~~~~⊰❂ Unicode Version ❂⊱~~~~~~~~

NCA လက်မှတ်ထိုးထားသည့် တိုင်းရင်းသားလက်နက်ကိုင်တော်လှန်ရေးအဖွဲ့အစည်းများ၏ ထိပ်သီးအစည်းအဝေး ချင်းမိုင်တွင်ကျင်းပ
**************
NCA လက်မှတ်ရေးထိုးထားသည့် တိုင်းရင်းသားလက်နက်ကိုင် တော်လှန်ရေးအဖွဲ့အစည်းများ၏ စတုထ္ထအကြိမ်မြောက် ထိပ်သီးခေါင်းဆောင်များ အစည်းအဝေးကို ၂၀၁၉ ခုနှစ်၊ မေလ (၁၄) ရက်နေ့မှ (၁၉) ရက်နေ့အထိ ထိုင်းနိုင်ငံ ချင်းမိုင်မြို့တွင် ကျင်းပနေကြောင်း သိရသည်။

NCA (တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်) လက်မှတ်ရေးထိုးထားသော  တိုင်းရင်းသားလက်နက်ကိုင်တော်လှန််ရေးအဖွဲ့အစည်း (၈) ဖွဲ့နှင့် NCA အကောင်အထည်ဖော်ဖက်များ ဖြစ်ကြသည့် မွန်ပြည်သစ်ပါတီ (NMSP) နှင့် လားဟူဒီမိုကရက်တစ် အစည်းအရုံး (LDU) တို့ တက်ရောက်ဆွေးနွေးကြခြင်းဖြစ်ကြောင်း သိရသည်။

အစည်းအဝေးသို့ ညီနောင်တိုင်းရင်းသားလက်နက်ကိုင်တော်လှန်ရေးအဖွဲ့အစည်းများ ဖြစ်ကြသည့် ကချင်လွတ်မြောက်ရေး အဖွဲ့အစည်း (KIO) နှင့် ကရင်နီအမျိုးသားတိုးတက်ရေးပါတီ (KNPP) တို့မှလည်း လေ့လာသူများအဖြစ် တက်ရောက်နေကြကြောင်း သိရသည်။

ငြိမ်းချမ်းရေးလုပ်ငန်းစဉ်အကောင်အထည်ဖော်မှုဆိုင်ရာ သက်ဆိုင််ရာကဏ္ဍအလိုက် အစီရင်ခံစာများ တင်သွင်း ဆွေးနွေးခြင်းနှင့် NCA-S EAO အတွင်းစုဖွဲ့မှုများအပေါ် ပြန်လည်သုံးသပ်ဆွေးနွေးခြင်းများ ပြုလုပ်သွားမည်ဖြစ်ကြောင်း NCAs-EAO ကသတင်းထုတ်ပြန်ထားသည်။

Tachileik News Agency
Photo: NCAs-EAO