~~~~~~~~⊰❂ Unicode Version ❂⊱~~~~~~~~

မြန်မာလုပ်သား (၁၃)ဦးကို မလေးရှားသို့ တရားမဝင်ပို့ဆောင်ပေးသည့် ထိုင်းစာပို့ယာဉ်ကို ဖမ်းဆီးစစ်ဆေးနေ
**************
မြန်မာလုပ်သား (၁၃)ဦးကို မလေးရှားသို့ခိုးဝင်ရန် ပို့ဆောင်ပေးသည့် ထိုင်းစာပို့ယာဉ်ကို ထိုင်းနိုင်ငံ၊ ရတ်ထဖန်တွင် ၂၀၁၉ ခုနှစ်၊ မေလ (၁၄)ရက်နေ့ ည(၁၂)နာရီကျော်က ဖမ်းဆီးရမိလိုက်ခြင်း ဖြစ်ကြောင်း သိရသည်။

ရဲ၊လူဝင်မှုကြီးကြပ်ရေးနှင့်စစ်တပ်တို့ပါဝင်သည့် ပူးပေါင်းအဖွဲ့က အာရှ ၄၁ လမ်းမအတိုင်းမောင်းနှင်လာသည့်  စာပို့ယာဉ်ကို မသင်္ကာသဖြင့် စစ်ဆေးရာမှ မြန်မာနိုင်ငံသား ဟိန္ဒူအမျိုးသား (၁၃)ဦးကို ဖမ်းမိခြင်းဖြစ်ကြောင်း သိရသည်။

အဆိုပါ မြန်မာလုပ်သားများသည် မြန်မာ - ထိုင်းနယ်စပ် ကန်ချနဘူရီဘက်မှ တရားမဝင် ဝင်ရောက်လာခြင်းဖြစ်ပြီး ထိုင်းနိုင်ငံ ဆမုဆခွန်တွင် ယာယီခိုလှုံနေခဲ့ကြခြင်းဖြစ်ကြောင်းသိရသည်။

၎င်းတို့အား မလေးရှားသို့ပို့ဆောင်ပေးရန် တစ်ဦးလျှင် ဘတ် (၁၅၀၀)စီပေးရကြောင်း စစ်ဆေးသိရှိရသဖြင့် စာပို့ယာဉ်မောင်းနှင်သည့် အသက် (၃၀)အရွယ် ထိုင်းနိုင်ငံသား ယာဉ်မောင်းကို ဟတ်ယိုင်ရှိ နယ်မြေခံတပ်တွင် ခေါ်ယူစစ်ဆေးနေကာ လူကုန်ကူးမှုတွင် ပါဝင်ဆက်နွှယ်သူများကို ဖေါ်ထုတ်နေကြောင်း သိရသည်။

လူကုန်ကူးမှုတွင် စာပို့ယာဉ်အားအသုံးပြုမှုနှင့်ပတ်သက်၍ စစ်ဆေးနေပြီး လူကုန်ကူးမှုတွင်ပါဝင်ပတ်သက်နေမှုဖေါ်ထုတ်ရေးတွင် စာပို့ဌာနအနေဖြင့် ပူးပေါင်းဆောင်ရွက်မည်ဖြစ်ပြီး စာပို့ယာဉ်မောင်းကိုလည်း အလုပ်မှထုတ်ပစ်သွားမည်ဖြစ်ကြောင်း သတင်းထုတ်ပြန်ထားသည်။

Tachileik News Agency
Ref: Bangkok Post