~~~~~~~~⊰❂ Unicode Version ❂⊱~~~~~~~~

ထိုင်းနိုင်ငံတွင် ရဲအရာရှိတစ်ဦးနှင့်အရပ်သား(၅)ဦးကို ပြန်ပေးဆွဲသည့်အဖွဲ့တွင် ရဲအရာရှိများပါဝင်နေကြောင်း ကနဦးစစ်ဆေးတွေ့ရှိထား
**************
ထိုင်းနိုင်ငံ ပတ္ထနီမှ ရဲအရာရှိတစ်ဦးနှင့် သူငယ်ချင်း(၅)ဦးကို ပြန်ပေးဆွဲကာ ဘတ်(၅)သိန်းတောင်းခံသည့် ပြန်ပေးအဖွဲ့တွင် ရဲအရာရှိ အနည်းဆုံး (၃)ဦးပါဝင်နေသည်ကို စစ်ဆေးတွေ့ရှိထားကြောင်း သိရသည်။

လူ(၁၀)ဦးခန့်ပါဝင်သည့်အဖွဲ့က ပတ္ထနီမှ ရဲအရာရှိနှင့် အရပ်သား (၅)ဦးတို့ကို ၂၀၁၉ ခုနှစ် မတ်လ(၂၆)ရက်နေ့တွင် ဖမ်းဆီးခေါ်ဆောင်သွားပြီး ရဲအရာရှိ၏ ပစ္စတိုနှစ်လက်ကို သိမ်းဆည်းသွားကြခြင်းဖြစ်ကြောင်း သိရသည်။

ယင်းနောက် ပြန်ပေးဆွဲသူများက ဘတ်(၅)သိန်းတောင်းဆိုရာ ဘတ် (၂)သိန်းကို အကြိမ်ခွဲ၍ပေးရန်နှင့် ရဲအရာရှိ၏ကားကို အာမခံအဖြစ်ထားရှိရန်သဘောတူညှိနှိုင်းပြီး ပြန်ပေးဆွဲခံရသူများ ပြန်လည်လွတ်မြောက်လာကြခြင်းဖြစ်ကြောင်း သိရသည်။

ပြန်ပေးဆွဲခံရသည့် ရဲအရာရှိက ကျန်ရှိသည့် ဘတ်ငွေ (၈၀၀၀၀)ဖြင့် အာမခံထားရှိသည့်ကားအား ပြန်သွားရွေးချိန်တွင် အဆိုပါကားအား မူးယစ်ဂိုဏ်းသို့ပေါင်နှံထားသဖြင့် ဘတ်ငွေ (၂)သိန်းကို အတိုးနှုန်း (၁၀)ရာခိုင်နှုန်းဖြင့် ပြန်လည်ရွေးယူရန် ပြန်ပေးသမားများက ထပ်မံပြောဆိုလာခြင်းဖြစ်ကြောင်း သိရသည်။

အကယ်၍ ရဲအရာရှိအနေဖြင့် ငွေကြေးထပ်မပေးဘဲ ရဲတပ်ဖွဲ့ထံတိုင်ကြားပါက ၎င်း၏ကားနှင့်အတူ မူးယစ်ဆေးများ ဖမ်းဆီးရရှိကြောင်း သတင်းထုတ်မည်ဟု ခြိမ်းခြောက်ထားသည့်အပြင် ကြားထဲမှ ညှိနှိုင်းပေးသည့်အမျိုးသမီးထံမှ ခြိမ်းခြောက်တောင်းခံစာများလည်း ပေးပို့နေခြင်းဖြစ်ကြောင်း သိရသည်။

အဆိုပါ ပြန်ပေးမှုကို စုံစမ်းဖေါ်ထုတ်နေဆဲဖြစ်ပြီး လက်ရှိတွင် ဖေါ်ထုတ်ရရှိထားသည့် (၄)ဦးအနက် (၃)ဦးမှာ ရဲအရာရှိများဖြစ်ပြီး (၁)ဦးမှာ အမျိုးသမီးဖြစ်ကြောင်း သိရသည်။

Tachileik News Agency
Ref: Bangkok Post