~~~~~~~~⊰❂ Unicode Version ❂⊱~~~~~~~~

သီရိလင်္ကာတွင် ပေါက်ကွဲမှုများနှင့်ပတ်သက်၍ ဝါဒဖြန့်ခြင်း၊ သတင်းပြန့်နှံ့ခြင်းမရှိစေရန် လူမှုကွန်ယက်စာမျက်နှာများကို ယာယီပိတ်ထားကြောင်း အစိုးရထုတ်ပြန်
***********
သီရိလင်္ကာနိုင်ငံတွင် လူပေါင်း (၂၀၀)ကျော်သေဆုံးခဲ့ရသည့် ပေါက်ကွဲမှု(၈)ခုဖြစ်ပွားပြီးနောက် အခင်းဖြစ်ရပ်နှင့်ပတ်သက်၍ သတင်းမှားများပြန့်နှံ့မှုမရှိစေရန် လူမှုကွန်ယက်ဝက်ဘ်ဆိုဒ်များကို ပိတ်လိုက်ကြောင်း သိရသည်။

သီရိလင်္ကာနိုင်ငံရှိ ထိပ်တန်းဟိုတယ်များနှင့် ဘုရားကျောင်းများ စုစုပေါင်း (၈)နေရာတွင် အီစတာပွဲတော်ကာလဖြစ်သည့် ၂၀၁၉ ခုနှစ်၊ ဧပြီလ (၂၁)ရက်နေ့က ပေါက်ကွဲမှုများဖြစ်ပွားခဲ့သဖြင့် နိုင်ငံခြားသား (၃၅)ဦးအပါအဝင် လူပေါင်း (၂၀၇)ဦးသေဆုံးခဲ့ကာ လူပေါင်း (၄၅၀)ခန့် ဒဏ်ရာရသွားခဲ့ခြင်းဖြစ်သည်။

အကြမ်းဖက်တိုက်ခိုက်မှုများနှင့်ပတ်သက်၍ ဝါဒဖြန့်မှုနှင့် သတင်းမှားဖြန့်ချိမှုများကို ထိန်းချုပ်ရန် ယာယီပိတ်ထားခြင်းဖြစ်ကြောင်း သီရိလင်္ကာအစိုးရ ပြောကြားထားသည်။

Facebook နှင့် Instagram များကို ပိတ်လိုက်ကြောင်း အစိုးရက တရားဝင်ကြေငြာထားသော်လည်း Youtube၊ Snapchat၊ WhatsApp နှင့်အခြား မက်ဆေ့ပို့နိုင်သည့် Application များကိုပါ ပိတ်ထားခြင်းဖြစ်သည်ဟု အင်တာနက်စောင့်ကြည့်ရေးအဖွဲ့ဖြစ်သည့် NetBlocks က ဆိုသည်။

သီရိလင်္ကာတွင် အသုံးပြုသူနည်းသည့်အတွက် Twitter ကို ပိတ်ထားခြင်းမရှိကြောင်း သိရသည်။

Facebook ကုမ္ပဏီပြောရေးဆိုခွင့်ရှိသူက ၎င်းတို့အနေဖြင့် သီရိလင်္ကာနိုင်ငံ၏ တရားဥပဒေစိုးမိုးရေး လုပ်ဆောင်ချက်ကို အထောက်အကူပေးမည်ဖြစ်ပြီး ၎င်းတို့၏ဆိုရှယ်မီဒီယာများ၏ ချမှတ်ထားသည့်စံနှုန်းများကို ချိုးဖေါက်ခြင်းများကို ဖေါ်ထုတ်သွားမည်ဖြစ်ကြောင်း ပြောကြားထားသည်။

Tachileik News Agency
Ref: CNN