~~~~~~~~⊰❂ Unicode Version ❂⊱~~~~~~~~

ဖွံ့ဖြိုးမှုအားနည်းသည့် ရှမ်းပြည်နယ်အရှေ့ပိုင်းစီးပွားရေးလုပ်ငန်းများအတွက် SME ချေးငွေပမာဏ ပိုမိုလျာထားပေးသော်လည်း လျှောက်ထားသူမရှိသေး
*************
ဂျပန်နိုင်ငံမှ ပံ့ပိုးကူညီသော SME ချေးငွေများကို ၂၀၁၈ ခုနှစ်မှစတင်ပြီး မြန်မာ့စီးပွားရေးဘဏ်မှတဆင့် ထုတ်ပေးနေသော်လည်း ရှမ်းပြည်နယ်အရှေ့ပိုင်းဒေသမှ လျှောက်ထားသူမရှိသေးသည့်အတွက် ၂၀၁၉ ခုနှစ် ဧပြီလ (၂၃) ရက်နေ့မှစတင်သည့် ဒုတိယအကြိမ်တွင် လာရောက်လျှောက်ထားကြရန် တိုက်တွန်းထားသည်။

"ရှမ်းအရှေ့အတွက် ကျွန်တော်တို့သက်မှတ်ထားတဲ့ ပမာဏတော့ရှိပြီးသားပါ။ အဲဒီပမာဏထက် ကျော်လွန်ရင်လည်း ချေးပေးမှာပါ။ ဘာကြောင့်လည်းဆိုတော့ ရှမ်းအရှေ့ကလည်း ဖွံ့ဖြိုးမှုအားနည်း နေသေးတယ်လေ။ JICA ချေးငွေနဲ့ အတိုးနှုန်းသက်သက်သာသာနဲ့ ဒေသဖွံ့ဖြိုးတိုးတက်ရေးအတွက် အလုပ်အကိုင်အခွင့်အလမ်းတွေရရှိဖို့အတွက် ကျွန်တော်တို့ မြန်မာ့စီးပွားရေးဘဏ်ကနေ အများကြီးပံ့ပိုးကူညီပေးသွားမှာပါ"ဟု ရှမ်းပြည်နယ် မြန်မာ့စီးပွားရေးဘဏ်မှ ဒုတိယပြည်နယ်မန်နေဂျာ ဦးအောင်မျိုးထွန်းက တာချီလိတ်သတင်းအေဂျင်စီသို့ ပြောသည်။

တာချီလိတ်မှ စီးပွားရေးလုပ်ငန်းရှင်များအနေဖြင့် SME ချေးငွေနှင့်ပတ်သက်၍ သိရှိနားလည်စေရန်အတွက် တာချီလိတ်မြို့ရှိ မြန်မာ့စီးပွားရေးဘဏ်နှင့် ရှမ်းအရှေ့နယ်စပ်ကုန်သည်ကြီးများအသင်းတို့က SME ချေးငွေစကားဝိုင်းအစီအစဉ်ကို တာချီလိတ်မြို့ရှိ အောင်မြတ်ခန်းမတွင် ၂၀၁၉ ခုနှစ် ဧပြီလ (၂၅) ရက်နေ့က လုပ်ငန်းရှင်များအားဖိတ်ကြား၍ ပြုလုပ်ခဲ့ခြင်းဖြစ်သည်။

JICA ချေးငွေမှာ မြန်မာနိုင်ငံအစိုးရသို့ ဂျပန်နိုင်ငံအစိုးရမှ အသေးစားနှင့် အလတ်စား လုပ်ငန်းများဖွံ့ဖြိုးတိုးတက်ရေးအတွက် အတိုးနှုန်းသက်သာစွာဖြင့် ထုတ်ချေးနိုင်ရန် ကူညီပံ့ပိုးပေးထားသည့် ငွေကြေးတစ်ရပ်ဖြစ်ပြီး ဧပြီလ (၂၃) ရက်နေ့တွင် ဒုတိယအကြိမ်အဖြစ် ပေးအပ်ထားခြင်းဖြစ်ကြောင်း သိရသည်။

ပထမအကြိမ်တွင် ကျပ်သန်း (၃၀) ကို လုပ်ငန်းရှင်များကို ထုတ်ချေးထားပြီး ရှမ်းပြည်နယ်အရှေ့ပိုင်းမှ တင်ပြလာသူမရှိသည့်အတွက် ဒုတိယအကြိမ် ကျပ်သန်း (၃၀) တွင် လျောက်ထားကြရန် ရှမ်းပြည်နယ် မြန်မာ့စီးပွားရေးဘဏ်မှ ဒုတိယပြည်နယ်မန်နေဂျာ ဦးအောင်မျိုးထွန်းက စကားဝိုင်းဆွေးနွေးပွဲတွင် လုပ်ငန်းရှင်များအား တိုက်တွန်းသွားသည်။

အလားတူစကားဝိုင်းဆွေးနွေးပွဲများကို ရှမ်းပြည်နယ်အရှေ့ပိုင်းရှိ မြို့များတွင် ဆက်လက်လုပ်ဆောင်သွားမည်ဖြစ်ကြောင်း သိရသည်။
ရှမ်းပြည်နယ်အရှေ့ပိုင်း၌ SME လုပ်ငန်းကတ်ပြားထုတ်ပေးရေးရုံးကို ကျိုင်းတုံတွင်ဖွင့်လှစ်ထားပြီး ထုတ်ပေးခွင့်ရှိသည့် လုပ်ငန်းပေါင်း (၁၀၀၀) ကျော်အတွက် ဆောင်ရွက်ပေးနေပြီး ရှမ်းပြည်နယ်အရှေ့ပိုင်းတွင် ကတ်ပြားထုတ်ထားသူ (၁၅) ဦးသာရှိကြောင်း သိရသည်။

ဂျပန်နိုင်ငံမှ ပံ့ပိုးကူညီသော SME ချေးငွေများကို ၂၀၁၈ စက်တင်ဘာလအတွင်းက ပထမအဆင့်စတင်ခဲ့ပြီး အသေးစားနှင့် အလတ်စား စီးပွားရေးလုပ်ငန်းများအနေဖြင့် မရွှေ့မပြောင်းနိုင်သည့်ပစ္စည်းကို အပေါင်အဖြစ်ထားရှိပါက ကျပ်သိန်း (၅၀၀၀)အထိနှင့် အပေါင်ပစ္စည်းမထားနိုင်ပါက မြန်မာ့အာမခံလုပ်ငန်း၏ ကြွေးမြီအာမခံ-Credit Guarantee Insurance – CGI နဲ့ ချိတ်ဆက်ကာ ကျပ်သိန်း (၂၀၀)အထိ ထုတ်ချေးပေးနေပြီး တစ်နှစ်အတိုးနှုန်း (၈) ဒသမ (၅) ရာခိုင်နှုန်းဖြင့် ထုတ်ချေးနေခြင်းဖြစ်ကြောင်း သိရသည်။

သတင်း၊ဓါတ်ပုံ #ဟန်စိုးထိုက်