~~~~~~~~⊰❂ Unicode Version ❂⊱~~~~~~~~

ရှမ်းပြည်နယ်အတွင်း တိုက်ပွဲများကြောင့် ၂၀၁၉ ခုနှစ် ပထမသုံးလတွင် တိုက်ပွဲရှောင်ဦးရေ(၁၁,ဝဝဝ)ခန့်ရှိခဲ့ပြီး ဧပြီလအတွင်း တိုက်ပွဲရှောင်ရသူမရှိ
***************
ရှမ်းပြည်နယ်အတွင်း လက်နက်ကိုင်အဖွဲ့များအကြား တိုက်ပွဲများဖြစ်ပွားခြင်းကြောင့် အရပ်သားများ နေရပ်စွန့်ခွာတိိမ်းရှောင်ရမှုမှာ ၂ဝ၁၉ ခုနှစ်၏ ပထမ(၃)တာကာလတွင် လူဦးရေ (၁၁,ဝဝဝ) ခန့်ရှိခဲ့သော်လည်း ဧပြီလအတွင်း နေရပ်စွန့်ခွာတိမ်းရှောင်သူထပ်တိုးလာခြင်းမရှိကြောင်း လူသားချင်းစာနာမှုဆိုင်ရာ ညှိနှိုင်းရေးရုံးမှထုတ်ပြန်သည့် အချက်အလက်များအရ သိရသည်။

ရှမ်းပြည်နယ်အတွင်း ၂၀၁၉ ခုနှစ်၊ ဇန်နဝါရီလမှ မတ်လအထိ မြို့နယ် (၆) မြို့နယ်၌ ယာယီနေရပ်စွန့်ခွာတိမ်းရှောင်လာရသူများရှိခဲ့ပြီး ၎င်းတို့အားလုံးမှာ မတ်လအတွင်း နေရပ်ဒေသအသီးသီးသို့ ပြန်သွားကြပြီဖြစ်ကြောင်း ဖေါ်ပြထားသည်။

OCHA ၏ မြန်မာနိုင်ငံ လူသားချင်းစာနာမှုဆိုင်ရာရန်ပုံငွေမှ မြန်မာနိုင်ငံတွင်း နေရပ်စွန့်ခွာတိမ်းရှောင်နေရသူများကို ကူညီနေရာ ၂၀၁၈ ခုနှစ်တွင် အလှူရှင်နိုင်ငံ (၁၀) နိုင်ငံမှ ထည့်ဝင်လှူဒါန်းသည့်ရန်ပုံငွေ အမေရိကန်ဒေါ်လာ (၁၄.၃) သန်းလက်ခံရရှိခဲ့သည့်အနက် အမေရိကန်ဒေါ်လာ (၁၀.၃)သန်းကို မြန်မာနိုင်ငံတွင် ဖြစ်ပွားလျက်ရှိသော ပဋိပက္ခများ အကြမ်းဖက်မှုများနှင့် သဘာဝဘေးအန္တရာယ်များကြောင့် ထိခိုက်ခံစားရသော လူဦးရေ (၄၀၀,၀၀၀) ကျော်အတွက် ပြည်တွင်းနှင့် နိုင်ငံတကာမှ လူသားချင်းစာနာမှုဆိုင်ရာ အကူအညီပေးရေး အဖွဲ့အစည်းများမှတစ်ဆင့် ပံ့ပိုးပေးထားကြောင်း သိရသည်။

Tachileik News Agency
Photo:OCHA