~~~~~~~~⊰❂ Unicode Version ❂⊱~~~~~~~~

အဆိုပါ ဟောပြောပွဲကို ၂၀၁၉ ခုနှစ်၊ ဧပြီလ (၇)ရက်နေ့ နံနက် (၁၀)နာရီမှစတင်၍ ကျင်းပရာ နားမွန်းကျေးရွာ (၁/၂/၃)မှ အမျိုးသား (၄၀)ဦးနှင့် အမျိုးသမီး (၈၀)ဦး တက်ရောက်ကြကြောင်း သိရသည်။

တာချီလိတ်ခရိုင်အတွင်း ကျေးရွာများတွင် ကျေးရွာတွင်နေထိုင်သူအချင်းချင်း၊ လူမျိုးတူပွဲစားများက တရုတ်နိုင်ငံသို့ ပို့ဆောင်ပေးမည်ဟု စည်းရုံး၍ လည်းကောင်း၊ တရုတ်အမျိုးသားများနှင့် လက်ထပ်ရန် လည်းကောင်း စည်းရုံး၍ လူကုန်ကူးမှုများဖြစ်ပွားလေ့ရှိကြောင်းကို လူကုန်ကူးမှုတားဆီးနှိမ်နင်းရေး ရဲတပ်ဖွဲ့၊ တပ်ဖွဲ့စိတ်(၁)တာချီလိတ်မှ တပ်ဖွဲ့စိတ်မှူး ရဲမှူးရင်ရင်အေးနှင့် ရဲအုပ် လှဘုန်းတို့က ယခင်ဖြစ်ပွားခဲ့သည့်ဖြစ်စဉ်များဖြင့် ရှင်းလင်းအသိပေးခဲ့ကြောင်း သိရသည်။

တာချီလိတ်မြို့နယ်အတွင်း အမျိုးသမီးငယ်တစ်ဦးအား တရုတ်နိုင်ငံသားက လက်ထပ်ခေါ်ဆောင်သွားရန် ကြိုးစားမှု ၂၀၁၉ ခုနှစ်၊ မတ်လအတွင်းကဖြစ်ပွားရာ လူကုန်ကူးမှုတားဆီးနှိမ်နှင်းရေးအဖွဲ့ထံ အချိန်မီသတင်းပေးပို့သဖြင့် တရုတ်နိုင်ငံသား (၂)ဦးနှင့် တရုတ်နိုင်ငံသားများ ခေါ်ဆောင်လာကာ ချိတ်ဆက်ဆောင်ရွက်ပေးသည့် မြန်မာအမျိုးသမီးတို့ကို ဖမ်းဆီးအရေးယူနိုင်ခဲ့ခြင်းဖြစ်သည်။

လူကုန်ကူးမှုတားဆီးနှိမ်နှင်းရေးရဲတပ်ဖွဲ့၏စာရင်းအရ ရှမ်းပြည်နယ်အတွင်း ၂၀၁၉ ခုနှစ်၊ မတ်လတွင် လူကုန်ကူးမှု (၆) မှုကို အမှုဖွင့်စစ်ဆေးခဲ့ရကြောင်းသိရပြီး လူကုန်ကူးမှုနှင့်ပတ်သက်၍ တိုင်ကြားလိုပါက လူကုန်ကူးမှုတားဆီးနှိမ်နင်းရေးရဲတပ်ဖွဲ့၏ သတင်းလက်ခံရေးဌာန ဖုန်း ဝ၉၄၉၅၅၅၆၆၆. ဝ၉၄၉၅၅၅၇၇၇. ဝ၉၄၉၅၅၅၈၈၈. ဝ၉၄၉၅၅၅၉၉၉ သို့ ဆက်သွယ်တိုင်ကြားနိုင်ကြောင်း သိရသည်။

မိသားစုတစ်စု ကလေးတစ်ဦးစီမံချက်အကောင်အထည်ဖော်ခဲ့သည့် တရုတ်နိုင်ငံတွင် သတို့သမီးလိုအပ်ချက်မြင့်နေသည့် အိမ်နီးချင်းနိုင်ငံများမှ အမျိုးသမီးများကို တရုတ်အမျိုးသားများနှင့် လက်ထပ်ရန် လူကုန်ကူးမှုများ၊ တရုတ်အမျိုးသားများက အိမ်နီးချင်းနိုင်ငံများသို့ သွားရောက်၍ သတို့သမီးရှာဖွေလက်ထပ် ခေါ်ဆောင်သွားကာ ပြန်လည်ရောင်းချမှုများ ဖြစ်ပွားနပြေီး မြန်မာအမျိုးသမီးများ တရုတ်နိုင်ငံသို့ လူကုန်ကူးခံရမှုမှာလည်း မြင့်မားနေဆဲဖြစ်ကြောင်း လူကုန်ကူးမှုတားဆီးနှိမ်နှင်းရေးရဲတပ်ဖွဲ့ထံမှ သိရသည်။

Tachileik News Agency
ဓာတ်ပုံ - လူကုန်တား