~~~~~~~~⊰❂ Unicode Version ❂⊱~~~~~~~~

တာချီလိတ်မြို့နယ်အတွင်း လေပြင်းတိုက်ခတ်မှုနှင့် မိုးသီးကြွေကျမှုကြောင့် နေအိမ် (၂၄) လုံးပြိုလဲပြီး နေအိမ် (၄၀) လုံးထိခိုက်ပျက်စီး
*************
ရှမ်းပြည်နယ်အရှေ့ပိုင်း၊ တာချီလိတ်မြို့နယ်အတွင်း ၂၀၁၉ ခုနှစ်၊ ဧပြီလ (၂၃) ရက်နေ့ ညနေ (၅) နာရီခွဲ အချိန်ခန့်က မိုးသက်လေပြင်းနှင့် မိုးသီးကျမှုကြောင့် လွယ်တော်ခမ်းကျေးရွာအုပ်စုတွင် ထိခိုက်ပျက်စီးမှု အများဆုံးဖြစ်ပွားပြီး နေအိမ် (၂၄)လုံး ပြိုလဲသွားကာ နေအိမ် (၄၀) လုံး ထိခိုက်ပျက်စီးသွားကြောင်း သိရသည်။

"ဒီပျက်စီးမှုက တာချီလိတ်မြို့နယ် တစ်မြို့နယ်လုံးဗျ။ ဒီ (၄) ရွာကတော့ တော်တော်ထိသွားတာပေါ့။ ကျန်တာတွေကတော့ သွပ်လန်တာလေး ဘာလေးတော့ ရှိကောင်း ရှိမှာပေါ့။ အဲဒါလေးတွေကျတော့လည်း သူတို့အစီအစဉ်နဲ့သူတို့ မည်ကာမတ္တဟာလေးတွေကျတော့ ပြန်လုပ်ကြတာပေါ့။ ဒါကတော့ ကြီးကြီးမားမား ဖြစ်တဲ့ဟာလေးတွေကို စာရင်းပြုစုထားပြီး ခရိုင်ကိုတင်ပြထားတာပေါ့"ဟု ဒုတိယ မြို့နယ်အုပ်ချုပ်ရေးမှူး ဦးမင်းအောင်က တာချီလိတ်သတင်းအေဂျင်စီသို့ ပြောသည်။

တာချီလိတ်မြို့နယ်အတွင်း လေပြင်းတိုက်ခတ်မှုနှင့် မိုးသီးကြွေကျမှုကြောင့် လွယ်တော်ခမ်းကျေးရွာအုပ်စုရှိ စန်းလု(အထက်)ရွာ၊ ဂျောပရွာ၊ ဟွေဟုန်ရွာ၊ ဖတ်ဟိ(အထက်)ရွာနှင့် ပါသားရွာတို့တွင် ထရံကာ/ သက်ကယ်မိုး၊ ထရံကာ/သွပ်မိုးအိမ် (၂၄) လုံးပြိုကျခဲ့ပြီး မူလွန်ကျောင်း (၁) ကျောင်းအပါအဝင် လူနေအိမ်များ အမိုးလန်ပျက်စီးခဲ့သဖြင့် ပျက်စီးဆုံးရှုံးမှုအများဆုံးဖြစ်သွားကြောင်း သိရသည်။

ဝမ်ကောင်းရပ်ကွက်၊ ပုန်းထွန်ရပ်ကွက်၊ မကာဟိုခမ်းရပ်ကွက်နှင့် မိုင်းဖုန်း(က) ကျေးရွာအုပ်စုတို့တွင်လည်း ဘုန်းကြီးကျောင်း (၁) ကျောင်းနှင့် လူနေအိမ်များမှ သွပ်မိုးများ၊ အုတ်ကြွတ်မိုးများ ကွာကျခဲ့ကြောင်း သိရသည်။

လေပြင်းတိုက်ခတ်မှုနှင့် မိုးသီးကြွေကျမှုကြောင့် ပျက်စီးဆုံးရှုံးမှုစာရင်းကို ရပ်/ကျေးအုပ်ချုပ်ရေးရုံးများမှ တစ်ဆင့် တင်ပြလာသည့်စာရင်းများအရ မြို့နယ်အတွင်း နေအိမ် (၂၄) လုံးပြိုကျပြီး သွပ်ချပ်ရေ (၈၄၇) ချပ်နှင့် အုတ်ကြွတ် (၈၀) ချပ်ကွာကျမှုဖြစ်ပွားကာ ဆုံးရှုံးမှုတန်ဖိုး ကျပ်(၁၃၉)သိန်းကျော်ရှိကြောင်း သိရသည်။

တာချီလိတ်ရွှေတိဂုံစေတီတွင်လည်း နားနေဆောင်အချို့ပြိုလဲခဲ့သဖြင့် ရှင်းလင်းဖယ်ရှားခဲ့ပြီး ကြီးမားသည့်ပျက်စီးမှုမရှိသဖြင့် ပျက်စီးဆုံးရှုံးစာရင်းတွင်ပါဝင်ခြင်းမရှိကြောင်း သိရသည်။

သတင်း #ဟန်စိုးထိုက်