~~~~~~~~⊰❂ Unicode Version ❂⊱~~~~~~~~

ရဲတပ်ဖွဲ့မှ သေနတ် (၁၁)လက်ခိုးယူရောင်းချသည့် ရဲအရာရှိ (၁) ဦးနှင့် အရပ်သား(၄)ဦးကို ဖမ်းဆီးထား
****************
ထိုင်းရဲတပ်ဖွဲ့သုံး သေနတ် (၁၁)လက်ခိုးရောင်းမှုနှင့်ပတ်သက်၍ သံသယရှိသည့် ရဲအရာရှိတစ်ဦးနှင့် အရပ်သား (၄)ဦး စုစုပေါင်း (၅)ဦးကို ထိန်းသိမ်းလိုက်ကြောင်း ၂၀၁၉ ခုနှစ်၊ ဖေဖေါ်ဝါရီလ (၂၈)ရက်နေ့တွင် ရဲတပ်ဖွဲ့က သတင်းထုတ်ပြန်လိုက်ကြောင်း ဘန်ကောက်ပို့စ်သတင်းတွင် ဖေါ်ပြထားသည်။

အယုဒ္ဓရဲတပ်ဖွဲ့မှ ပျောက်ဆုံးသွားသည့် ပစ္စတိုများကို ရောင်းချမှုဖြင့် အဆိုပါ (၅)ဦးကို စစ်ဆေးနေပြီး ရဲအရာရှိထံမှ သေနတ်တစ်လက်လျှင် ဘတ် (၂၀၀၀၀)မှ (၂၈၀၀၀)အထိပေး၍ ဝယ်ယူထားခြင်းဖြစ်သည်ဟု ထွက်ဆိုကြောင်း သိရသည်။

ရဲတပ်ဖွဲ့က ဖမ်းဆီးထားသူများ၏အမည်များကို ထုတ်ဖေါ်ပြောကြားခြင်းမရှိသေးဘဲ ကွင်းဆက်တရားခံများကို စုံစမ်းနေဆဲဖြစ်ကြောင်း သိရသည်။

ရဲတပ်ဖွဲ့မှ ပျောက်ဆုံးသွားသည့် သေနတ် (၁၁)လက်ကို ပြန်လည်ရရှိထားပြီဟုဆိုသော်လည်း အသေးစိတ်အချက်အလက်များ ထုတ်ပြန်ထားခြင်းမရှိသေးကြောင်း သိရသည်။

ဘန်ကောက်တွင် ဖေဖေါ်ဝါရီလ (၁၄)ရက်နေ့က ဖမ်းဆီးမှုအတွင်း ရဲတပ်ဖွဲ့သုံး သေနတ်ကို တွေ့ရှိရသဖြင့် ဆက်လက်စုံစမ်းရာမှ ဖေါ်ထုတ်နိုင်ခဲ့ခြင်းဖြစ်ကြောင်း သိရသည်။

အဆိုပါ သေနတ်များမှာ  ထိုင်းတော်ဝင်ရဲတပ်ဖွဲ့အား လက်နက်များ အဆင့်မြှင့်တင်ရန် ၂၀၁၅ ခုနှစ်က ညွှန်ကြားချက်အရ ၂၀၁၇ ခုနှစ်တွင် အသစ်လဲလှယ်တပ်ဆင်ပေးထားသည့် Sig Sauer P320SP တစ်သိန်းခွဲမှ သေနတ်များဖြစ်ကြောင်း သိရသည်။

အဆိုပါ အဖြစ်အပျက်ကြောင့် ထိုင်းနိုင်ငံတွင်းမှ ရဲစခန်းများအားလုံးက လက်နက်များ စိစစ်ပြီး မတ်လ (၁၅)ရက်နေ့ နောက်ဆုံးထား၍ သတင်းတင်ပြကြရန် ညွှန်ကြားထားကြောင်း သိရသည်။

Tachileik News Agency
Photo: Bangkok Post တွင် ဖေါ်ပြထားသည့်၂၀၁၇ စက်တင်ဘာလက ထိုင်းတော်ဝင်ရဲတပ်ဖွဲ့ထံ ပေးအပ်မည့် ig Sauer P320SP ပစ္စတိုများဖြစ်သည်။