~~~~~~~~⊰❂ Unicode Version ❂⊱~~~~~~~~

မီးခိုးမြူလျှော့ချရန် ကြိုးစားနေသည့် ထိုင်းနိုင်ငံအတွင်း သတင်းဖေါ်ပြခံလို၍ တောမီးရှို့သည့်လူငယ်ကို ဖမ်းဆီးထား
**************
ထိုင်းနိုင်ငံ၊ ချင်းရိုင်းခရိုင်အတွင်း မြန်မာ - ထိုင်းနယ်စပ်တလျှောက်ရှိ သစ်တောများအတွင်း မီးရှို့မှုဖြင့် ဖမ်းဆီးခံရသည့် အသက် (၂၂)နှစ်အရွယ် နိုင်ငံမဲ့လူငယ်တစ်ဦးက စိုက်ပျိုးမြေအတွက် မီးရှို့ခြင်းမဟုတ်ဘဲ သတင်းတွင် ဖေါ်ပြခံလို၍ မီးရှို့ခြင်းဖြစ်သည်ဟု ထွက်ဆိုထားကြောင်း သိရသည်။

မီးခိုးမြူထူထပ်နေသဖြင့် ချင်းရိုင်းခရိုင်အတွင်း ဖေဖေါ်ဝါရီလ (၁၅)ရက်နေ့မှ
ဧပြီလ (၁၅)ရက်နေ့အထိ မီးရှို့ခြင်းများ မပြုလုပ်ကြရန် တားမြစ်ထားသော်လည်း တောမီးရှို့သူရှိနေကြောင်း ဒေသခံများ၏သတင်းပေးချက်အရ သက်ဆိုင်ရာဌာနများက ဖမ်းဆီးရမိလိုက်ခြင်းဖြစ်ကြောင်း သိရသည်။

အဆိုပါလူငယ်က နယ်စပ်အနီး သစ်တောများရှိ မြက်ခြောက်များအတွင်း စီးကရက်ကိုပစ်ထည့်ကာ မီးလောင်ကျွမ်းစေရန် ပြုလုပ်ပြီး မီးရှို့ခြင်းဖြစ်ကာ စိုက်ပျိုးမြေအတွက်မဟုတ်ဘဲ သတင်းတွင် ဖေါ်ပြခံလို၍ မီးရှို့ခြင်းဖြစ်သည်ဟု ရဲတပ်ဖွဲ့ကို ဖြေကြားထားကြောင်း သိရသည်။

ဒေသတွင်း စိုက်ပျိုးမြေအတွက် မီးရှို့သည့်ဓလေ့များကြောင့် မီးခိုးမြူများပိတ်နေကာ ချင်းရိုင်းခရိုင်အတွင်း လေထုအရည်အသွေးကျဆင်းနေသဖြင့် မီးခိုးမြူလျှော့ချရေး နည်းလမ်းပေါင်းစုံဖြင့် ကြိုးစားနေရဆဲဖြစ်ပြီး မြန်မာဘက်ခြမ်းရှိ တာချီလိတ်မြို့တွင်လည်း မီးခိုးမြူများပိတ်နေသဖြင့် လေယာဉ်ခရီးစဉ်အချို့ဖျက်သိမ်းခဲ့ရသည့်အပြင် လေထုအရည်အသွေးတိုင်းတာသည့်စက်ဖြင့်ပါ စောင့်ကြည့်နေရခြင်းဖြစ်သည်။

Tachileik News Agency
Ref:DailyNewsThailand