~~~~~~~~⊰❂ Unicode Version ❂⊱~~~~~~~~

ထိုင်းနိုင်ငံရှိ မြန်မာဒုက္ခသည်စခန်းမီးလောင်မှုမှာ ပြောင်းဖူးကင်ရာမှ စတင်လောင်ကျွမ်းခြင်းဖြစ်ကြောင်း စစ်ဆေးတွေ့ရှိ
*************
မြန်မာနိုင်ငံနှင့်နယ်စပ် ထိုင်းနိုင်ငံ တာ့ခ်ခရိုင်ရှိ အုန်းဖန်ရှိ မြန်မာဒုက္ခသည်စခန်းအတွင်း အိမ်ခြေ (၁၀၀)နီးပါး ပျက်စီးသွားသည့် မီးလောင်မှုဖြစ်ပွားရခြင်းမှာ ပြောင်းဖူးကင်ရာမှ အိမ်အမိုးထိ မီးတောက်တက်သွားကာ စတင်လောင်ကျွမ်းသွားခြင်းဖြစ်ကြောင်း ရဲတပ်ဖွဲ့က သတင်းထုတ်ပြန်သည်ဟု ထိုင်းနိုင်ငံ The Nation သတင်းတွင် ဖေါ်ပြထားသည်။

မြန်မာဒုက္ခသည်စခန်းတစ်ခုဖြစ်သည့် နို့ဖိုးဒုက္ခသည်စခန်းတွင် ၂၀၁၉ ခုနှစ် မတ်လ (၄)ရက်နေ့ နေ့လယ် (၁)နာရီ (၄၀)မိနစ်ဝန်းကျင်က မီးလောင်ကျွမ်းမှုဖြစ်ပွားခဲ့ပြီးနောက် တာဝန်ရှိသူများက မီးလောင်ကျွမ်းရသည့် အကြောင်းရင်းသိရှိရန် သက်သေအထောက်အထားရှာဖွေစစ်ဆေးမှုကို ပြုလုပ်ခဲ့ခြင်းဖြစ်ကြောင်း သိရသည်။

တစ်နာရီကျော်ကြာမြင့်ခဲ့သည့် မီးလောင်ကျွမ်းမှုကြောင့် ဒုက္ခသည်စခန်း ဇုန် 16A နှင့် ဇုန် 16 B ရှိ တဲအိမ်အလုံးရေ (၁၀၀) ဆုံးရှုံးသွားပြီး လူဦးရေ (၃၀၀)နီးပါးမှာ အိုးအိမ်မဲ့ဖြစ်သွားရကြောင်း သိရသည်။

နေအိမ်မီးထဲပါသွားသူအများစုမှာ စခန်းတာဝန်ရှိသူများနှင့် စခန်းလုံခြုံရေးတာဝန်ယူထားသည့် တပ်ဖွဲ့တို့က နေရာချထားပေးသည့် ယာယီတဲများတွင် နေထိုင်နေကြပြီး အချို့မှာ မိသားစု၊ ဆွေမျိုးများထံ သွားရောက်နေထိုင်နေကြကြောင်း သိရသည်။

ပျက်စီးသွားသည့်နေအိမ်များ ပြန်လည်ဆောက်လုပ်ပေးရန် ကုလသမဂ္ဂ ဒုက္ခသည်များဆိုင်ရာ မဟာမင်းကြီးများရုံးက စီစဉ်နေကြောင်း သိရသည်။

မီးလောင်ကျွမ်းချိန်တွင် စခန်း၌ မီးငြိမ်းသတ်ရန် ရေအလုံအလောက်မရှိမှုနှင့် မီးသတ်ဗူးများမရှိသည့်အတွက် ငြှိမ်းသတ်နိုင်ခြင်းမရှိခဲ့ကြောင်း စခန်းတွင် နေထိုင်သူများက ပြောဆိုကြောင်း သိရသည်။

Tachileik News Agency
Ref: The Nation