~~~~~~~~⊰❂ Unicode Version ❂⊱~~~~~~~~

1ကျိုင်းတုံသို့ မိုင်းလားမှ တင်သွင်းလာသည့် အကောက်ခွန်မဲ့ တရုတ်စီးကရက်များ ဖမ်းမိ
****************
ရှမ်းပြည်နယ်အရှေ့ပိုင်း၊ ကျိုင်းတုံမြို့သို့ တရုတ်နိုင်ငံမှ အကောက်ခွန်မဲ့တင်လာသည့် စီးကရက်များကို မိုင်းလားမြို့မှ သယ်လာစဉ် ဖမ်းဆီးရမိထားသဖြင့် အကောက်ခွန်ဥပဒေဖြင့် အမှုဖွင့်စစ်ဆေးနေကြောင်း သိရသည်။

ကျိုင်းတုံမြို့သို့ မိုင်းလားဘက်မှ ဝင်လာသည့် လမ်းကြောင်း၌ စစ်ဆေးသည့် ဝမ်တာပုံ ပူးပေါင်း စစ်ဆေးရေး စခန်းတွင် ၂၀၁၉ ခုနှစ်၊ ဖေဖေါ်ဝါရီလ (၂၇)ရက်နေ့ နံနက် (၁၀)နာရီအချိန်က  မိုင်းလားဘက်မှလာသည့် (၆)ဘီးယာဉ်အားစစ်ဆေးရာ တင်သွင်းခွင့်အထောက်အထားမပါသည့် တရုတ်နိုင်ငံထုတ် Hongtashan တံဆိပ် စီးကရက်ဖာ(၁၁၃)ဖာ၊ Yun Yan တံဆိပ်ပါ စီးကရက်ဖာ (၁၀၁)ဖာ၊ Hong He တံဆိပ်ပါ စီးကရက်ဖာ(၈၇)ဖာ၊ စုစုပေါင်း(၃၀၁)ဖာအား စစ်ဆေးတွေ့ရှိခဲ့ရခြင်းဖြစ်ကြောင်း သိရသည်။
အကောက်ခွန်မဲ့ပစ္စည်းများ သယ်ဆောင်လာသည့် ယာဉ်မောင်း ဇော်ထွန်းအောင်နှင့် အဆိုပါယာဉ်တွင် အတူလိုက်ပါလာသူ စိုင်းအောင်မြင့်တို့အား ကျိုင်းတုံမြို့မရဲစခန်းတွင် အမှုဖွင့်စစ်ဆေးနေကြောင်း သိရသည်။

တရုတ်နိုင်ငံနှင့် ကုန်သွယ်မှုလမ်းကြောင်းဖြစ်သည့် ကျိုင်းတုံ - မိုင်းလားလမ်းကြောင်းမှ ဝမ်တာပင်းဂိတ်ကို ၂၀၁၆ ခုနှစ် အောက်တိုဘာလ (၂၁)ရက်နေ့မှစ၍ မိုင်းလားဘက်မှ စတင်ပိတ်လိုက်ပြီးနောက် အဆိုပါကုန်သွယ်ရေးလမ်းကြောင်းမှာ ယနေ့အထိ ပြန်လည်ဖွင့်လှစ်ခြင်းမရှိသေးသည့်အတွက် ကျိုင်းတုံမှ မိုင်းလားနှင့် တရုတ်နိုင်ငံ နယ်စပ်သို့ ဆက်သွယ်သည့် တစ်ခုတည်းသော တရားဝင်ဖွင့်ထားသည့် လမ်းကြောင်းအဖြစ် မိုင်းခတ် - ကျိုင်းတုံလမ်းမှ ကုန်သွယ်မှုများအား ဝမ်တာပုံစစ်ဆေးရေးစခန်းတွင် စစ်ဆေးလေ့ရှိခြင်းဖြစ်သည်။

ကျိုင်းတုံမြို့တွင် မိုင်းလားဘက်မှ ဝင်လာသည့် လမ်းကြောင်း၌ စစ်ဆေးသည့် ဝမ်တာပုံ ပူးပေါင်း စစ်ဆေးရေး စခန်း၊ တောင်ကြီးဘက်မှ ဝင်လာသည့် လမ်းကြောင်း၌ စစ်ဆေးသည့် ကျိုင်းဖေါင်း ပူးပေါင်းစစ်ဆေးရေးစခန်းနှင့် တာချီလိတ်ဘက်မှ ဝင်လာသည့် လမ်းကြောင်း၌ စစ်ဆေးသည့် နောင်နွန်းပူးပေါင်းစစ်ဆေးရေး စခန်း၊ လက်ရှိတွင် အသုံးပြုခွင့် ပိတ်ထားသည့် မိုင်းလားနှင့် ဆက်သွယ်သည့် လမ်းကြောင်းမှ ဝမ်တာပင်းပူးပေါင်းစစ်ဆေးရေးစခန်းများဖြင့် ကုန်သွယ်မှု လမ်းကြောင်းများအား စစ်ဆေးနေခြင်းဖြစ်သည်။

Tachileik News Agency