~~~~~~~~⊰❂ Unicode Version ❂⊱~~~~~~~~

ချင်းမိုင်တွင် လေထုညစ်ညမ်းမှု ကမ္ဘာတွင်အမြင့်ဆုံးဖြစ်လာနေပြီး မြန်မာနှင့် လာအိုအထိပါ ထိခိုက်ခံစားနေရ
**************
ထိုင်းနိုင်ငံ ချင်းမိုင်ဒေသတွင် စိုက်ပျိုးရာသီ မီးရှို့ရှင်းလင်းမှုများကြောင့် မီးခိုးမြူထူထပ်စွာဖုံးလွှမ်းလာရာ ကမ္ဘာတွင် လေထုညစ်ညမ်းမှု အမြင့်ဆုံးဖြစ်လာနေပြီး မီးခိုးများမှာ အိမ်နီးချင်း မြန်မာနှင့် လာအိုနိုင်ငံများအထိပါ ပျံ့နှံ့နေကြောင်း သိရသည်။

ချင်းမိုင်၏လေထုအရည်အသွေးမှာ ဆိုးရွားစွာကျဆင်းလာနေကာ ကျန်းမာရေးထိခိုက်သည့်အဆင့်ထိ ရောက်ရှိနေပြီး မြန်မာနိုင်ငံ တာချီလိတ်နှင့် နယ်နမိတ်ချင်းထိစပ်နေသည့် ချင်းရိုင်း၊ မယ်ဆိုင်ဒေသ၏ လေထုအရည်အသွေးကျဆင်းမှုမှာ အဆိုးဆုံးဖြစ်နေကြောင်း သိရသည်။

ဒေသတွင်း စိုက်ပျိုးရေးအတွက် တောင်ယာမီးရှို့ခြင်းနှင့် စိုက်ခင်းများရှင်းလင်းရာတွင် မီးရှို့သည့်ဓလေ့အတွက် အစိုးရ၏ပညာပေးအစီအစဉ်အောင်မြင်နေမှုကို မီးခိုးဖုံးလွှမ်းနေသည့်ကောင်းကင်က သက်သေပြနေသည်ဟု Seub Nakhasathien Foundation  ၏ ဒုဥက္ကဌဖြစ်သူက မှတ်ချက်ပြုလိုက်ပြီး အစိုးရအနေဖြင့် တောင်ယာမီးစတင်ရှို့သည့် တောင်သူများကို ဖမ်းဆီးခြင်း၊ မီးငြှိမ်းသတ်ခြင်းစသည့် ထိရောက်သည့် လုပ်ဆောင်မှုများဖြင့် မီးခိုးဖုံးလွှမ်းမှုကို လျှော့ချသင့်ပြီဟု ထောက်ပြပြောဆိုလိုက်သည်။

ထိုင်းနိုင်ငံအတွင်း တောင်ယာနှင့်စိုက်ပျိုးမြေများတွင် မီးရှို့ခြင်းများကြောင့် ယခုနှစ်အတွင်း မြို့တော် ဘန်ကောက်အပါအဝင် နိုင်ငံအတွင်း မီးခိုးမြူဖုံးလွှမ်းမှုပိုဆိုးလာရာ ကျောင်းများပိတ်ရခြင်း၊ လေကြောင်းခရီးစဉ် ရွှေ့ဆိုင်းရခြင်းများပါ ဖြစ်ပွားခဲ့ခြင်းဖြစ်သည်။

နိုင်ငံတွင်းသာမက အိမ်နီးချင်းနိုင်ငံများအထိပါ ခံစားနေရပြီး မီးခိုးထူထပ်စွာဖုံးလွှမ်းမှုကို ထိုင်းအစိုးရအနေဖြင့် ရေဖျန်းခြင်းမှလွဲ၍ ထိရောက်သည့်ဖြေရှင်းမှု မလုပ်ဆောင်နိုင်၍ ဝေဖန်မှုများထွက်ပေါ်နေသည်ကို တွေ့ရသည်။

ထိုင်းနိုင်ငံမြောက်ပိုင်းဒေသတွင် စိုက်ပျိုးရာသီဖြစ်သည့် ဇန်နဝါရီမှ ဧပြီလအထိ တောင်သူများက စိုက်ခင်းများတွင် မီးရှို့မှုကြောင့် မီးခိုးဖုံးလွှမ်းသည့်ဒဏ်ကို ဆယ်စုနှစ်နှင့်ချီ၍ ကြုံတွေ့ခံစားနေရပြီး တောမီးလောင်ကျွမ်းနိုင်ချေမြင့်တက်မှုနှင့်ပါ ကြုံနေရခြင်းဖြစ်ကြောင်း သိရသည်။

နိုင်ငံအတွင်း အများအပြားရှိသည့် ကြံစိုက်ခင်းများကလည်း မီးရှို့မှုအများအပြားလုပ်လေ့ရှိရာ စိုက်ပျိုးရေးဘဏ်နှင့် ချိတ်ဆက်ထားသည့် တောင်သူအဖွဲ့အစည်းများမှတစ်ဆင့် ကြံစိုက်တောင်သူများ ကြံရိတ်စက်အသုံးပြုနိုင်ရန် အရစ်ကျရောင်းချပေးမည့်စနစ်ကို စိုက်ပျိုးရေးဝန်ကြီးဌာနက အကြံပြုထားကြောင်းလည်း သိရသည်။

ထိုင်းနိုင်ငံမြောက်ပိုင်းဒေသတွင် စိုက်ပျိုးရာသီ၌ မီးခိုးမြူဖုံးလွှမ်းမှုလျှော့ချရေးအတွက် ဒေသတွင်းလူထုအား တောင်ယာမီး၊ စိုက်ခင်းရှင်းလင်းခြင်းများတွင် မီးရှို့ခြင်းများ မပြုလုပ်ရန် ပညာပေးအစီအစဉ်လုပ်လေ့ရှိသော်လည်း မီးခိုးဖုံးလွှမ်းသည့်ပြဿနာကို နှစ်စဉ်ရင်ဆိုင်နေရခြင်းဖြစ်သည်။

ထိုင်းနိုင်ငံ၏ လေထုအရည်အသွေးကျဆင်းလာမှုက ပျမ်းမျှ လူ့သက်တမ်း (၄)နှစ်အထိ လျော့ကျသွားသည်ဟု လေ့လာသူများကဆိုသည်။

Tachileik News Agency
Ref: Bangkok Post