~~~~~~~~⊰❂ Unicode Version ❂⊱~~~~~~~~

လေထုညစ်ညမ်းမှုဆိုးရွားစွာရင်ဆိုင်နေရသည့် ထိုင်းနိုင်ငံမြောက်ပိုင်းဒေသကို အရေးပေါ်အခြေအနေ ကြေညာပေးရန် အစိုးရအား တောင်းဆိုလိုက်ပြီး N 95 နှာခေါင်းစည်းများ လှူဒါန်းရန် လူထုအား တိုက်တွန်း
**************
အချိန်ကာလကြာမြင့်စွာ မီးခိုးမြူထူထပ်စွာဖုံးလွှမ်းနေသည့် ထိုင်းနိုင်ငံ၊ မြောက်ပိုင်းဒေသတွင် လေထုညစ်ညမ်းမှု အဆိုးရွားဆုံး ရင်ဆိုင်နေရသဖြင့် အစိုးရအနေဖြင့် အရေးပေါ်အခြေအနေ ကြေညာပေးရန် တောင်းဆိုလိုက်ပြီး ချင်းမိုင်တွင်လည်း N 95 နှာခေါင်းစည်းများ အရေးပေါ်လှူဒါန်းကြရန် ဒေသတာဝန်ရှိသူများက တိုက်တွန်းထားသည်။

နိုင်ငံတွင်းနှင့် အိမ်နီးချင်းမြန်မာနိုင်ငံတို့မှ တောင်ယာမီးရှို့မှုများကြောင့် လေစီးကြောင်းသင့်ရာ ချင်းမိုင်တွင် ကာလရှည်ကြာ မီးခိုးမြူထူထပ်စွာဖုံးလွှမ်းနေရာ အသက်ရှုလမ်းကြောင်းဆိုင်ရာရောဂါများ ကာကွယ်ရေးအတွက် နှာခေါင်းစည်း (၁.၄)သန်းကို ဒေသခံများထံ ဖြန့်ဝေပေးထားပြီးဖြစ်ကြောင်း သိရသည်။

လေထုအတွင်း အမှုန်ပါဝင်မှုပမာဏများလွန်းသဖြင့် ပုံမှန်အသုံးပြုနေသည့် နှာခေါင်းစည်းများက လုံလောက်စွာ ကာကွယ်ပေးနိုင်မည်မဟုတ်သဖြင့် N 95 နှာခေါင်းစည်းများ ပါဝင်လှူဒါန်းကြရန် ဒုတိယမြို့အုပ်ချုပ်ရေးမှူးက တိုက်တွန်းထားသည်။

ဒေသတွင်း တောင်ယာမီးရှို့မှုများကြောင့် တောမီးလောင်မှုများ၊ တောင်ယာမီးရှို့မှုများကို စစ်တပ်မှ ကယ်ဆယ်ရေးအဖွဲ့က ရှာဖွေငြှိမ်းသတ်ပေးခြင်းတို့ကို ဆောင်ရွက်နေကြောင်းသိရသည်။

လူထုအနေဖြင့် ဖြစ်နိုင်သမျှ အိမ်တွင်းနေကြရန် အသိပေးတိုက်တွန်းထားပြီး N 95 နှာခေါင်းစည်းများ လှူဒါန်းနိုင်မည့်နေရာကိုလည်း ဖွင့်လှစ်ပေးသွားမည်ဖြစ်ကြောင်း သိရသည်။

ချင်းမိုင်မှ မယ်ဆိုင်အထိ ထိုင်းနိုင်ငံမြောက်ပိုင်းဒေသတွင် မီးခိုးမြူကာလရှည်ဖုံးလွှမ်းပြီး လေထုညစ်ညမ်းမှုများကြောင့် ဒေသတွင်း လာရောက်လည်ပတ်သူအရေအတွက် ကျဆင်းသွားကာ ခရီးသွားလုပ်ငန်းအပေါ် ထိခိုက်နေပြီး မီးခိုးမြူများကြောင့် လေကြောင်းခရီးစဉ်များကိုလည်း မကြာခဏ ရွှေ့ဆိုင်း၊ ဖျက်သိမ်းနေရခြင်းဖြစ်သည်။

မီးခိုးမြူဖုံးလွှမ်းမှုကို နိုင်ငံအတွင်း နှစ်စဉ်ပြင်းထန်စွာ ခံစားနေရသော်လည်း ထိရောက်သည့်ဖြေရှင်းကိုင်တွယ်မှု မလုပ်ဆောင်နိုင်သဖြင့် တာဝန်ရှိသူများအား ဝေဖန်မှုများလည်း မြင့်တက်နေခြင်းဖြစ်သည်။

Tachileik News Agency
Ref:The Nation & Bangkok Post