~~~~~~~~⊰❂ Unicode Version ❂⊱~~~~~~~~

ဖြစ်စဉ်မှာ ဦးကျော်ဇေယျ မောင်းနှင်ပြီး မိသားစုလိုက် ပါလာသော ကားသည် မုံရွာမြို့ဘက်မှ ရွှေစက်တော်သို့ ဘုရားဖူးရန် အတွက် ပုသိမ် - မုံရွာလမ်းအတိုင်း မောင်းနှင်လာခဲ့ရာ ဖေဖော်ဝါရီလ(၁၈)ရက် နံနက် (၇)နာရီဝန်းကျင်တွင် ရွှေစက်တော်ဘုရားအဝင်လမ်းသို့ ရောက်ရှိလာခဲ့သော်လည်း လမ်းမှားပြီး ဆက်လက် မောင်းနှင်လာခဲ့မိရာ ပန်းတောင်းကျေးရွာ ရွှေစက်တော်အဝင်(၈)မိုင်လမ်းအနီးသို့ အရောက်တွင် ကျောက်ခင်းနေသည့် လမ်းလုပ်သားများကို တွေ့လိုက်ရ၍ ကားကို ဘရိတ်အုပ် လိုက်သော်လည်း အရှိန်မထိန်းနိုင်ဖြစ်ပြီး လမ်းခင်းလုပ်သားများကို ဝင်တိုက်ကာ လမ်း၏ ယာဘက်ခြမ်းသို့ ထိုးကျသွားခဲ့ခြင်းဖြစ်ကြောင်း ရဲတပ်ဖွဲ့၏ စစ်ဆေးချက်အရသိရသည်။

“ရွှေစက်တော်ဘုရားပွဲတော် အချိန်မှာ လမ်းချဲ့တာတွေ လမ်းပြင်တာတွေ လုပ်ကြတာ အတော် အန္တရာယ် ရှိတယ်ဗျ။ ဘုရားပွဲတော် မတိုင်မီ လုပ်ကြရမယ့်ဟာ ဘာဖြစ်လို့ ပွဲတော်ရာသီအချိန်တွေကျမှ ဒီလိုလုပ်ကြ တာလဲဆိုတာ တွေးမရဘူး။ ဘာပဲဖြစ်ဖြစ် ယာဉ်တွေအနေနဲ့ကတော့ သတိထားမောင်းကြရမှာပါ”ဟု ရွှေ စက်တော်ဘုရားဖူး EXPRESS ယာဉ်မောင်း ဦးချစ်ထွန်းက တာချီလိတ်သတင်းအေဂျင်စီသို့ ပြောသည်။

အဆိုပါ ယာဉ်တိုက်မှုဖြစ်စဉ်ကြောင့် ယာဉ်ပေါ်ပါသူများမှာ ထိခိုက်မှု မရှိကြသော်လည်း လမ်းခင်းလုပ်သား များထဲမှ အသက်(၃၀)နှစ်အရွယ်ရှိ မအေးကြိုင်မှာ ဒဏ်ရာများဖြင့် အခင်း ဖြစ်နေရာတွင် သေဆုံးပြီး ကိုမြင့်ခိုင်၊ မမေသူလှိုင်၊ မသန်းယုမော်၊ မသူဇာဝင်း၊ မလှဌေးကြည်၊ ကိုကူးမောင်နှင့် မအေးသင်္ကြန် တို့မှာ ဒဏ်ရာအသီးသီး ရရှိသွား၍ ပဒါန်းတိုက်နယ်ဆေးရုံနှင့် မင်းဘူးဆေးရုံ သို့ ပို့ဆောင်ကာ ဆေးကုသမှု ခံယူလျှက်ရှိကြောင်း သိရသည်။

ယင်း ဖြစ်စဉ်နှင့်ပတ်သက်၍ ယာဉ်မောင်း ကျော်ဇေယျအား စကုနယ်မြေရဲစခန်းမှ ယာဉ်(ပ)၇/၂၀၁၉၊ ရာဇသတ်ကြီးဥပဒေပုဒ်မ ၃၀၄(က)/၃၃၇/၃၃၈ တို့ဖြင့် အမှုဖွင့် အရေးယူဆောင်ရွက်လျှက်ရှိကြောင်း သိရသည်။

သတင်း - ဖီးနစ်
ဓာတ်ပုံ - ရဲတပ်ဖွဲ့