~~~~~~~~⊰❂ Unicode Version ❂⊱~~~~~~~~

“သူက ဒီအမှုရဲ့ အမှုစစ်ပါ။ တိုက်မိပြီး ထွက်ပြေးတဲ့ယာဉ်ကို ဖမ်းမိတဲ့အတွက် ရပ်ကွက်က ချီးမြှင့်တာပါ။ အခုလို ယာဉ်ထိန်းတပ်ဖွဲ့ဝင်ကို ရပ်ကွက်ကနေ ချီးမြှင့်ပေးတာမျိုးက အရင်ကတော့ မရှိခဲ့ဖူးပါဘူး။ ဒါက ပထမဆုံးအကြိမ်ပါ”ဟု အမှတ်(၁၁၈) ယာဉ်ထိန်းရဲတပ်ဖွဲ့စု(ကျိုင်းတုံ)မှ တပ်ဖွဲ့စုမှူး ဒုရဲမှူးကျော်ဇောအောင် တာချီလိတ်သတင်းအေဂျင်စီသို့ ပြောသည်။

ကျိုင်းတုံမြို့နယ်၊ မိုင်းလပ်ကျေးရွာအုပ်စု၊ ပြည်ငြိမ်းအေးအိမ်ယာဝင်းမှ အုပ်ချုပ်ရေးမှူးနှင့် ရပ်ကွက်သူ၊ ရပ်ကွက်သားများက အဖွားအိုတစ်ဦး သေဆုံးသွားခဲ့သည့် ယာဉ်တိုက်မှုမှ တိုက်ပြေးသည့် ယာဉ်နှင့် ယာဉ်မောင်းအား ယာဉ်တိုက်မှုဖြစ်ပွားပြီး (၂၆)ရက်အကြာ ဖေဖော်ဝါရီလ (၁၆)ရက်နေ့၌ ဖမ်းဆီးခဲ့သည့် အမှတ် (၁၁၈) ယာဉ်ထိန်းရဲတပ်ဖွဲ့စု(ကျိုင်းတုံမြို့)မှ ရဲအုပ်စောသန်းဦးအား ကျေးဇူးတင် ဂုဏ်ပြု မှတ်တမ်းချီးမြှင့်ကို ၂၀၁၉ခုနှစ် ဖေဖော်ဝါရီလ(၂၄)ရက်နေ့တွင် လိုက်ခြင်းဖြစ်ကြောင်း သိရသည်။

ယာဉ်တိုက်မှုမှ ထွက်ပြေးတိမ်းရှောင်နေသူ အသက် (၂၂)နှစ်အရွယ် ယောဆ(ခ) အသေးလေးသည် ယာဉ်တိုက်မှုဖြစ်ပွားသည့် မော်တော်ယာဉ်နှင့်အတူ ဖေဖော်ဝါရီလ (၁၆)ရက်နေ့က ဖမ်းဆီးခံခဲ့ခြင်းဖြစ်ကြောင်း သိရသည်။

ကျိုင်းတုံ - လွယ်မွေကားလမ်းအတိုင်း လမ်းဘေးတွင် လမ်းလျှောက်လာနေသည့် အသက်(၇၀)အရွယ် ဒေါ်နန်းပဲကို ၂၀၁၉ ခုနှစ်၊ ဇန်နဝါရီလ (၂၂)ရက်နေ့ ညနေ (၃)နာရီ (၄၀)မိနစ်တွင် တစ်ဖက်ယာဉ်ကြောမှ မော်တော်ယာဉ်တစ်စီးက အရှိန်မထိန်းနိုင်ဘဲ ဝင်တိုက်မိပြီးနောက် မောင်းနှင်ထွက်ပြေး သွားခဲ့ခြင်းဖြစ်သည်။

ဒေါ်နန်းပဲမှာ ဒဏ်ရာပြင်းထန်စွာရရှိသွားသဖြင့် ကျိုင်းတုံပြည်သူ့ဆေးရုံကြီးတွင် ကုသမှုခံယူနေစဉ် ဇန်နဝါရီလ (၂၃)ရက်နေ့ညနေ၌ သေဆုံးသွားသဖြင့် ကျိုင်းတုံမြို့မရဲစခန်းတွင် ရာဇသတ်ကြီး ပုဒ်မ ၃၃၈/၂၇၉/၂၀၂ ဖြင့် ဖွင့်လှစ်စုံစမ်းနေသောအမှုအား ရာဇသတ်ကြီးပုဒ်မ ၃၀၄ -က/ ၂၇၉/၂၀၂ သို့ပြောင်းလဲဖွင့်လှစ်ခဲ့ခြင်းဖြစ်ကြောင်း သိရသည်။

Tachileik News Agency
ဓာတ်ပုံ - Soe Moe