~~~~~~~~⊰❂ Unicode Version ❂⊱~~~~~~~~

ရေခဲနေသည့် ချီကာဂိုမြို့ ရာသီဥတုအတွင်းမှ အိမ်ခြေမဲ့ (၁၀၀)ကျော်ကို အမျိုးသမီးတစ်ဦးက စတင်လိုက်သည့်ကူညီမှုကြောင့် ဟိုတယ်သို့ ရွှေ့ပြောင်းပေးနိုင်ခဲ့
***************
အမေရိကန်ပြည်ထောင်စု၊ ချီကာဂိုတွင် လွန်ခဲ့သည့်ရက်ပိုင်းက အေးခဲနေသည့်ရာသီဥတုအတွင်း အမျိုးသမီးတစ်ဦးကစတင်လိုက်သည့် ကူညီမှုကြောင့် အိမ်ခြေမဲ့ (၁၀၀)ကျော်ကို ဟိုတယ်အခန်းများသို့ ပြောင်းရွှေ့နေရာချထားပေးနိုင်ခဲ့ကြောင်း သိရသည်။

ချီကာဂိုတွင် စံချိန်တင်အေးခဲနေသည့်အချိန်အတွင်း အမျိုးသမီးတစ်ဦးက အိမ်ခြေမဲ့များနေထိုင်ရာသို့ ၂၀၁၉ ခုနှစ်၊ ဇန်နဝါရီလ (၂၉)ရက်နေ့တွင် သွားရောက်ကြည့်ရှုပြီးနောက် ကိုယ်ပိုင်ငွေဖြင့် ဟိုတယ်အခန်း (၂၀)ကို ငှားရမ်းကာ အိမ်ခြေမဲ့များအား စတင်ရွှေ့ပြောင်းပေးခဲ့ခြင်းဖြစ်ကြောင်း သိရသည်။

ယင်းနောက် အိမ်ခြေမဲ့များကို ဆက်လက်ကူညီနိုင်ရေးအတွက် လူမှုကွန်ယက်စာမျက်နှာတွင် အိမ်ခြေမဲ့များအတွက် လူမှုကူညီရေးအဖြစ် ဖေါ်ပြလိုက်ပြီးနောက် ပူးပေါင်းကူညီသူများ တဖြည်းဖြည်းတိုးလာကာ ဒေါ်လာ (၈၀၀၀)အထိရလာပြီး ချီကာဂိုရှိ အိမ်ခြေမဲ့ (၁၀၀)ကျော်ကို ဟိုတယ်ခန်းများသို့ ရွှေ့ပြောင်းပေးနိုင်ခဲ့သည့်အပြင် အဝတ်အစား၊ အစားအသောက်များပါ ဖြည့်ဆည်းပေးနိုင်ခဲ့ခြင်းဖြစ်ကြောင်း သိရသည်။

အမေရိကန်ပြည်ထောင်စုတွင် ဝင်ရိုးစွန်းလေအေးထုဖြတ်သန်းတိုက်ခတ်မှုကြောင့် စံချိန်တင်အပူချိန်ကျဆင်းခဲ့ကာ မြို့ကြီးအချို့တွင် မြစ်များ၊ ရေတံခွန်များ ရေခဲသွားသည်အထိ အေးခဲသွားခဲ့ခြင်းဖြစ်သည်။
အအေးဒဏ်ကြောင့် လူသေဆုံးမှုများအပြင် ဆီးနှင်းများကြောင့် မော်တော်ယာဉ်မတော်တဆဖြစ်ကာ သေဆုံးမှုများလည်း ရှိခဲ့ရာ စုစုပေါင်း လူ(၂၄)ဦးထက်မနည်းသေဆုံးခဲ့ကာ နှင်းကိုက်သည့်ဒဏ်ကြောင့် ခြေ၊လက်များ ဖြတ်ပစ်ရသူများအပါအဝင် ရာနှင့်ချီသော ထိခိုက်ခံစားရသူများ ရှိခဲ့ခြင်းဖြစ်သည်။

ဝင်ရိုးစွန်းလေအေးထုဖြတ်သန်းတိုက်ခတ်မှုကျော်လွန်သွားပါက အချို့နေရာများတွင် ရေကြီးလွှမ်းမိုးနိုင်မှုများလည်း ဖြစ်ပွားနိုင်သည်ဟု မိုးလေဝသဌာနက ခန့်မှန်းထားသည်။

ဇာနှင်း - Tachileik News Agency
Ref:Daily Mail