~~~~~~~~⊰❂Unicode Version ❂⊱~~~~~~~~

တာချီလိတ်မြို့နယ်တွင်ကျင်းပနေသည့် မိုင်းဖုန်းဆရာတော်၏ ဝိဇာတမွေးနေ့တရားပွဲကို ပြည်တွင်း၊ပြည်ပမှ လာရောက်သည့် သိန်းနှင့်ချီသော ပရိတ်သတ်များအတွက် ယာယီတည်းခိုဆောင်များ စီစဉ်ပေးထား
**********
တာချီလိတ်မြို့နယ်၊ မိုင်းဖုန်း(က)ကျေးရွာအုပ်စု၊ ပါဆာကျေးရွာရှိ (မိုင်းဖုန်းဆရာတော် ကျောင်းတိုက်) လွမ်းလိန်းကျောင်းတိုက်တွင် မိုင်းဖုန်းဆရာတော်၏ သက်တော် (၅၆)နှစ်ပြည့် ဝိဇာတမွေးနေ့အထိမ်းအမှတ် တရားပွဲကို ၂၀၁၉ ခုနှစ် ဇန်နဝါရီလ (၁)ရက်နေ့မှ (၅)ရက်နေ့အထိကျင်းပနေရာ ပြည်တွင်းပြည်ပမှ သိန်းနှင့်ချီသော လာရောက်ဖူးမြော်သူများ အဆင်ပြေစေရေးအတွက် မြို့နယ်စီမံခန့်ခွဲရေးကော်မတီနှင့် သက်ဆိုင်ရာဌာနများ ပူးပေါင်းကူညီနေကြောင်း သိရသည်။

“ဆရာတော်ကြီးရဲ့မွေးနေ့ပွဲက ပြည်တွင်းပြည်ပက လာရောက်ကြတဲ့ ဖူးမြော်သူတွေနဲ့ စိတ်အနှောင့်အယှက်မရှိ အောင် မလိုလားအပ်တဲ့ ပြဿနာတွေမဖြစ်ဖို့တို့ကို ကျွန်တော်တို့ မြို့နယ်စီမံခန့်ခွဲရေးအနေနဲ့က ခရိုင်အုပ်ချုပ်ရေးမှူး လမ်းညွှန်ချက်နဲ့ သက်ဆိုင်ရာဌာနတွေဖြစ်တဲ့ ရဲတပ်ဖွဲ့၊ ယာဉ်ထိန်းတပ်ဖွဲ့၊ ရပ်/ကျေးအုပ်ချုပ်ရေးတွေပေါင်းစပ်ဆောင်ရွက်နေတာပါ။ ကားတွေလည်း များတယ်ဆိုတော့ ယာဉ်အန္တရာယ်မဖြစ်စေဖို့ ယာဉ်ထိန်းတပ်ဖွဲ့က ဆောင်ရွက်နေပါတယ်။ နောက် ဆရာတော်ကြီးရဲ့ လွမ်းလွန်းကျောင်းတိုက်အတွင်းမှာလည်း ဆေးခန်းဖွင့်ထားတယ်။ လုံခြုံရေးလည်း အဲဒီမှာ ထားတယ်။ ဘုရားဖူးတွေ ခေတ္တယာယီတည်းခိုဆောင်တွေကိုလည်း ဆရာတော်ရဲ့ကျောင်းဝန်းထဲမှာ ဆောင်ရွက်ပေးထားတယ်။ တစ်ချို့ကလည်း ကိုယ့်မှာပါလာတဲ့ မိုးကာတဲလေးတွေနဲ့ တည်းကြတယ်။ အားလုံးကိုတော့ စိတ်အနှောင့်အယှက်မရှိ ဆရာတော်ကို ဖူးနိုင်အောင်၊ မလိုလားအပ်တဲ့ ပြဿနာတွေမဖြစ်အောင် လုပ်ဆောင်ပေးနေပါတယ်”ဟု တာချီလိတ်မြို့နယ် ဒုတိယအုပ်ချုပ်ရေးမှူး ဦးမင်းအောင်က တာချီလိတ်သတင်းအေဂျင်စီသို့ ပြောသည်။

သဒ္ဓမ္မဇောတိကဓဇ အဂ္ဂမဟာ ကမ္မဋ္ဌာနာစရိယ မိုင်းဖုန်း ဆရာတော် ဘဒ္ဒန္တဉာဏသံဝရ၏ သက်တော် (၅၆)နှစ်ပြည့် ဝိဇာတမွေးနေ့သည် ၂၀၁၉ ခုနှစ် ဇန်နဝါရီလ(၅)ရက်နေ့တွင် ကျရောက်မည်ဖြစ်ရာ အနယ်နယ်အရပ်ရပ်မှ ဆရာတော်အား လာရောက်ဖူးမျှော်သူများနှင့် တရားပွဲလာရောက်သူများအား ကျွေးမွေးလှူဒါန်းသူများဖြင့် စည်ကားနေခြင်းဖြစ်သည်။

ဆရာတော်၏မွေးနေ့တရားပွဲကာလတွင် နိုင်ငံတွင်းဒေသအသီးသီးအပြင် အိမ်နီးချင်းနိုင်ငံများမှ လာရောက်ဖူးမြော်သူများလည်းရှိရာ သိန်းနှင့်ချီသော တရားပွဲလာရောက်သူများအဆင်ပြေစေရေးအတွက် သက်ဆိုင်ရာဌာနအသီးသီးကလည်းကလည်း လိုအပ်သည်များ စီစဉ်ဆောင်ရွက်ခြင်းများကို လုပ်ဆောင်ပေးထားကြခြင်းဖြစ်သည်။

ဆရာတော်၏မွေးနေ့တရားပွဲတော်ကာလအတွင်း ကျောင်းတိုက်ဧရိယာအတွင်းအပါအဝင် မိုင်းဖုန်း(က) နယ်မြေအတွင်း ဝမ်ပုံအထိဧရိယာအတွင်း  ပွဲဈေးကဲ့သို့ ခင်းကျင်းရောင်းချခြင်းများ မပြုလုပ်ကြရန်၊ တရားနာ ကြွရောက်ကြမည့် ဧည့်ပရိတ်သတ်များအား လှူဒါန်းလိုသူများအနေဖြင့်လည်း သက်သက်လွတ် ထမင်းဟင်းများ၊ စတုဒိသာများ လှူဒါန်းကြရန်၊ စားသောက်ဖွယ်ရာများ လှူဒါန်းရာတွင် ပလပ်စတစ်၊ တစ်ခါသုံးခွက်၊ တစ်ခါသုံး ပန်းကန်၊ ဖော့ဗူးများ အသုံးမပြုကြရန်နှင့် အမှိုက်များကို စနစ်တကျ စွန့်ပစ်ကြရန်၊ ကျောင်းတိုက်ပရဝုဏ်အတွင်း သဲပုံစေတီများတွင် စိုက်ထိုးပူဇော်ကြသည့် တံခွန်ကုက္ကား အလံများ ရောင်းချခြင်း မပြုကြရန်တို့ကို ဆရာတော်က မိန့်ကြားထားသည်။

ဆရာတော်၏ ဝိဇာတမွေးနေ့တရားပွဲကို နှစ်စဉ်နှစ်တိုင်း အနယ်နယ်အရပ်ရပ်မှ တရားနာယူသည့် ပရိတ်သတ်များစွာနှင့် လာရောက်လှူဒါန်းသူများ လာရောက်ကြလေ့ရှိပြီး ယခုနှစ်တွင် မွေးနေ့အကြို တရားစခန်းကို ၂၀၁၈ ခုနှစ်၊ ဒီဇင်ဘာလ (၁၂)ရက်နေ့မှ (၂၁)ရက်နေ့အထိ  မဲခေါင်မြစ်ကမ်းဘေးရှိ သုံးထပ်ကျောင်းဆောင်တွင် ဖွင့်လှစ်ခဲ့ခြင်းဖြစ်သည်။

Tachileik News Agency
ဓါတ်ပုံ - Shan Lay