~~~~~~~~⊰❂ Unicode Version ❂⊱~~~~~~~~

"သွားတာကတော့ ဒီတိုင်းပဲပေါ့၊ ရိုးရိုးစာအုပ်လုပ်ပြီးသွားတယ်၊ ဘန်ကောက်မရောက်ခင် ဂိတ်မှာ ဖမ်းခံရတယ်၊ အဲ့လိုမျိုးကများတယ်၊ ဖြတ်တုန်းကတော့ မြန်မာဘက်ကနေ ထုတ်ပေးတဲ့ စာအုပ်နဲ့ တရားဝင်သွားတယ်၊ ဟိုဖက်လည်းရောက်ရော ကန့်သတ်နယ်မြေလွန်သွားတဲ့အခါ ဥပမာ ဘန့်ထန့်ဂိတ်တို့ ဖယောင်းတို့၊ ချင်းမိုင်တို့ရောက်တော့ ဖမ်းခံရတာများတယ်"ဟု ထိုင်းနိုင်ငံ မယ်ဆိုင်မြို့ရောက် မြန်မာနိုင်ငံသားများအား ကူညီ စောင့်ရှောက်ရေးနှင့် စေ့စပ်ညှိနှိုင်းရေးကော်မတီ (CNCMC)မှ ကိုထွန်းနိုင်ဦးက တာချီလိတ်သတင်းအေဂျင်စီသို့ ဇန်နဝါရီလ(၃၁)ရက်နေ့တွင် ပြောသည်။

၂၀၁၉ခုနှစ် ဇန်နဝါရီလ၏ (၁၇၄)ယောက်မြောက်အဖြစ် ဇန်နဝါရီလ(၃၁)ရက်နေ့တွင် မယ်ဆိုင်ဘက် တာဝန်ရှိသူများက လာရောက်လွှဲပြောင်းလာရာမှာ မြန်မာနိုင်ငံသား (၂၄)ဦးတွင် အမျိုးသား (၁၂)ဦး နှင့် အမျိုးသမီး (၁၂)ဦး ပါဝင်ကြောင်းနှင့် ဇန်နဝါရီလ(၁)ရက်နေ့မှ ဇန်နဝါရီလ(၃၁)ရက်နေ့အထိ အမျိုးသား(၁၁၁)ဦး နှင့် အမျိုးသမီး(၅၉)ဦးအပြင် ကလေးငယ်(၄)ဦး စုစုပေါင်း (၁၇၄)ဦးရှိပြီဖြစ်ကြောင်း သိရသည်။

ထိုင်းနိုင်ငံအတွင်း လာရောက် အလုပ် လုပ်ကိုင်နိုင်ရန်အတွက် လူမှုကွန်ရက်များမှ တဆင့်လည်း ခေါ်သူများလည်းရှိရာတွင် သွားရောက်သူများမှ ဖမ်းဆီးခံရမှုများနှင့်လည်း ကြုံတွေ့ခဲ့ရသည်များလည်း ရှိကြောင်း သိရသည်။

"Facebook တွေထဲကနေ ထိုင်းမှာ လာလုပ်၊ အလုပ်ကောင်းတယ်ဆိုပြီး ခေါ်တဲ့ အစိတ်အပိုင်းတွေလည်း ရှိတယ်၊"ဟု ကိုထွန်းနိုင်ဦးက ပြောသည်။

ထိုင်းနိုင်ငံအတွင်း အကြောင်းအမျိုးမျိုးဖြင့် ဖမ်းဆီးခံရသူများအား ထိုင်းဥပဒေအရ ရေးယူဆောင်ရွက်မှုများပြီးမြောက်ပါက မြန်မာနိုင်ငံ တာချီလိတ်မြို့သို့ လွှဲပြောင်းပေးလာလေ့ရှိရာတွင် တာချီလိတ်မှ မြို့နယ်အထွေထွေ အုပ်ချုပ်ရေးဦးစီးဌာန၊ အလုပ်သမား လူဝင်မှုကြီးကြပ်ရေးနှင့် ပြည်သူ့အင်အားဆိုင်ရာ ဦးစီးဌာန၊ မြို့နယ် အလုပ်သမား ညွှန်ကြားမှုဦးစီးဌာန၊ လူကုန်ကူးမှု တိုက်ဖျက်ရေးရဲတပ်ဖွဲ့နှင့် ထိုင်းနိုင်ငံ မယ်ဆိုင်မြို့ရောက် မြန်မာနိုင်ငံသားများအား ကူညီ စောင့်ရှောက်ရေးနှင့် စေ့စပ်ညှိနှိုင်းရေးကော်မတီ (CNCMC) တို့က စိစစ်လက်ခံပေးလေ့ရှိပြီး နေရပ်ပြန်ရန်အတွက် အခက်အခဲရှိသူများကိုလည်း ပူးပေါင်းဆောင်ရွက်ပေးလေ့ရှိကြောင်း သိရသည်။

Tachileik News Agency
ဓာတ်ပုံ - CNCMC