~~~~~~~~⊰❂ unicode ❂⊱~~~~~~~~

"မိုင်းတုံ - မိုင်းဆတ် လမ်းပေါ်ရှိ သံလွင်တံတား(တာဆန်း)ကို (၇၅)တန်ခံနိုင်ဝန်ရှိသော Steel Truss သံဘောင်တံတားအမျိုးအစားဖြင်‌့ ၂၀၁၈-၁၉ ဘဏ္ဍာရေးနှစ်မှာ စတင်ပြီးတော့ ပြည်‌ထောင်စုရန်ပုံငွဖြေင့် တည်ဆောက်ရေးလုပ်ငန်းများ စတင်ဆောင်ရွက်သွားပါမယ်။ ၂၀၁၉ -၂၀ မှာတော့ ကျွန်တော်တို့ ရန်ပုံငွေ တင်ပြတောင်းခံပါမယ်။ ရန်ပုံငွေအပြည့်အဝ ရတယ်ဆိုရင်တော့ ၂၀၁၉-၂၀ ဘဏ္ဍာနှစ်မှာ အပြီးတည်ဆောက်ပေးသွားပါမယ်"ဟု ဆောက်လုပ်ရေးဝန်ကြီးဌာန ဒုတိယဝန်ကြီး ဦးကျော်လင်းက လွှတ်တော်တွင် ဖြကြေားသည်။

တာဆန်းတံတားပြုပြင်ပေးရေးအတွက် ၂၀၁၈ခုနှစ် ဒီဇင်ဘာလ(၄)ရက်နေ့က ကျင်းပခဲ့သည့် ဒုတိယအကြိမ် ပြည်သူ့လွှတ်တော် ဒသမ ပုံမှန်အစည်းအဝေး၏ နဝမနေ့တွင် မိုင်းပန်မဲဆန္ဒနယ်မှ ပြည်သူ့လွှတ်တော် ကိုယ်စားလှယ် ဦးစိုင်းကျော်မိုးက မေးမြန်းခဲ့ခြင်းဖြစ်သည်။

"အဓိကအားဖြင့် မိမိတို့မြို့နယ်မှ ဒေသထွက် ကြက်သွန်ဖြူသီးနှံနဲ့ အခြားကုန်ပစ္စည်းများ နယ်စပ်ကို နှစ်စဉ် ကုန်သွယ်မှုများ ပြုလုပ်လျက်ရှိပြီးတော့ ကုန်စည်ပို့ဆောင်ရာမှာလည်း ယခု လက်ရှိ သံမဏိကြိုး တံတားကြီးဟာ ခံနိုင်ဝန် (၁၇)တန်သာ သတ်မှတ်ထားရှိပြီးတော့ ကုန်ပစ္စည်းများကို ယာဉ်ငယ်နဲ့ အတင်အချ လုပ်ဆောင်ကာ နှစ်ဆင့် သယ်ယူရတဲ့အတွက်ကြောင့် များစွာ အချိန်နှောင့်နှေးကြန့်ကြာလေ့ ရှိပါတယ်။ အခုတင်ပြပါလမ်းနဲ့ တာဆန်းတံတားဟာ မဟာဗျူဟာအရ အရေးပါတဲ့ တံတားတစ်စင်း ဖြစ်ပြီးတော့ မိမိနိုင်ငံထွက်ပေါက် နယ်စပ်ဒေသအခြေအနေအရ အဆင့်မြှင့်တင်၍ တန်(၇၀)ခံနိုင်ဝန်ရှိတဲ့ သံကူကွန်ကရစ်တံတားအဖြစ် တည်ဆောက်ထားပါက ဘက်စုံအသုံးပြုနိုင်မယ့် အဓိကကျတဲ့ လမ်းတစ်ခု ဖြစ်လာမှာ ဖြစ်ပါတယ်"ဟု ပြည်သူ့လွှတ်တော်ကိုယ်စားလှယ် ဦးစိုင်းကျော်မိုးက လွှတ်တော်တွင် မေးမြန်းသည်။

ရှမ်းပြည်နယ်တောင်ပိုင်း၊ လင်းခေးခရိုင်၊ မိုင်းပန်မြို့နယ်နှင့် ရှမ်းပြည်နယ်အရှေ့ပိုင်း မိုင်းဆတ်ခရိုင်၊ မိုင်းတုံမြို့နယ်တို့အား ပိုင်းခြားထားသော သံလွင်မြစ်အား ဆက်သွယ်တည်ဆောက်ထားသည့် လက်ရှိ သံလွင်မြစ်ကူးတံတား(တာဆန်း)သည် အရှည် ပေ(၉၀၀)ရှိပြီး ယာဉ်သွားလမ်းအကျယ် (၁၈)ပေရှိသည့် တစ်လမ်းသွားတံတားဖြစ်သည်။

အဆိုပါတံတားကို ၁၉၉၉ ခုနှစ်တွင် တည်ဆောက်ပြီးစီးခဲ့ခြင်းဖြစ်ပြီး ၂၀၁၈ခုနှစ် ဧပြီလ(၁)ရက်နေ့က မြောင်းမြကြိုးတံတားပြိုကျခဲ့ပြီးနောက်၎င်းတံတားနှင့်အတူ အခြားတည်ဆောက်ပြီးစီးခဲ့သည့် ကြိုးတံတားများ၏ ကြံ့ခိုင်မှုအခြေအနေများအား တရုတ် ပြည်သူ့သမ္မတနိုင်ငံ၊ China Highway Construction Association (CHCA)ဖြင့်ပူးပေါင်းတိုင်းတာစစ်ဆေးမှုများ ပြုလုပ်ခဲ့ရာတွင် သံလွင်မြစ်ကူးတံတား(တာဆန်း)၏ ကြံ့ခိုင်မှု ခံနိုင်ဝန်သည် အဆင်‌့(၄)သာရှိသည့်အတွက် ခံနိုင်ဝန်ကို (၁၆)တန် အထိ လျှော့ချခဲ့ရခြင်းဖြစ်ကြောင်း သိရသည်။

Tachileik News Agency