***************
ရှမ်းပြည်နယ်(အရှေ့ပိုင်း) တာချီလိတ်မြို့တွင် တိုင်းရင်းသားရိုးရာပွဲတော်၊ ဘာသာရေးပွဲတော်များမှလွဲ၍ ရန်ပုံငွေဂီတပွဲများအပါအဝင် ဂီတဖျော်ဖြေပွဲအားလုံးအနေဖြင့် မြို့နယ်ဂီတအစည်းအရုံးထံမှ ထောက်ခံချက်ရယူရန် လိုအပ်သည်ဟု မြို့နယ်ဂီတအစည်းအရုံးတာဝန်ရှိသူများထံမှ သိရသည်။
“မြန်မာနိုင်ငံဂီတအစည်းအရုံး(ဗဟို)ကနေ ၂၀၁၄ ခုနှစ် မတ်လ(၁၀)ရက်နေ့ ညွှန်ကြားစာအရ စင်တင်ဂီတဖျော်ဖြေပွဲ၊ ပြင်ပဂီတဖျော်ဖြေပွဲ၊ ကာရာအိုကေ၊ အဆိုပြိုင်ပွဲ၊ စတိတ်ရှိုးတွေမှာ မြို့နယ်ဂီတအစည်းအရုံးကနေ ထောက်ခံချက်ပေးရန်ဆိုတဲ့ ညွှန်ကြားချက်ရှိပါတယ်။ ဒီလိုဖျော်ဖြေပွဲတွေ လုပ်မယ်ဆိုရင် ကျင်းပခွင့်ပြုပါရန်ဆိုပြီး မြို့နယ်ဂီတအစည်းအရုံးကိုလိပ်မူပြီး လျှောက်ရမှာပါ။ မြို့နယ်ဂီတအစည်းအရုံးက ထောက်ခံပြီးရင် မြို့နယ်အုပ်ချုပ်ရေးမှူးဆီကို တင်ပေးပါမယ်။ မြို့နယ်ဂီတအစည်းအရုံးထောက်ခံချက်မပါဘဲလုပ်တယ်ဆိုရင် ကန့်ကွက်လို့ရပါတယ်။ ဘာရန်ပုံငွေပွဲပဲဖြစ်ဖြစ် ထောက်ခံချက်ယူဖို့ လိုပါတယ်”ဟု တာချီလိတ်မြို့နယ်ဂီတအစည်းအရုံး၏ အတွင်းရေးမှူး (စီမံ) ဦးစိန်လွင်က တာချီလိတ်သတင်းအေဂျင်စီသို့ ပြောသည်။
မြို့နယ်ဂီတအစည်းအရုံးအနေဖြင့် ၂၀၁၅ ခုနှစ်တွင် စတင်ဖွဲ့စည်းခဲ့ခြင်းဖြစ်သော်လည်း အဖွဲ့အနေဖြင့် ရန်ပုံငွေမရှိခြင်းနှင့် ကော်မတီဝင် (၁၁)ဦးဖြင့်သာ လည်ပတ်နေရသဖြင့် အစည်းအရုံးနှင့်သက်ဆိုင်သည့် လုပ်ငန်းများကို ထိထိရောက်ရောက်လုပ်ဆောင်နိုင်ခြင်းမရှိခဲ့သဖြင့် ၂၀၁၈ ခုနှစ်၊ နိုဝင်ဘာလ (၂၆)ရက်နေ့တွင် ကော်မတီသစ်နှင့်အတူ အလွှာ(၆)လွှာကိုပါ ဖွဲ့စည်းပြီး အသင်းဝင်သစ်များလက်ခံခြင်းနှင့်အတူ အစည်းအရုံးနှင့် သက်ဆိုင်သည့် လုပ်ငန်းများကို ထိထိရောက်ရောက်လုပ်ဆောင်သွားမည်ဖြစ်ကြောင်း သိရသည်။
သက်တမ်း(၄)နှစ်ရှိမည့် မြို့နယ်ဂီတအစည်းအရုံးကော်မတီသစ်အဖြစ် ဂီတအလွှာအသီးသီးမှ အမျိုးသား (၉)ဦးနှင့် အမျိုးသမီး (၂)ဦးပါဝင်သည့်ကော်မတီသစ်ကို နိုဝင်ဘာလ(၂၆)ရက်နေ့က ဖွဲ့စည်းလိုက်ပြီး မဟာဂီတအလွှာ၊ ကာလပေါ်အလွှာ၊ ခေတ်ပေါ်စတူရီယိုအလွှာ၊ ခေတ်သစ်အလွှာ၊ အသံဖမ်း/စက်မှုအလွှာနှင့် ထုတ်လုပ်ဖြန့်ချိတေးသံသွင်းအလွှာတို့ကိုလည်း ဖွဲ့စည်းလိုက်ကာ အသင်းဝင်သစ်များကို ဖိတ်ခေါ်ထားသည်ကို တွေ့ရသည်။
တာချီလိတ်မြို့နယ်ဂီတအစည်းအရုံးအား ၂၀၁၅ ခုနှစ်၊ ဇွန်လ(၁၄)ရက်နေ့တွင် စတင်ဖွဲ့စည်းခြင်းဖြစ်ပြီး ဒေသတွင်း ဂီတပညာရှင်များ၏ မူပိုင်ခွင့်ချိုးဖေါက်ခံရခြင်းအပါအဝင် နစ်နာမှုများအား ကာကွယ်ရန်နှင့် ဖြေရှင်းပေးရန် ဖွဲ့စည်းခြင်းဖြစ်သည်ဟု သိရသည်။
တာချီလိတ်မြို့နယ်ဂီတအစည်းအရုံးသို့ အသင်းဝင်လိုသူများနှင့် ဆက်သွယ်လိုသူများအနေဖြင့် ဖုန်း ၀၉ ၄၂၈၂၃၀၉၅၉ သို့ ဆက်သွယ်နိုင်ကြောင်း သိရသည်။
သတင်း၊ဓါတ်ပုံ #Tachileik News Agency
~~~~~~~~~~~~~~~~~~ ေၾကာ္ျငာ ~~~~~~~~~~~~~~~~~~~~ 
