~~~~~~~~⊰❂ unicode ❂⊱~~~~~~~~

ပင်းတယလိုဏ်ဂူဆေးလိပ်ငွေ့ကင်းစင်အတွက် SEATCA ကဆုချီးမြှင့်လိုက်ပြီး ရှမ်းပြည်နယ်က မြန်မာနိုုင်ငံ၏ SEATCA အဖွဲ့ဝင်ဖြစ်လာ
************
မြန်မာနိုင်ငံ၏ ပထမဆုံးဆေးလိပ်ငွေ့ကင်းစင်နယ်မြေအဖြစ် ကမ္ဘာကိုကြေညာနိုင်ခဲ့သည့် ရှမ်းပြည်နယ်(တောင်ပိုင်း)မှ ပင်းတယလိုဏ်ဂူကို ဆေးလိပ်ငွေ့ကင်းစင်ရေးလှုပ်ရှားမှုများအတွက် အာဆီယံအဖွဲ့က ဆုချီးမြှင့်လိုက်ပြီး အာဆီယံဆေးလိပ်ငွေ့ကင်းစင်မြို့တော်များတွင် မြန်မာနိုင်ငံမှ ရှမ်းပြည်နယ်က အဖွဲ့ဝင်ဖြစ်သွားကြောင်း သိရသည်။

“Smoke Free City Award ပင်းတယဂူကို ပေးတာ။ Smoke Free City Membership Network(SEATCA) မှာလည်း ရှမ်းပြည်နယ်က အဖွဲ့ဝင်ဖြစ်လာတာပေါ့။ တစ်ဖက်တစ်လမ်းကတော့ ဆုရတယ်ဆိုတာ ဂုဏ်ယူစရာပေါ့။ တစ်ဖက်တစ်လမ်းကတော့ တာဝန်တွေပိုများလာတယ်လို့တော့ ခံယူတာပေါ့”ဟု ရှမ်းပြည်နယ်အစိုးရအဖွဲ့ဝင် လူမှုရေးဝန်ကြီး ဒေါက်တာမျိုးထွန်းက တာချီလိတ်သတင်းအေဂျင်စီသို့ပြောသည်။

ရွှေဥမင် ပင်းတယလိုဏ်ဂူကို ဆေးလိပ်ငွေ့ကင်းစင်အဖြစ် ၂၀၁၇ ခုနှစ် သြဂုတ်လ (၂၀)ရက်နေ့က ကမ္ဘာကို ကြေညာနိုင်ခဲ့ခြင်းဖြစ်သည်။

ဗီယက်နမ်နိုင်ငံ၊ ဟွိုင်အင်းကမ်းခြေတွင် ၂၀၁၈ ခုနှစ် နိုဝင်ဘာလ(၂၀)ရက်နေ့က ကျင်းပသည့် အာရှပစိဖိတ်ဒေသဆေးလိပ်ငွေ့ကင်းစင်မြို့တော်များ၏ ဒေသဆိုင်ရာ (၆)ကြိမ်မြောက်အစည်းအဝေးတွင် နိုင်ငံအလိုက် ရှေးဟောင်းသမိုင်းဝင်နေရာများကို ဆေးလိပ်ငွေ့ကင်းစင်ဒေသသတ်မှတ်ဖေါ်ဆောင်ရာ၌ တိုးတက်မှုရှိနေသည့် နေရာ (၉)နေရာအတွက် ဆုများပေးအပ်ခြင်းဖြစ်ကြောင်း သိရသည်။

“ကျန်းမာကြံ့ခိုင်တဲ့နိုင်ငံသားကောင်းများဖြစ်လာဖို့ အားကစား၊ ပညာရေး၊ ကျန်းမာရေးဆိုတာလုပ်တော့ ကျွန်တော်ကလည်း ဒီကဏ္ဍတွေ ယူထားတော့ လုပ်ငန်းတစ်ခုထဲနဲ့ ဦးစီးဌာန (၃)ခုရဲ့ လုပ်ငန်းတွေအကျုံးဝင်အောင်ဆိုပြီး ဒီနှစ်နှစ်ကျော်ကာလအတွင်းမှာ အခြေခံပညာကျောင်းတွေမှာ ဆေးလိပ်ငွေ့ကင်းစင်ခေါင်းစဉ်နဲ့ အားကစားပွဲတွေ လုပ်တာပေါ့။ ဒါကို အာဆီယံကတော့ အသိအမှတ်ပြုတဲ့ သဘောပေါ့။ အောင်မြင်လားဆိုတော့ လက်ညှိုးထိုးပြစရာတော့ မရှိဘူးပေါ့။ ဒါပေမဲ့ လူတွေထဲမှာတော့ သတိထားမိလာတာပေါ့။ ကျွန်တော်တို့ အားကစားပွဲတွေလုပ်တဲ့အခါ ကျောင်းသားလူငယ်တွေကို မေးတဲ့အခါမှတော့ ဆေးလိပ်ငွေ့ကင်းစင်ရှမ်းပြည်တစ်ခွင်ဆိုတာတော့ လူတိုင်းတော့ သတိထားမိလာကြတာပေါ့။ လူထုတွေထဲ လူတွေဦးနှောက်ထဲတော့ ရောက်တာပေါ့နော်”ဟု လူမှုရေးဝန်ကြီး ဒေါက်တာမျိုးထွန်းက ပြောသည်။

ဆေးလိပ်ငွေ့ကင်းစင်ရှမ်းပြည်တစ်ခွင်ခေါင်းစဉ်ဖြင့် ဆေးလိပ်ငွေ့ကင်းစင်နေရာများ သတ်မှတ်ခြင်း၊ အခြေခံပညာကျောင်းများကို အခြေပြုလူထုလှုပ်ရှားမှုများကို ပြည်နယ်အစိုးရအဖွဲ့က လုပ်ဆောင်နေခြင်းဖြစ်သည်။

မြန်မာနိုင်ငံမှ ရှမ်းပြည်နယ်(တောင်ပိုင်း) တောင်ကြီးမြို့ရှိ ပင်းတယဂူ၊ ဗီယက်နမ်နိုင်ငံမှ ဟေလောင်းကမ်းခြေနှင့် ဟွိုင်အင်းရှေးဟောင်းမြို့တော်၊ လာအိုနိုင်ငံမှ ချန်ပါဆပ်၊ ဗက်ဖောင်နှင့် လောင်ပရာဘန်၊ မလေးရှားနိုင်ငံမှ ပီနန်၊ ဂျော့ချ်တောင်းနှင့် မလက္ကာ၊ အင်ဒိုနီးရှားနိုင်ငံမှ ပရမ်ဘာနန်နှင့် ဘောရောဗူးဒူး၊ ကမ္ဘောဒီးယားနိုင်ငံမှ အန်ကောဝပ်ဒေသများတွင် ဆေးလိပ်ငွေ့ကင်းစင်ရေးလုပ်ဆောင်မှုများအတွက်  SEATCA က ရွေးချယ်ဆုချီးမြှင့်ခံရခြင်းဖြစ်သည်။

Tachileik News Agency
ဓါတ်ပုံ -SEATCA