~~~~~~~~⊰❂ unicode ❂⊱~~~~~~~~

ရန်ကုန် - မန္တလေးအမြန်လမ်းမကြီးတွင် သတ်မှတ်မိုင်နှုန်းကျော်မောင်းနှင်သည့် ယာဉ်မောင်းများ ဒဏ်ငွေဆောင်ရန် One Stop Service စီစဉ်ပေးရန်မရှိ
***********
ရန်ကုန် - မန္တလေးအမြန်လမ်းမကြီးတွင် သတ်မှတ်ကီလိုမီတာထက် ကျော်လွန်မောင်းနှင်သည့် မော်တော်ယာဉ်များအား ဖမ်းဆီးအရေးယူခြင်းအား လက်ရှိအတိုင်းဆက်လက်ဆောင်ရွက်မည်ဖြစ်ပြီး One Stop Service တရားရုံးဖွင့်လှစ်ဆောင်ရွက်ရန် အစီအစဉ်မရှိကြောင်း ဆောက်လုပ်ရေး ဒုတိယဝန်ကြီး ဦးကျော်လင်းက လွှတ်တော်တွင် ဖြေကြားသည်။

ရန်ကုန် - မန္တလေးအမြန်လမ်းမကြီးပေါ် ဖြတ်သန်းသည့် မော်တော်ယာဉ်များကို Red Flex(Radar System) စနစ်သုံး ရွေ့လျားတိုင်းတာဖမ်းဆီးသည့်စက်များဖြင့် သတ်မှတ်ကီလိုမီတာ (၁၀၀)အထက်ကျော်လွန်သည့် မော်တော်ယာဉ်များ၏ ပုံရိပ်၊ တည်နေရာ၊ အချိန်၊ အမြန်နှုန်းတို့ကို မှတ်တမ်းရယူ ဖမ်းဆီးခြင်းကို ၂၀၁၆ ခုနှစ် စက်တင်ဘာလ(၁)ရက်နေ့မှစ၍ ဆောင်ရွက်နေခြင်းဖြစ်ကြောင်း သိရသည်။

အဆိုပါမှတ်တမ်းဓာတ်ပုံများကို Viber ဖြင့် တိုးလ်ဂိတ်များနှင့် မီနီတိုးလ်ဂိတ်များရှိ အမြန်လမ်းမကြီး ထိန်းသိမ်းပြုပြင်ရေးနှင့် ကြီးကြပ်ရေးအဖွဲ့၊ အမြန်လမ်းရဲတပ်ဖွဲ့၊ မြန်မာနိုင်ငံမီးသတ်တပ်ဖွဲ့၊ အမြန်လမ်း သက်ဆိုင်ရာ ရပ်ကွက်/ ကျေးရွာအုပ်ချုပ်ရေးမှူးများ ပါဝင်သော ပူးပေါင်းစစ်ဆေးရေးအဖွဲ့များထံသို့ ပေးပို့ပြီး စည်းကမ်းဖောက်ဖျက်သည့် မော်တော်ယာဉ်မောင်းများအား ဒဏ်ငွေ (၅၀၀၀၀)ကျပ်ကို သက်ဆိုင်ရာ တရားရုံးများတွင် ရုံးချိန်အတွင်း နေ့ချင်းပြီး (သို့မဟုတ်) ယာဉ်မောင်း လိုင်စင်သိမ်းဆည်း၍ ရက်ချိန်းသတ် မှတ်ကာ တရားရုံးတွင် ဒဏ်ငွေဆောင်စေခြင်းဖြင့် အရေးယူနေကြောင်း သိရသည်။

ယင်းကဲ့သို့ ဖမ်းဆီးအရေးယူခြင်းမှာ ယာဉ်မောင်းများ စည်းကမ်းလိုက်နာရန်အတွက် လုပ်ဆောင်ခြင်းဖြစ်သဖြင့် ၂၀၁၈ ခုနှစ်၊ နိုဝင်ဘာလ (၂၈) ရက်နေ့က ကျင်းပသော ပြည်သူ့လွှတ်တော် အစည်းအဝေးတွင် ဒဂုံမြို့သစ် (ဆိပ်ကမ်း) မဲဆန္ဒနယ်မှ ဦးမြစိန်မေးမြန်းသည့် ရန်ကုန်-မန္တလေး အမြန်လမ်းမကြီး၌ သတ်မှတ်အရှိန်နှုန်းထက် ပိုမိုမောင်းနှင်သော မော်တော်ယာဉ်မောင်းများ ဒဏ်ငွေပေးဆောင်မှု အခက်အခဲ အဆင်ပြေစေရန် (One Stop Service) အဖွဲ့များဖွဲ့၍ ဆောင်ရွက်ရန် အစီအစဉ်မရှိကြောင်း ဒုတိယ ဝန်ကြီးက ပြန်လည်ဖြေကြားသွားသည်။

Tachileik News Agency
ဓါတ်ပုံ - ကျော်မိုးဦး