~~~~~~~~⊰❂ unicode ❂⊱~~~~~~~~

ကယားပြည်နယ်တွင် ၂၀၁၉ ခုနှစ်မှစ၍ တင်ဒါစည်းကမ်းမလိုက်နာသော ကုမ္ပဏီများအား ဥပဒေအတိုင်း အရေးယူသွားတော့မည်
*************
ကယားပြည်နယ်တွင်း စီမံကိန်းတင်ဒါအောင်လုပ်ငန်းဆောင်ရွက်သည့် ကုမ္ပဏီများကို တင်ဒါသတ်မှတ်ချက် အတိုင်း တာဝန်ယူမှုမရှိပါက သတိပေးနေရာမှ ၂၀၁၉ ခုနှစ်မှစ၍ အရေးယူခြင်းကို ဆောင်ရွက်သွားတော့မည် ဖြစ်ကြောင်း သိရသည်။

 “ ကျွန်တော်တို့ ဒီနှစ်တွေကဟာတွေ တစ်ခါတည်း အပြီးသတ်နေတယ်။ လာမယ့် ၂၀၁၉ စပြီး အခုလို သတိပေးတာမျိုးမဟုတ်ဘဲ စည်းကမ်းချိုးဖောက်တဲ့ အရည်အသွေးမပြည့်မီဘူး၊ ကျွန်တော်တို့ဆီတင်ထားတာနဲ့ မြေပြင်မှာလုပ်နေတာ တစ်လွဲရှိတယ်ဆိုတဲ့ကုမ္ပဏီတွေ အရေးယူသွားဖို့ ဆုံးဖြတ်ထားပါတယ်။ သေချာကြပ်မတ် စိစစ်သွားတော့မှာပါ “ ဟု ပြည်သူ့ငွေစာရင်းစောင့်ကြည့်စစ်ဆေးရေးကော်မတီ ဥက္ကဌ ဦးအောင်နိုင်ဦးက တာချီလိတ်သတင်းအေဂျင်စီသို့ ပြောသည်။

လမ်းလုပ်ငန်းများ၊ တံတားလုပ်ငန်းများ၊ ဆောက်လုပ်ရေးလုပ်ငန်းတင်ဒါအောင်ကုမ္ပဏီအချို့ မှာ  စံချိန်စံညွှန်းမပြည့်မီခြင်း၊ သတ်မှတ်အရည်အသွေးမပြည့်မီခြင်း၊ တင်ဒါစည်းကမ်းဖောက်ဖျက်မှုများနှင့် ပုံစံလွဲမှားခြင်းများရှိနေပြီး လက်ရှိတွင် ပြည်နယ်လွှတ်တော်အနေဖြင့် အစိုးရသို့စာပေးပို့၍ အရေးယူပေးရန် တင်ပြခြင်း၊ သတိပေးမှုများ ပြုလုပ်ခြင်းများသာ ဆောင်ရွက်နေခြင်းဖြစ်ပြီး လာမည့်နှစ်မှစ၍ ဥပဒေ လုပ်ထုံးလုပ်နည်းများအရ ကုမ္ပဏီများအား ထိထိရောက်ရောက် အရေးယူသွားမည်ဖြစ်ကြောင်း သိရသည်။

“ ကောင်းပါတယ် လုပ်သင့်ပါတယ်။ အရည်အသွေးပြည့်မီဖို့ စည်းကမ်းတွေလိုက်နာဖို့ကို ကြပ်မတ်ဖို့ တကယ်လိုအပ်နေသေးတယ်။ Black List စာရင်းတွေ သေချာလုပ်သင့်ပါတယ်။ စည်းကမ်းချိုးဖောက်တာ အရည်အသွေးမပြည့်မီတာမျိုးလုပ်တဲ့ကုမ္ပဏီတွေကို Black List ထဲတစ်ခါတည်း ထည့်သင့်တယ်။ တင်ဒါတွေ ဆက်မပေးတော့နဲ့ပေါ့။ ဒါမှသာ နည်းနည်းခံသာမယ်ပေါ့လေ။ သေချာလုံးဝ လုပ်သင့်ပါတယ် “ ဟု လွိုင်ကော်မြို့မှ ဒေသခံတစ်ဦးဖြစ်သည့် ကိုသူရိန်က ပြောသည်။

အစိုးရစီမံကိန်းများ လုပ်ဆောင်နေသည့် တင်ဒါအောင်ကုမ္ပဏီများအား တင်ဒါစည်းကမ်းများအတိုင်း လိုက်နာမှုမရှိပါက အရေးယူခြင်းဆောင်ရွက်နိုင်ရေးအတွက် ပြည်သူ့ငွေစာရင်းစောင့်ကြည့်စစ်ဆေးရေး ကော်မတီက ဆောင်ရွက်နေကြောင်း သိရသည်။

သတင်း #ဆန်းဖြိုးထွန်း