~~~~~~~~⊰❂ unicode ❂⊱~~~~~~~~

ထိုင်းနိုင်ငံတွင်း တရားမဝင်နေထိုင်မှုဖြင့် ဖမ်းဆီးခံရသည့် မြန်မာနိုင်ငံသားများဖြစ်သည့် မြန်မာနိုင်ငံသား(၃)ဦးကို ရှမ်းပြည်နယ် (အရှေ့ပိုင်း) တာချီလိတ်မြို့သို့ ၂၀၁၈ ခုနှစ် နိုဝင်ဘာလ(၂၂)ရက်နေ့တွင် ထိုင်းတာဝန်ရှိသူများက လာရောက်လွှဲပြောင်းပေးလာရာ ၂၀၁၈ ခုနှစ်အတွင်း ထိုင်းနိုင်ငံမှ တာချီလိတ်သို့ လွှဲပြောင်းပေးသူစုစုပေါင်း (၁,ဝ၇၄)ဦးရှိပြီဖြစ်ကြောင်း သိရသည်။

မြန်မာနိုင်ငံသား အမျိုးသား(၂)ဦးနှင့် အမျိုးသမီး(၁)ဦးတို့ကို ထိုင်းနိုင်ငံတာဝန်ရှိသူများအဖွဲ့က မြန်မာ-ထိုင်း ချစ်ကြည်ရေးတံတားအမှတ်(၂) တာချီလိတ်ဘက်ခြမ်းတွင် လာရောက်လွှဲပြောင်းပေးခြင်းဖြစ်သည်။

လွှဲပြောင်းလာသည့် မြန်မာနိုင်ငံသားများအား မြန်မာနိုင်ငံဘက်မှ အလုပ်သမား လူဝင်မှုကြီးကြပ်ရေးနှင့် ပြည်သူ့အင်အားဆိုင်ရာဌာန ဦးစီးဌာန၊ မြို့နယ် အထွေထွေအုပ်ချုပ်ရေးဦးစီးဌာန၊ မြို့နယ်အလုပ်သမား ညွှန်ကြားမှုဦးစီးဌာန၊ လူကုန်ကူးမှုတိုက်ဖျက်ရေး ရဲတပ်ဖွဲ့နှင့် တာချီလိတ်အခြေစိုက် လူမှုကူညီရေးအဖွဲ့ တစ်ခုဖြစ်သည့် ထိုင်းနိုင်ငံမယ်ဆိုင်မြို့ရောက် မြန်မာနိုင်ငံသားများအား ကူညီစောင့်ရှောက်ရေးနှင့် စေ့စပ်ညှိနှိုင်းရေး ကော်မတီ (CNCMC )တို့က စိစစ်လက်ခံကြပြီး နေရပ်ပြန်နိုင်ရေး ကူညီ ဆောင်ရွက်ပေးခဲ့ကြကြောင်း သိရသည်။

တာချီလိတ်မြို့သို့ ထိုင်းနိုင်ငံမှ လွှဲပြောင်းပေးလာသည့် မြန်မာနိုင်ငံသားဦးရေမှာ ၂၀၁၈ ခုနှစ်အတွင်း ဇန်နဝါရီလ (၁)ရက်နေ့မှ နိုဝင်ဘာလ (၂၁)ရက်နေ့အထိ အမျိုးသား (၇၂၁) ဦး၊ အမျိုးသမီး (၃၁၉)ဦး၊ ကလေး (၃၂)ဦး စုစုပေါင်း (၁,ဝ၇၂)ဦးနှင့် သီလရှင် (၂)ပါးတို့ ဖြစ်ကြောင်း သိရသည်။

ထိုင်းနိုင်ငံတွင်း တရားမဝင်သွားရောက်ခြင်း၊ နယ်မြေကျော်လွန်သွားလာခြင်း၊ ရက်ကျော်နေထိုင်ခြင်း များကြောင့် ဖမ်းဆီးခံရသည့် မြန်မာနိုင်ငံသားများကို ထိုင်းနိုင်ငံက မြန်မာဘက်သို့ ပြန်လည် လွှဲပြောင်းပေးပြီး မြန်မာနိုင်ငံအတွင်းသို့ တရားမဝင် ဝင်ရောက်သည့် ထိုင်းနိုင်ငံသားများအနဖြေင့် အခြားပြစ်မှုများ ကျူးလွန်ခြင်းမရှိပါက ပြည်နှင်ဒဏ်ဖြင့် မြန်မာဘက်က ထိုင်းနိုင်ငံသို့ ပြန်လွှဲပေးလေ့ရှိကြောင်း သိရသည်။

Tachileik News Agency
ဓာတ်ပုံ - CNCMC