~~~~~~~~⊰❂ unicode ❂⊱~~~~~~~~

လားရှိုးမြို့ဌာနဆိုင်ရာများနှင့် လူထုတွေ့ဆုံပွဲ (၆)ကြိမ်မြောက်တွင် မြေယာပြဿနာ အများဆုံးတင်ပြ
*************
ရှမ်းပြည်နယ်(မြောက်ပိုင်း) လားရှိုးမြို့ တွင် (၆)ကြိမ်မြောက် ဌာနဆိုင်ရာများနှင့် လူထုတွေ့ဆုံပွဲကို ၂၀၁၈ ခုနှစ်၊ အောက်တိုဘာလ (၁၂) ရက်နေ့က မြို့တော်ခန်းမတွင်ကျင်းပရာ လားရှိုးမြို့နယ်အတွင်း မြေယာပြဿနာများကို အများဆုံးတင်ပြဆွေးနွေးကြသည်။

မြေယာကျူးကျော်နေထိုင်ခြင်း၊ လမ်းမြေအား နေအိမ်ခြံဝန်းအတွင်းထည့်၍ ခြံခတ်ခြင်းများနှင့် မြေယာကိစ္စများအားဖြေရှင်းပေးရန် အထွေထွေအုပ်ချုပ်ရေးဦးစီးဌာနအပါအဝင် သက်ဆိုင်ရာဌာနများသို့ တိုင်ကြားရာ၌ ကွင်းဆင်းစစ်ဆေးမှု အားနည်းကာ ဖြေရှင်းပေးနိုင်မှုမရှိခြင်းတို့ကို လားရှိုးမြို့ အမှတ်(၁)ရပ်ကွက်မှလူထုက အများဆုံး တင်ပြခဲ့ကြသည်။

လားရှိုးပြည်သူ့ဆေးရုံကြီးသို့ အရေးပေါ် လူနာများတင်ပို့ရာတွင် သွေးလိုအပ်သည့်အခါများ၌ ဆေးရုံရှိ သွေးလှူဘဏ်မှ အလွယ်တကူ ထုတ်မပေးနိုင်ခြင်းနှင့် သွေးလှူဘဏ်အတွက် သွေးအစားထိုးထည့်ပေးရန် သွေးလှူရှင်ထပ်မံရှာရခြင်းတို့ကြောင့် အခက်အခဲဖြစ်ရသည့်ကိစ္စများကို တင်ပြကြကြောင်း သိရသည်။

(၅)ကြိမ်မြောက်လူထုတွေ့ဆုံပွဲဖြစ်သည့် ၂၀၁၈ ခုနှစ်၊ သြဂုတ်လ (၉) ရက်နေ့က ပြုလုပ်သော လူထုတွေ့ဆုံပွဲတွင် လူထုကတင်ပြမေးမြန်းခဲ့သည့် လမ်းပြဿနာ၊ မြေယာပြဿနာများနှင့် တံတားလိုအပ်ချက်များကို လားရှိုးမြို့နယ်အုပ်ချုပ်ရေးမှူးက ဌာနဆိုင်ရာများကိုယ်စားပြုကာ ဆဌမအကြိမ်၌ ပြန်လည်ဖြေကြားခဲ့သည်။

သတင်း၊ဓါတ်ပုံ #နေဖြိုးမြင့်