~~~~~~~~⊰❂ unicode ❂⊱~~~~~~~~

“တာချီလိတ်မှာတော့ လူးကုန်ကူးခံရမှုတွေမှာ အများဆုံးက လိင်ပိုင်းဆိုင်ရာ ခေါင်းပုံဖြတ်ခံရမှုတွေ ဖြစ်ပါတယ်။ အရင်တုန်းကဆိုရင် အရွယ်ရောက်တာနဲ့ အမေတွေကိုယ်တိုင်က ကိုယ့်သမီးကိုကိုယ် ရောင်းစားမှန်းမသိ ရောင်းစားကြပါတယ်။ အခုနောက်ပိုင်းမှာ ပညာပေးတာတွေလုပ်တော့ သူတို့လည်း သိ လာပါပြီ။ နားလည်လာပါပြီ”ဟု လူကုန်ကူးမှုတားဆီးနှိမ်နင်းရေးရဲတပ်ဖွဲ့၊ တပ်ဖွဲ့စိတ်(၁)တာချီလိတ်မှ တပ်ဖွဲ့စိတ်မှူး ရဲမှူးရင်ရင်အေးက တာချီလိတ်သတင်းအေဂျင်စီသို့ ပြောသည်။

ရှမ်းပြည်နယ်အရှေ့ပိုင်းဒေသတွင် တွေ့ရှိရသည့် လူကုန်ကူးမှုအမျိုးအစားများတွင် မိန်းကလေးများကို လိင်ပိုင်းဆိုင်ရာအတွက် လူကုန်ကူးမှုအပြင် လုပ်အားခေါင်းပုံဖြတ်မှုများကိုလည်း တွေ့ရလေ့ရှိကြောင်း သိရသည်။

“ဒီအမှုတွေက ထိုင်းနိုင်ငံကို ဦးတည်ပြီး ဖြစ်ပွားပါတယ်။ ဒါကြောင့် ဒါတွေကို လျော့နည်းအောင် လုပ်ဖို့အတွက် အရင်တုန်းကတော့ World Vision ရှိတဲ့အတွက် သူတို့နဲ့ ပူးပေါင်းပြီးတော့ စီမံချက်ဧရိယာ (၉၉) ရွာ ချမှတ်ပြီးတော့ အသိပညာပေးတာတွေ စဉ်ဆက်မပြတ်လုပ်ပါတယ်။ ဒါတွေကြောင့် ပြည်သူတွေကလည်း ကျွန်တော်တို့နဲ့ ပူးပေါင်းပါဝင်တာတွေ၊ တို်င်ပြီးတော့ အကူအညီ တောင်းလာတွေလည်း တွေ့ရပါတယ်”ဟု လူကုန်ကူးမှုတားဆီးနှိမ်နင်းရေးရဲတပ်ဖွဲ့၊ တပ်ဖွဲ့စိတ်(၁) တာချီလိတ်မှ ရဲအုပ်လှဘုန်းက ပြောသည်။

ရှမ်းပြည်နယ်အရှေ့ပိုင်းဒေသတွင် လူကုန်ကူးမှုဆိုင်ရာ အသိပညာပေးခြင်းကို လူကုန်ကူးမှု တားဆီးနှိမ်နင်းရေး ရဲတပ်ဖွဲ့နှင့်အတူ NGO၊ INGO များ၊ အရပ်ဖက်အဖွဲ့များက ပူးပေါင်း ဆောင်ရွက်မှုများလည်းရှိရာ World Vision အဖွဲ့သည် ၂၀၀၆ ခုနှစ်မှ ၂၀၁၇ ခုနှစ်အထိ စီမံချက်ဧရိယာ (၉၉) ရွာတွင် အသိပညာပေးခြင်းကို လုပ်ဆောင်ခဲ့ပြီး ထိုင်းနိုင်ငံရှိအဖွဲ့အစည်းများ၊ တိုင်းရင်းသား ရိုးရာယဉ်ကျေးမှုအဖွဲ့များကလည်း ပူးပေါင်းဆောင်ရွက်မှုများရှိကြောင်း သိရသည်။

လူကုန်ကူးခြင်းဆိုသည်မှာ ခေါင်းပုံဖြတ်ရန်ရည်ရွယ်ချက်ဖြင့် လူပုဂ္ဂိုလ်တစ်ဦးအား ခြိမ်းခြောက်ခြင်း (သို့မဟုတ်) အင်အားသုံးခြင်း (သို့) အခြားပုံစံဖြင့် အတင်းအကြပ်အနိုင်အထက်ပြုခြင်း၊ ဖြားယောင်း ခေါ်ဆောင်ခြင်း၊ လိမ်လည်လှည့်ဖျားခြင်း၊ အာဏာကိုအလွဲသုံးစားပြုခြင်း၊ ရပ်တည်ရန် ခက်ခဲသော အခြေအနေပေါ်တွင် အလွဲသုံးစားပြုခြင်း၊ ချုပ်ကိုင်နိုင်သူတစ်ဦးတစ်ယောက်၏ သဘောတူညီမှုရရှိရန် အကျိုးအမြတ်ပေးခြင်း (သို့မဟုတ်) ရယူခြင်းဖြင့် လူတစ်ဦးဦးအား သိမ်းသွင်းစုဆောင်းခြင်း၊ သယ်ယူ ပို့ဆောင်ခြင်း၊ လွှဲပြောင်းခြင်း၊ ခိုလှုံခွင့်ပေးခြင်း (သို့မဟုတ်) လက်ခံထားခြင်းကို ဆိုလိုသည်။

ခေါင်းပုံဖြတ်ခြင်းဆိုသည်မှာ ပြည့်တန်ဆာအဖြစ် ခိုင်းစခြေင်း၊ အခြားပုံစံဖြင့် လိင်မှုကိစ္စခေါင်းပုံဖြတ်ခြင်း၊ အဓမ္မစေခိုင်းခြင်း၊ ကျေးကျွန်သဖွယ်အသုံးပြုခြင်း (သို့မဟုတ်) ကျွန်ကဲ့သို့အလုပ် လုပ်ရသော အခြေအနေ၊ ခန္ဓာကိုယ်တွင်းမှ အင်္ဂါအစိတ်အပိုင်းများ ဖယ်ထုတ်ခံရခြင်းများကို ဆိုလိုခြင်းဖြစ်သည်။

သတင်း - ဇွဲမြတ်