~~~~~~~~⊰❂ unicode ❂⊱~~~~~~~~

၂၀၁၈ ခုနှစ်၊ အောက်တိုဘာလ (၆)ရက်နေ့ ညပိုင်းက ကျင်းပသည့် မယ်ခေါင်ရပ်ကွက်လူထုနှင့် လွှတ်တော် ကိုယ်စားလှယ်များ၊ ဌာနဆိုင်ရာများ တွေ့ဆုံဆွေးနွေးပွဲတွင် တာချီလိတ်မြို့နယ် အထွေထွေ အုပ်ချုပ်ရေး ဦးစီးဌာန ဒုမြို့နယ်အုပ်ချုပ်ရေးမှူး ဦးမင်းအောင်က လောင်းကစားဂိမ်းခုံများ ပိတ်သိမ်းပေးရေး လူထု တင်ပြချက်နှင့် ပတ်သက်၍ ပြန်လည်ရှင်းလင်း ပြောကြားခဲ့ခြင်း ဖြစ်သည်။

 “ဒီကိစ္စက အဓိက ကတော့ အုပ်ချုပ်ရေးနဲ့ ဆိုင်သလို မြန်မာနိုင်ငံရဲတပ်ဖွဲ့နဲ့လည်း သက်ဆိုင်ပါတယ်။ အခုဒီ ဂိမ်းဆိုင်တွေနဲ့ ပတ်သက်လို့ မယ်ခေါင်ရပ်ကွက်က ပြည်သူတွေ တိုင်တဲ့စာနဲ့ပတ်သက်ပြီးတော့ ကျွန်တော်တို့ မြို့နယ်အထွေထွေအုပ်ချုပ်ရေးဦးစီးဌာနကနေ သက်ဆိုင်ရာ စီ/ခန့်ကော်မတီ(စီမံခန့်ခွဲမှု ကော်မတီ) ထိုင်တယ်။ သက်ဆိုင်ရာ ရပ်ကွက်အုပ်ချုပ်ရေးမှူးတွေကို ခေါ်ပြီးတော့ မှာကြားပြီးလည်း ဖြစ်ပါတယ်”ဟု တာချီလိတ်မြို့ ဒုတိယမြို့နယ်အုပ်ချုပ်ရေးမှူး ဦးမင်းအောင်က ရှင်းလင်းပြောကြားသည်။

လောင်းကစားခုံများ ပိတ်သိမ်းရေးအတွက် မယ်ခေါင်ရပ်ကွက်နေ အိမ်ထောင်စု (၂၅၅) စုမှ လက်မှတ် ရေးထိုးပြီး ၂၀၁၈ ခုနှစ် စက်တင်ဘာလ (၁၀) ရက်နေ့က မြို့နယ်အထွေထွေအုပ်ချုပ်ရေးဦးစီးဌာနသို့ တင်ပြခဲ့ပြီးနောက် အဆိုပါ ကိစ္စနှင့်ပတ်သက်၍ သက်ဆိုင်ရာမှ ဆောင်ရွက်ပေးရန် မယ်ခေါင်ရပ်ကွက်မှ ဒေသခံ(၂)ဦးက လူထုတွေ့ဆုံပွဲတွင် ထပ်မံတင်ပြခဲ့သည်ကို တွေ့ရသည်။

“လွန်ခဲ့တဲ့ သုံးလေးနှစ်ကတည်းက အိမ်ရှေ့မှာတင် ဖွင့်ထားတဲ့ ဂိမ်းခုံဆိုင်တွေကြောင့် နေ့စဉ်နဲ့အမျှ ကြုံတွေ့ခံစားနေရတဲ့ အခက်အခဲတွေ မြင်နေရပါတယ်။ ဂိမ်းခုံအပြင် အဲဒီမှာ မူယစ်ဆေးဝါးပါ ရောင်းချနေတာ မြင်တွေ့နေရပါတယ်။ အဲဒီမှာ လူငယ်လေးတွေ မူးယစ်ပြီး ကစားကြတယ်။ တစ်ခါတစ်လေမှာ တုတ်ဓားတွေနဲ့ လမ်းပေါ်ထိတက် ရမ်းကားကြတယ်။ ကျွန်တော့်အိမ်ကိုလည်း သူခိုးဝင် ခိုးခံရဖူးပါတယ်။ အဲဒါကို ဘယ်သူ့ တိုင်ရမလဲဆိုတော့ ရမ်းကားနေတဲ့ ကလေးတွေ ကိုယ်တိုင်က ပြန်ပြီး စိန်ခေါ်ပါတယ်။ တိုင်ချင်ရာတိုင်လို့ ပြောပါတယ်။ ကျွန်တော်ပြောတာ မယုံဘူးဆိုရင် ချက်ချင်းလက်ငင်း လိုက်ပြ နိုင်ပါတယ်။ အဲဒီကိစ္စကို လူကြီးမင်းများအနေနဲ့ ဘယ်လိုကူညီ ဖြေရှင်းပေးနိုင်မလဲ “ဟု လူထုတွေ့ဆုံပွဲတွင် ဦးစိုင်းသောင်းက တင်ပြခဲ့ခြင်းဖြစ်သည်။

မယ်ခေါင်ရပ်ကွက် အတွင်းရှိ အမျိုးသမီးတစ်ဦးကလည်း၎င်း၏ သားဖြစ်သူမှာ ရပ်ကွက်တွင်း လောင်းကစား ဂိမ်းခုံ၌ ညအိပ်နေထိုင်ကာ မူးယစ်ဆေးသုံးစွဲနပြေီး အိမ်သို့ ငွေတောင်းရန်သာ ပြန်လာလေ့ ရှိသဖြင့် မိသားစုတွင် ငွေကြေးဆုံးရှုံးသည့် အပြင် သားဖြစ်သူက မိသားစုထံမှ ငွေကြေးတောင်းမရချိန်တွင် ရန်ရှာခြင်းများကိုပါ ကြုံတွေ့နေရသဖြင့် လူငယ်များအနာဂတ်အတွက်စဉ်းစားပြီး သက်ဆိုင်ရာမှ ကူညီဆောင်ရွက် ပေးစေလိုပါသည်ဟု တင်ပြခဲ့သည်ကို တွေ့ရသည်။

“အခုလို တင်ပြပေးတာကို မြန်မာနိုင်ငံရဲတပ်ဖွဲ့ကို အကြောင်းကြားပြီးတော့ အမြန်ဆုံး ဆက်လက် အကောင်အထည် ဖော်ပေးပါမယ်လို့ ဖြကြေားလိုပါတယ်။ မြန်မာနိုင်ငံရဲတပ်ဖွဲ့ဟာ ဆိုရင် ဖမ်းဆီးရေးအဖွဲ့ ကျွန်တော်တို့ အထွေထွေအုပ်ချုပ်ရေးဦးစီးဌာနကတော့ Behind Conscept ဆောင်ရွက်ပါတယ်”ဟု ဒုတိယမြို့နယ်အုပ်ချုပ်ရေးမှူး ဦးမင်းအောင်က လူထုအား ရှင်းလင်းခဲ့သည်။

မယ်ခေါင်ရပ်ကွက် အတွင်း အိမ်ထောင်စုပေါင်း(၅၀၀)နီးပါး နေထိုင်ကြသည့်အနက် အိမ်ထောင်စု တစ်ခုစီ ကိုယ်စားပြုသည့် လူဦးရေ (၂၅၅)ဦးက လက်မှတ်ထိုးပြီး ရပ်ကွက်အတွင်းရှိ လောင်းကစားဂိမ်းခုံများအား ပိတ်သိမ်းပေးရန် တောင်းဆိုခဲ့ကြခြင်း ဖြစ်ကြောင်း သိရသည်။

လူထုတွေ့ဆုံပွဲသို့ မယ်ခေါင်ရပ်ကွက်မှ ရပ်ကွက်အုပ်ချုပ်ရေးမှူး ဦးစိုင်းအွတ်၊ ဆယ်အိမ်မှူးများနှင့် ဒေသခံ (၃၀၀)ဝန်းကျင်၊ အမျိုးသားလွှတ်တော်ကိုယ်စားလှယ် ဦးစိုင်းလုံစံခတ်၊ ပြည်သူ့လွှတ်တော်ကို်ယ်စားလှယ် ဦးဌေးဝင်း၊ ရှမ်းပြည်နယ်လွှတ်တော်ကိုယ်စားလှယ် ဦးခင်မောင်တင့်၊ တာချီလိတ်မြို့နယ် အထွေထွေ အုပ်ချုပ်ရေးဦးစီးဌာန ဒုတိယမြို့နယ်အုပ်ချုပ်ရေးမှူး ဦးမင်းအောင်၊ မြို့နယ်စည်ပင် သာယာရေးဌာန အမှုဆောင်အရာရှိ ဦးစိုင်းအောင်လင်း၊ မြို့နယ်မြေစာရင်းဦးစီးမှူး ဦးညီညီ၊ မြို့နယ်လူဝင်မှု ကြီးကြပ်ရေးဦးစီးဌာနတို့မှ တာဝန်ရှိသူများ တက်ရောက်ခဲ့ကြခြင်းဖြစ်သည်။

Tachileik News Agency