~~~~~~~~⊰❂ unicode ❂⊱~~~~~~~~

မြန်မာနှင့် ဂျပန် သံတမန်နိုင်ငံကူးလက်မှတ်ကိုင်ဆောင်သူများ ရက်(၉၀) ဗီဇာကင်းလွတ်ခွင့်ရမည်
**********
မြန်မာနှင့် ဂျပန်နိုင်ငံတို့ကြား သံတမန်နိုင်ငံကူးလက်မှတ်ကိုင်ဆောင်သူများအား အပြန်အလှန် ဗီဇာကင်းလွတ်ခွင့် သဘောတူညီချက်သည် ၂၀၁၈ ခုနှစ်၊ ဒီဇင်ဘာလ (၁) ရက်မှစ၍ သက်ဝင်မည်ဖြစ်ကြောင်း သိရသည်။

ပြည်ထောင်စုသမ္မတ မြန်မာနိုင်ငံတော်အစိုးရနှင့် ဂျပန်နိုင်ငံအစိုးရတို့သည် နှစ်နိုင်ငံအစိုးရနှင့် ပြည်သူများအကြား ချစ်ကြည်ရင်းနှီးသည့် ဆက်ဆံရေးကို ပိုမိုခိုင်မာစေရန် ရည်ရွယ်၍ သံတမန်နိုင်ငံကူးလက်မှတ်ကိုင်ဆောင်သူများကို ရက်ပေါင်း(၉၀)ထက် မကျော်လွန်စေဘဲ နေထိုင်ခွင့် ပြည်ဝင်ဗီဇာ ကင်းလွတ်ခွင့်ပြုရေးဆိုင်ရာ သံတမန်စာချွန်လွှာကို လဲလှယ်ခဲ့ပြီးဖြစ်ကြောင်း ၂၀၁၈ ခုနှစ် အောက်တိုဘာလ (၁၆)ရက်နေ့တွင် မြန်မာနိုင်ငံခြားရေးဝန်ကြီးဌာနက သတင်းထုတ်ပြန်ထားခြင်းဖြစ်သည်။

မြန်မာနိုင်ငံတွင် ပြည်ဝင်ဗီဇာဖြေလျော့မှုကို ၂၀၁၈ ခုနှစ်၊ အောက်တိုဘာလ(၁)ရက်နေ့က စမ်းသပ်ကာလ (၁)နှစ်ဖြင့် ဆောင်ရွက်နေရာ ဂျပန်၊ တောင်ကိုရီးယား၊ ဟောင်ကောင်နှင့် မကာအိုတို့မှ သာမန်နိုင်ငံကူး လက်မှတ်ကိုင်ဆောင်သူများကို ရက်ပေါင်း (၃၀)ဗီဇာကင်းလွတ်ခွင့်ပေးထားပြီး သာမန်နိုင်ငံကူး လက်မှတ်ကိုင်ဆောင်သော တရုတ်နိုင်ငံသားများကို ဆိုက်ရောက်ဗီဇာဖြင့် နေထိုင်ခွင့် ရက်ပေါင်း (၃၀) ပေးထားခြင်းဖြစ်သည်။
ဗီဇာကင်းလွတ်ခွင့်ရရှိသည့် ဂျပန်၊ တောင်ကိုရီးယား၊ မကာအိုနှင့် ဟောင်ကောင်တို့မှ ကမ္ဘာလှည့် ခရီးသည်များကို အပြည်ပြည်ဆိုင်ရာ ဝင်ထွက်ပေါက်များဖြစ်သည့် ရန်ကုန်၊ မန္တလေးနှင့် နေပြည်တော် အပြည်ပြည်ဆိုင်ရာ လေဆိပ်များ၊ ရန်ကုန် အပြည်ပြည်ဆိုင်ရာဆိပ်ကမ်းတို့အပြင် နယ်စပ်ဝင်ပေါက်များဖြစ်သည့် မြန်မာ-ထိုင်း နယ်စပ်ရှိ တာချီလိတ်၊ မြဝတီ၊ ထီးခီးနှင့် ကော့သောင်း အပြည်ပြည်ဆိုင်ရာ ကုန်းတွင်းဝင်ထွက် ပေါက်များ၊ မြန်မာ-အိန္ဒိယနယ်စပ်ရှိ တမူးနှင့် ရိခေါဒါရ် အပြည်ပြည်ဆိုင်ရာ ကုန်းတွင်းဝင်ထွက်ပေါက်များမှ အလည်အပတ်အဖြစ် ဝင်ထွက်သွားလာခွင့်ပြုထားခြင်းဖြစ်သည်။

ဆိုက်ရောက်ဗီဇာဖြင့်ခွင့်ပြုထားသည့် တရုတ် နိုင်ငံသား ကမ္ဘာလှည့်ခရီးသည်များအနေဖြင့် လေကြောင်းခရီးစဉ်ဖြင့် အပြည်ပြည်ဆိုင်ရာလေဆိပ်များဖြစ်သော ရန်ကုန်၊ မန္တလေးနှင့် နေပြည်တော်အပြည်ပြည် ဆိုင်ရာလေဆိပ်များတွင် ဆိုက်ရောက်ဗီဇာကို အမေရိကန်ဒေါ်လာ (၅၀) ဖြင့် ထုတ်ပေးထားပြီး ဝင်ထွက်လည်ပတ်ခွင့်ပြုထားခြင်းဖြစ်သည်။

အဆိုပါ ခွင့်ပြုချက်များဖြင့် ဝင်ရောက်လည်ပတ်သူများအနေဖြင့်  လုံခြုံရေးအရ ကန့်သတ်ထားသော နယ်မြေမှအပ နိုင်ငံခြားသားများ သွားလာခွင့် ရှိသည့် နေရာများကို သွားလာခွင့်ပြုထားသော်လည်း နေထိုင်ခွင့်သက်တမ်း ထပ်မံတိုးပေးခြင်းပြုမည်မဟုတ်ကြောင်း သိရသည်။

ယင်းသို့ခွင့်ပြုပြီးနောက် ဗီဇာကင်းလွတ်ခွင့်ပြုထားသည့် (၄)နိုင်ငံမှ ခရီးသွားများသည် ရှမ်းပြည်နယ်(အရှေ့ပိုင်း) တာချီလိတ်နယ်စပ်ဝင်ထွက်ပေါက်မှ (၁၄)ရက်အတွင်း (၁၀၂၆)ဦး ဝင်ရောက်ခဲ့ကြောင်း သိရသည်။

Tachileik News Agency