~~~~~~~~⊰❂ unicode ❂⊱~~~~~~~~

ရှမ်းပြည်နယ်တွင်း လောင်းကစားဝိုင်းများပပျောက်ရေးအဆိုကို အတည်ပြုပြီးနောက် လက်ရှိအခြေအနေထက် အရေးယူမှုများ တိုးမြှင့်လုပ်ဆောင်ရန်လိုအပ်နေ
*************
နယ်စပ်ရေးရာနှင့်လုံခြုံရေးဝန်ကြီးကိုယ်တိုင် ထောက်ခံထားသည့် ရှမ်းပြည်နယ်အတွင်း လောင်းကစားဝိုင်းများ ပပျောက်ရေးနှင့် တင်းကြပ်စွာတားဆီးပိတ်ပင်အရေးယူပေးနိုင်ရေး  ပြည်နယ်အစိုးရသို့ တိုက်တွန်းသည့်အဆို အတည်ပြုပြီးနောက် ပြည်နယ်တွင်း အရေးယူဆောင်ရွက်မည့် အခြေအနေများ လက်ရှိထက် တိုးတက်ရန်လိုအပ်နေသည်ဟု အဆိုတင်သွင်းသည့်လွှတ်တော်ကိုယ်စားလှယ်က ဆိုသည်။

“အခုထက်ထိတော့ ထိထိရောက်ရောက် မရှိဘူးလို့ မြင်ပါတယ်။ အခုထိတော့ အရေးယူတာတွေ ဘာတွေ မမြင်ရဘူးပေါ့။ ဒါကြောင့် တိုက်တွန်းရတာပေါ့။ ဖြေရှင်းနည်းကတော့ သူတို့လုပ်ပိုင်ခွင့်ရှိနေတာပဲ။ ငါးမန်းဂိမ်းဆိုင်တွေ၊ လောင်းကစားဝိုင်းတွေရှိနေတာကို ထိထိရောက်ရောက်အရေးယူမယ်ဆိုရင်တော့ ဘယ်သူမှ မလုပ်ရဲတော့ဘူးလေ။ အဲဒါကြောင့် မူဆယ်က လွှတ်တော်ကိုယ်စားလှယ်က ဆွေးနွေးတယ်လေ အုပ်ချုပ်ရေးမှူးတွေကအစ သူတို့လုပ်ပိုင်ခွင့်ထဲမှာရှိနေရဲ့သားနဲ့ အားနည်းတယ်လို့ ထောက်ပြထားပါတယ်။ ရဲတွေကအစ၊ အုပ်ချုပ်ရေးတွေ၊ ရပ်ကျေးအုပ်ချုပ်ရေးမှူးတွေကအစ လာတားမယ်ဆိုရင်၊ မတားနိုင်ဘူး ဆိုရင်တောင် သက်ဆိုင်ရာကို သတင်းပေးတာမျိုးတွေ လုပ်မယ်ဆိုရင် ဒါကတော့ ဘယ်လိုပဲဖြစ်ဖြစ် ပျောက်သွားမှာပဲလေ”ဟု အဆိုတင်သွင်းခဲ့သည့် သိန္နီမဲဆန္ဒနယ်မှ ပြည်နယ်လွှတ်တော်ကိုယ်စားလှယ် ဒေါ်နန်းခင်ထားရီက တာချီလိတ်သတင်းအေဂျင်စီသို့ ပြောသည်။

ပြည်သူများ စီးပွားရေးအကြပ်အတည်းဖြစ်ပေါ်စေခြင်း၊ မူးယစ်ဆေးဝါး ရောင်းဝယ်မှုနှင့် သုံးစွဲမှု များပြားလာခြင်း၊ စားဝတ်နေရေးအတွက် စိန်ခေါ်မှုများရှိလာ၍ ခိုးဆိုးတိုက်ခိုက်မှုများ၊ အုပ်စုဖွဲ့ရိုက်နှက်မှုများ၊ လုယက်မှုများ၊ လိမ်လည်မှုများစသည့် လောင်းကစားဝိုင်းများနှင့်ဆက်စပ်သည့် မှုခင်းများဖြစ်ပွားမှုများပြားလာခြင်းတို့ကြောင့် ပြည်နယ်တွင်း လောင်းကစားဝိုင်းများ ပပျောက်ရေးအတွက် တင်းကြပ်တားဆီးပိတ်ပင်သွားရန် ပြည်နယ်အစိုးရအား ၂၀၁၈ ခုနှစ် မေလအတွင်းက သိန္နီမဲဆန္ဒနယ်မှ ပြည်နယ်လွှတ်တော်ကိုယ်စားလှယ် ဒေါ်နန်းခင်ထားရီက ပြည်နယ်လွှတ်တော်တွင် ၂၀၁၈ ခုနှစ်၊ စက်တင်ဘာလ(၂၁)ရက်နေ့က အဆိုတင်သွင်းရာ အဆိုကို အတည်ပြုနိုင်ခဲ့ပြီး ပြည်နယ်အစိုးရအဖွဲ့ဝင် နယ်စပ်ရေးရာနှင့်လုံခြုံရေးဝန်ကြီးကိုယ်တိုင် ထောက်ခံအတည်ပြုထားခြင်းဖြစ်ကြောင်း သိရသည်။

“ဝန်ကြီးကလည်း သူတို့ဘက်က လုပ်ဆောင်ထားတာတွေကို အချက်အလက်နဲ့ ဖြေပါတယ်။ သူတို့လည်း ထိထိရောက်ရောက် လုပ်နေပါတယ်။ ဒါပေမဲ့ လုံးဝပပျောက်အောင်တော့ လုပ်လို့မရပါဘူး။ လျော့နည်းအောင်တော့ လုပ်နေပါတယ်။ ရှေ့လျှောက်လည်း လုပ်သွားမယ်ပေါ့။ ဒါကြောင့် ဒီအဆိုကို အတည်ပြုပေးပါရန်ဆိုပြီး ထောက်ခံတင်ပြခဲ့တာပါ။ လောင်းကစားလို့သုံးလိုက်မယ်ဆိုရင်တော့ ဥပမာ ကိုယ်ဝန်ဆောင်က သားမွေးမလား သမီးမွေးမလားဆိုတာကအစ လောင်းကစားဖြစ်တယ်ပေါ့။ ဒီတော့ ဒီလိုဟာတွေတော့ ပပျောက်အောင် လုပ်လို့မရဘူးပေါ့”ဟု ပြည်နယ်လွှတ်တော်ကိုယ်စားလှယ် ဒေါ်နန်းခင်ထားရီက ဆိုသည်။

၂၀၁၈ ခုနှစ် မေလအတွင်းက သိန္နီမဲဆန္ဒနယ်မှ ပြည်နယ်လွှတ်တော်ကိုယ်စားလှယ် နန်းခင်ထားရီက ယင်းအဆိုကို ပြည်နယ်လွှတ်တော်ဥက္ကဌထံ တင်ပြခဲ့ပြီးနောက် စက်တင်ဘာလတွင် ကျင်းပသည့်လွှတ်တော်အစည်းအဝေးတွင် အဆိုတင်သွင်းနိုင်ခဲ့ခြင်းဖြစ်ကြောင်း သိရသည်။