~~~~~~~~⊰❂ unicode ❂⊱~~~~~~~~

အဆိုပါ တံတားမှာ လူအဝင်အထွက်နှင့် နယ်စပ်မြို့တွင် နေထိုင်သူများကို ခွင့်ပြုထားသည့် တစ်ပိုင်တစ်နိုင် ကုန်သွယ်ရေး အတွက် ကုန်စည်သယ်ဆောင်ရာတွင် အသုံးပြုခွင့်ပေးထားခြင်းဖြစ်ရာ ထိုင်းနိုင်ငံ လိုင်စင် နံပါတ်တပ်ဆင်ထားသည့် မော်တော်ယာဉ်ဟောင်းများဖြင့် ကုန်စည်သယ်ပို့ခြင်းများကို လုပ်ဆောင်နေသဖြင့် အဆိုပါ ယာဉ်အိုယာဉ်ဟောင်းများအား ဖမ်းဆီးနခြေင်းဖြစ်ကြောင်း သိရသည်။

 “ခရိုင်ညွှန်ကြားချက်အရ ကျွန်တော်တို့ လုပ်ဆောင်နေတာဖြစ်ပါတယ်။ ဒါက နှစ်နိုင်ငံတံတားမှာ အများအမြင် မတင့်တယ်တဲ့ကားတွေ တော်တော်လေးရှိတယ်။ အတော်ရုပ်ပျက်ဆင်းပျက်ဖြစ်နေတဲ့ ယာဉ်တွေပါ။ ဒီဟာတွေက သံရည်ကြိုပို့ရမှာတွေလောက် ဖြစ်တယ်။ လတ်တလောတော့ (၅)မှု တရားရုံး တင်ပြီးသွားပြီ။ ဒီနေ့အထိ ဖမ်းဆီးရမိက (၁၀)မှုလောက်ရှိတယ်။ တနင်္လာနေ့ တရားရုံး ဆက်တင်မှာပါ”ဟု အမှတ်(၁၁၇) ယာဉ်ထိန်းတပ်ဖွဲ့စု(တာချီလိတ်ခရိုင်) တပ်ဖွဲ့စုမှူး ဒုရဲမှူး ဇော်မင်းသိန်းက တာချီလိတ်သတင်းအေဂျင်စီသို့ ပြောသည်။

နယ်စပ်မြို့ တာချီလိတ်တွင် ထိုင်းနိုင်ငံ လိုင်စင်နံပါတ်ပြားပါသည့် မော်တော်ယာဉ်များကို နှစ်နိုင်ငံ နားလည်မှုစာချွန်လွှာအရ မြို့အထွက်မယ်ယန်းဂိတ်အထိ ခွင့်ပြုပေးထားခြင်းဖြစ်ကြောင်း သိရသည်။

“ဒေသခံတွေကို ခွင့်ပြုပေးထားတဲ့ တစ်ပိုင်တစ်နိုင်ကုန်စည်သယ်ယူပို့ဆောင်ရေးအတွက် ဟိုဘက်မှာ ကျွန်တော်တို့ နိုင်ငံကားတွေနဲ့ အဆင်မပြေတော့ ထိုင်းနံပါတ်ပြားတွေနဲ့ ကားတွေနဲ့သယ်တာကို ဒီတံတားမှာ ခွင့်ပြုပေးထားတယ်။ တစ်ခြား ဆီဘောက်ဆာတို့ တစ်ခြားလုပ်ငန်းသုံးကားတွေက တံတား(၂)ကနေ သွားတယ်။ ဆီဘောက်ဆာတို့လို တရားဝင်ဂျူတီဆောင်ပြီး ဝင်တဲ့ဟာတွေက ကျွန်တော်တို့ မယ်ယန်းဂိတ်အထိ ခွင့်ပြုပေးတယ်။ မယ်ယန်းဂိတ်ကျော်ရင်တော့ ခွင့်မပြုဘူး”ဟု ယာဉ်ထိန်းရဲတပ်ဖွဲ့စုမှူး ဒုရဲမှူး ဇော်မင်းသိန်းက ပြောသည်။

ယင်းကဲ့သို့ ဖမ်းဆီးမှုများကြောင့် တာချီလိတ်မြို့နှင့် မယ်ဆိုင် ကုန်စည်သယ်ဆောင်နေသည့် ကားသမားများမှာ ယာဉ်အို ယာဉ်ဟောင်း သတ်မှတ်ချက်ကို မသိခြင်း၊ ယာဉ်မောင်းလိုင်စင် စိစစ်ခြင်းများကြောင့် စိုးရိမ်မှုများ ဖြစ်နေကြောင်း အဆိုပါတံတားတွင် ကုန်စည်သယ်ယူပို့ဆောင်နေသည့် ကားသမားတစ်ဦးကဆိုသည်။

“ယာဉ်အိုယာဉ်ဟောင်းတွေ ဖမ်းတယ်။ လက်ခံတယ်ဖမ်းပါ။ ဘာလုပ်သင့်တယ်ဆိုတာလေး ပြောပြ ရှင်းပြပေးပါ။ ယာဉ်မောင်းလိုင်စင် စစ်မယ်။ တာချီလိတ်မှာ ထိုင်းနံပါတ်တပ်ယာဉ်တွေ အများကြီးရှိတယ်။ အိမ်စီးကား၊ သုံးဘီး၊ ကီလိုထုတင်တဲ့ ဟိုင်းလပ်ကား၊ ဟိုတယ်ဝန်ဆောင်မှုကား၊ ကျောင်းကား၊ ဆီဘောက်ဆာကား၊ (၆)ဘီးကားတွေမှာ တစ်ချို့မောင်းတဲ့သူဆို လိုင်စင်အနီမပြောနဲ့ အစိမ်းတောင် မရှိဘူး။ ဖမ်းလေ တန်းတူအခွင့်အရေးပေးပါ။ အခုက ပစ္စည်းသယ်တဲ့ကားတွေပဲ ဖမ်းတယ်”ဟု တံတား(၁)တွင် ကုန်စည်သယ်ယူပို့ဆောင်နေသည့် ကားသမားတစ်ဦးက ပြောသည်။

ထိုင်းနံပါတ်ပြား တပ်ထားသည့် မော်တော်ယာဉ်များအား တာချီလိတ်မြို့တွင်း ခွင့်ပြုထားရာတွင် မော်တော်ယာဉ်မောင်းနှင်သူများ အနဖြေင့် မြန်မာနိုင်ငံသားများဖြစ်ပါက မြန်မာနိုင်ငံမှ သတ်မှတ် လိုင်စင်နှင့် မြန်မာနိုင်ငံသား မဟုတ်သူများအတွက် အာဆီယံလိုင်စင်တို့ကို ခွင့်ပြုပေးထားခြင်းဖြစ်ပြီး လက်ရှိတွင် ယာဉ်အိုယာဉ်ဟောင်းများအား ဖမ်းဆီးပြီး ဒဏ်ကြေးဆောင်စေကာ ယာဉ်အား ပြင်ဆင်စေကြောင်း သိရသည်။

“ကျွန်တော်တို့က အာဆီယံနားလည်မှု သဘောတရားအရ အာဆီယံနိုင်ငံတွေရဲ့ လိုင်စင်ကို ခွင့်ပြုပါတယ်။ အကယ်၍ မြန်မာနိုင်ငံသားတွေမောင်းတယ်ဆိုရင်တော့ မြန်မာနိုင်ငံဘက်က လိုင်စင်ရှိရပါမယ်။ သတ်မှတ်လိုင်စင်အရ လုပ်ငန်းသုံးကားတွေဆိုရင်တော့ လုပ်ငန်းသုံးအဆင့် အနီပေါ့။ ရိုးရိုးအိမ်စီးကားတွေ ဆိုရင်တော့ (ခ)အဆင့်ပေါ့။ အရင်ကလည်း ဖမ်းဖူးပါတယ်။ သတ်မှတ်လိုင်စင်မရှိတာတို့ဘာတို့ပေါ့။ ဥပဒေအရ ဖမ်းမယ်ဆိုရင်တော့ ပုဒ်မတွေ အများကြီး အများကြီးတပ်လို့ရပါတယ်။ ဒါပေမဲ့လည်း သူတို့မှာ လုပ်ကိုင် စားသောက်ရသေးတာနဲ့ဆိုတော့ ဒါတွေကို အများအမြင်တင့်တယ်အောင် ပြင်ပေး။ တရားရုံးကနေ ဒဏ်ကြေးဆောင်စေတယ်”ဟု ယာဉ်ထိန်းရဲတပ်ဖွဲ့စုမှူး ဒုရဲမှူး ဇော်မင်းသိန်းက ပြောသည်။

ယာဉ်အိုယာဉ်ဟောင်းများကို ဖမ်းဆီးရမိပါက တရားရုံးတွင် ဒဏ်ကြေးပေးဆောင်စေရာ ကားတစ်စီးလျှင် အနိမ့်ဆုံးဒဏ်ကြေး ကျပ်(၅၀,ဝဝဝ)၊ ဆိုင်ကယ်တစ်စီးလျှင် အနိမ့်ဆုံးဒဏ်ကြေး ကျပ်(၃၀,ဝဝဝ) ဒဏ်ကြေး ဆောင်စပြေီး ယာဉ်အား ပြုပြင်စေကြောင်း သိရသည်။

Tachileik News Agency