~~~~~~~~⊰❂ unicode ❂⊱~~~~~~~~

ဖရူဆိုမြို့နယ် အမှတ် (၁၄)တန်းမြင့်စစ်လေ့ကျင့်ရေးကျောင်းက အကြောင်းမကြားဘဲ လက်နက်ကြီးများ ပစ်ခတ်နေ၍ ဒေသခံများ စိုးရိမ်နေ
*************
ကယားပြည်နယ်၊ ဖရူဆိုမြို့နယ်၊ ဒေါလောခူကျေးရွာအနီးရှိ အမှတ် (၁၄) တန်းမြင့် စစ်လေ့ကျင့်ရေးကျောင်းက ၂၀၁၈ ခုနှစ်၊ စက်တင်ဘာလ (၁၅) ရက်နေ့ နံနက်ပိုင်းတွင် အနီးဝန်းကျင်ရှိ ဒေသခံများအား အသိပေး အကြောင်းကြားခြင်းမရှိဘဲ လက်နက်ကြီးများပစ်ခတ်လေ့ကျင့်မှုပြုလုပ်ခဲ့သဖြင့် အနီးဝန်းကျင် တောင်ယာများတွင် စစ်ဆေးခြင်းနှင့် အဆိုပါကိစ္စအား သက်ဆိုင်ရာသို့ အကြောင်းကြားခြင်းများ လုပ်ဆောင်နေကြောင်း သိရသည်။

လေ့ကျင့်မှုများပြုလုပ်ရာတွင် လေ့ကျင့်ကွင်းကျော်ပြီး အနီးဝန်းကျင်ရှိ တောင်ယာများသို့ လက်နက်ကြီးကျည် ကျရောက်တတ်သဖြင့် အနီးဝန်းကျင်ကျေးရွာများသို့ အသိပေးအကြောင်းကြားစာများကို အမှတ် (၁၄) တန်းမြင့် စစ်လေ့ကျင့်ရေးကျောင်းက ကြိုတင်ပေးပို့လေ့ရှိသော်လည်း ယခုတစ်ကြိမ်တွင် အသိပေးအကြောင်းကြားခဲ့ခြင်း မရှိကြောင်း သိရသည်။

" ကျေးရွာဥက္ကဌတွေကို အသိပေးမှုမရှိဘူး။ ဒေသခံတွေက စိုးရိမ်ကြတာပေါ့။ အရင်ကဆို အသိပေးတယ် စာထွက်တယ်။ သူတို့ လေ့ကျင့်ရေးလုပ်တဲ့နေရာတွေတစ်ဝိုက်မှာ တောင်ယာတွေ ရှိတယ်။ အရင်ကဆို လေ့ကျင့်တဲ့နေ့တွေဆို တောင်ယာမသွားကြဘူး။ အန္တရာယ်များတယ်လေ။ တောင်ယာတွေထဲ ဒီလက်နက်ကြီး ကျည်တွေ ကျလား၊ မကွဲတဲ့ ဗုံးတွေရှိနေလားဆိုတာ သွားကြည့်မယ်။ ရှိနေရင် သက်ဆိုင်ရာကို အသိပေးတာတွေ စာတင်တာတွေ ကျွန်တော် လုပ်သွားမှာပါ။ အရင်ကဆို တောင်ယာထဲ မကွဲဘဲ ကျန်နေတဲ့ ဗုံးတွေ ရှိခဲ့တယ်လေ။ ဒါကြောင့် ဒေသခံတွေလည်း စိုးရိမ်နေကြတာပေါ့ " ဟု ဖရူဆိုမြို့နယ် ပြည်နယ်လွှတ်တော်ကိုယ်စားလှယ် ဦးသဲရယ်က တာချီလိတ်သတင်းအေဂျင်စီသို့ ပြောသည်။

အဆိုပါလေ့ကျင့်ရေးကျောင်းပတ်လည်တွင် ဒေသခံများ၏ တောင်ယာများရှိနေပြီး နွားကျောင်းနေသူများလည်း ရှိနေတတ်ပြီး ကြိုတင်အကြောင်းမကြားဘဲ လက်နက်ကြီးပစ်ခတ်သံများကြောင့် စိုးရိမ်ထိတ်လန့်မှုများ ဖြစ်ပွားခဲ့ကြောင်း သိရသည်။

" အရင်တုန်းက တရားဝင်စာထွက်တယ်။ ကြိုတင်အကြောင်းကြား အသိပေးတယ်။ အဲဒီလိုဆို ကျွန်တော်တို့ တောင်ယာမသွားတော့ဘူး။ နွားကျောင်းတာတွေလည်း မလုပ်ဘူး။ အခုကဘာလို့ တရားဝင် စာမထွက်တော့တာလဲ မသိဘူး။ ကျွန်တော်တို့က တပ်နားတစ်ဝိုက်မှာ နေနေရတာလေ။ ကျွန်တော်တို့မြေတွေသိမ်းပြီး တပ်တည်ခဲ့တာပဲ။ ကျွန်တော်တို့ကို အလေးထားသင့်တယ်။ တောင်သူယာသွားတဲ့သူတွေရော၊ နွားကျောင်း သမားတွေရော အကုန်အန္တရာယ်များတယ်။ အရင်ကဆို ဗုံးသီးတွေ တောင်ယာထဲကျတယ်။ မကွဲသေးတာပေါ့ ။ အဲဒီလိုတွေ ဖြစ်မှာစိုးတယ်လေ။ တိုက်ပွဲတွေ ဖြစ်နေသလိုပဲ ကြောက်စရာကောင်းတယ် " ဟု ဒေသခံတစ်ဦးက ပြောသည်။

အမှတ် (၁၄)တန်းမြင့် စစ်လေ့ကျင့်ရေး ကျောင်းကို ၂၀၁၂ ခုနှစ်တွင် စတင်တည်ဆောက်ခဲ့ခြင်းဖြစ်ပြီး အဆိုပါ စစ်လေ့ကျင့်ရေးကျောင်းအနီးတွင် မာခရောရှည် ကျေးရွာ၊ ဒေါလောခူကျေးရွာ၊ လောဂျာကျေးရွာများရှိနေခြင်းဖြစ်သည်။

သတင်း #ဆန်းဖြိုးထွန်း