~~~~~~~~⊰❂ unicode ❂⊱~~~~~~~~

ရောဂါကင်းသည့်အသားများ ထုတ်လုပ်ရန် သားသတ်လုပ်ငန်းများအား စနစ်တကျစစ်ဆေးခြင်းကို မကွေးတိုင်းတစ်ခုလုံးတွင် ဆောင်ရွက်မည်
************
မကွေးတိုင်းအတွင်း သားသတ်လိုင်စင်ဖြင့် အသားထုတ်လုပ်နေသည့်လုပ်ငန်းများမှ ထုတ်လုပ်သည့်အသားများ ရောဂါကင်းစင်ကြောင်း ထောက်ခံချက်ကို လုပ်ငန်းစဉ်အတိုင်း စနစ်တကျစစ်ဆေးပြီးမှ ထုတ်ပေးသည့်စနစ် ပြောင်းလဲလိုက်ပြီး ကျန်းမာရေး ထောက်ခံချက် စစ်ဆေးမှုအတွက် ကောက်ခံသည့်နှုန်းထားကို ပြင်ဆင်ကောက်ခံနေကြောင်း သိရသည်။

“အသားစစ်ဆေးခြင်းလုပ်ငန်းဟာ ကျွန်တော်တို့ဌာနနဲ့ ဆိုင်ပါတယ်။ ဌာနစတင်တည်ထောင်တဲ့အချိန်ကစပြီး အသားစစ်ဆေးခြင်းလုပ်ငန်းကို လုပ်ကိုင်ခဲ့တာဖြစ်ပေမဲ့ နောက်ပိုင်းမှာ လက်တွေ့လုပ်တဲ့လုပ်ငန်းက နည်းပါးပြီးတော့ သာမန်ပဲစစ်ပြီး ခွင့်ပြုခဲ့တာများပါတယ်။ အခုတော့ ဒီလုပ်ငန်းစဉ်တွေကို စနစ်တကျနဲ့ လုပ်ဆောင်နိုင်အောင် ခရိုင်/မြို့နယ်ဦးစီးမှူးတွေကို အသားစစ်ဆေးခြင်းဆင့်ပွားသင်တန်းတွေပေးနေပါပြီ။ ပြီးရင် သက်ဆိုင်ရာ စည်ပင်သာယာနဲ့ပေါင်းပြီး လေလံအောင်တဲ့သားသတ်ရုံတွေမှာ မသတ်ခင် စစ်ဆေးမယ်။ သတ်ပြီးလည်း အတွင်းသား ကလီစာတွေကို စစ်ဆေးမယ်။ အဲဒီလိုစစ်ဆေးပြီးမှ ထောက်ခံချက် လက်မှတ်ထုတ်ပေးသွားပါမယ်"ဟု မကွေးတိုင်းဒေသကြီးမွေးမြူရေးနှင့်ကုသရေးဦးစီးဌာန တိုင်းဒေသကြီးဦးစီးမှူး ညွှန်ကြားရေးမှူး ဒေါက်တာမောင်မောင်စိုးဦးက တာချီလိတ်သတင်းအေဂျင်စီသို့ ပြောသည်။

မွေးမြူရေးနှင့်ကုသရေးဦးစီးဌာနက သားသတ်လုပ်ငန်းများမှ ထုတ်လုပ်သည့်အသားများအား ကျန်းမာရေးထောက်ခံချက် စစ်ဆေးမှုအတွက် နွားတစ်ကောင်လျှင် (၃၅)ကျပ်၊ ဝက်တစ်ကောင်လျှင်(၁၅)ကျပ်၊ ဆိတ်တစ်ကောင်လျှင်(၁၀)ကျပ်နှုန်းဖြင့် ကောက်ခံခဲ့ရာမှ စနစ်တကျကြီးကြပ်စစ်ဆေးမှုများ လုပ်ဆောင်ပြီးနောက် နွားတစ်ကောင်လျှင် ကျပ် (၃၀၀၀)၊ ဝက်တစ်ကောင်လျှင် ကျပ် (၁၅၀၀)၊ ဆိတ်တစ်ကောင်လျှင် ကျပ်(၁၀၀၀) ပြောင်းလဲကောက်ခံခဲ့ကြောင်း သိရသည်။

မကွေးတိုင်းဒေသကြီးအစိုးရဘတ်ဂျက်အတွက် သားသတ်လုပ်ငန်းများ၏ အသားထုတ်လုပ်မှု ကျန်းမာရေးထောက်ခံချက်စစ်ဆေးမှုမှ ၂၀၁၇-၂၀၁၈ ဘဏ္ဍာနှစ်တွင် ကျပ်(၄၅)သိန်းကျော်သာရရှိခဲ့သော်လည်း ၂၀၁၈-၂၀၁၉ မီနီဘတ်ဂျက်ဖြစ်သည့် (၃)လတာကာလတွင် ကျပ်သိန်း (၃၅၀) ကျော် ရရှိခဲ့ရာ ရရှိခဲ့ကြောင်းသိရပြီး ပြည်သူများ ကျန်းမာရေးအထောက်အကူဖြစ်စေရန်နှင့် ဘတ်ဂျက်ပိုမိုရှာဖွေနိုင်ရန်အတွက် တိုင်းဒေသကြီးအတွင်း အပြည့်အဝလွှမ်းခြုံဆောင်ရွက်နိုင်ရန် ဌာနဝန်ထမ်းများအား ဆင့်ပွားသင်တန်းများပေး၍ လုပ်ဆောင်နေခြင်းဖြစ်ကြောင်း သိရသည်။

လက်ရှိတွင် မြန်မာနိုင်ငံတစ်ဝန်းရှိ ဈေးများတွင်ရောင်းချနေသည့် အသား၊ ငါး အများစုမှာ  စနစ်တကျစစ်ဆေး၍ ထောက်ခံချက် လက်မှတ်ထုတ်ပေးထားခြင်းမရှိဘဲ ရောင်းချမှုမျိုးဖြစ်သဖြင့် စားသုံးသူများ၏ ကျန်းမာရေးအတွက် စိုးရိမ်ဖွယ်ရာဖြစ်နေသည်ဟု မကွေးတိုင်းဒေသကြီးမွေးမြူရေးနှင့်ကုသရေးဦးစီးဌာန တိုင်းဒေသကြီးဦးစီးမှူး ညွှန်ကြားရေးမှူး ဒေါက်တာမောင်မောင်စိုးဦးက ထောက်ပြပြောဆိုသည်။

မြန်မာနိုင်ငံတွင် ရောဂါဖြစ်ပွားမှု၏ (၆၀)ရာခိုင်နှုန်းကျော်မှာ တိရစ္ဆာန်မှ ကူးစက်ခံရခြင်းဖြစ်ကြောင်း သုတေသနစစ်တမ်းအဖြေအရ တိရစ္ဆာန်ကျန်းမာရေးနှင့် လူကျန်းမာရေးကို တစ်ခုတည်းသော ကျန်းမာရေးအသွင်ဖြင့် စတင်ချဉ်းကပ်ဆောင်ရွက်နေခြင်းဖြစ်ကြောင်း သိရသည်။

သတင်း၊ဓါတ်ပုံ #ဖီးနစ်