~~~~~~~~⊰❂ unicode ❂⊱~~~~~~~~

ကယားနှင့် မယ်ဟောင်ဆောင်ကြား နှစ်နိုင်ငံကုန်သွယ်မှုနှင့် ရင်းနှီးမြုပ်နှံမှုအတွက် ဆွေးနွေး
**************
ကယားပြည်နယ်အစိုးရအဖွဲ့နှင့် ထိုင်းနိုင်ငံ၊ မယ်ဟောင်ဆောင်ခရိုင်အုပ်ချုပ်ရေးမှူးဦးဆောင်သည့်အဖွဲ့တို့ ကယားပြည်နယ်၊ လွိုင်ကော်မြို့ရှိ ပြည်နယ်အစိုးရအဖွဲ့ရုံးတွင် ၂၀၁၈ ခုနှစ်၊ သြဂုတ်လ(၁)ရက်နေ့တွင် တွေ့ဆုံပြီး နှစ်နိုင်ငံအကြား ကုန်သွယ်မှုနှင့် ရင်းနှီးမြုပ်နှံမှုဆိုင်ရာ ကိစ္စရပ်များ ဆွေးနွေးကြောင်း သိရသည်။

ယင်းသို့ဆွေးနွေးရာတွင် ကယားပြည်နယ်နှင့် မယ်ဟောင်ဆောင်ကြား နှစ်နိုင်ငံခရီးသွားများ တရားဝင်သွားလာနိုင်ရေးအတွက် BP -13 လမ်းကြောင်းအား International Check Point အဖြစ်ဖေါ်ဆောင်နိုင်ရေးကို ကယားပြည်နယ်က ပြည်ထောင်စုအဆင့်ထိ တင်ပြဆွေးနွေးကြိုးစားနေပြီး ထိုင်းနိုင်ငံအနေဖြင့်လည်း ကတိပြုပြောကြားထားသည့်အတိုင်း လုပ်ဆောင်ရန် ကယားပြည်နယ်အစိုးရအဖွဲ့က တွေ့ဆုံဆွေးနွေးစဉ် တိုက်တွန်းလိုက်ကြောင်း သိရသည်။

International Check Point ဖြစ်မှသာ ညီအစ်မမြို့တော်အဖြစ် လက်မှတ်ရေးထိုးထားသည့် လွိုင်ကော်နှင့် မယ်ဟောင်ဆောင်ကြား (၆) ည အိပ်၊ (၇) ရက်ခရီးစဉ်ဖော်ဆောင်ရန် ရည်မှန်းချက်ကို အကောင်အထည်ဖေါ်နိုင်မည်ဖြစ်ကြောင်းကိုလည်း တိုက်တွန်းပြောကြားလိုက်ကြောင်း သိရသည်။

နှစ်နိုင်ငံကြား ကုန်သွယ်ရေး၊ စက်မှုလက်မှုနှင့် ခရီးသွားလုပ်ငန်းတို့ ကဏ္ဍအလိုက် ပူးပေါင်းဆောင်ရွက်ရေးတို့ကိုလည်း ဆွေးနွေးကြကြောင်း သိရသည်။

အဆိုပါအစည်းအဝေးတွင် ကယားပြည်နယ်ဝန်ကြီးချုပ် ဦးအယ်လ်ဖောင်းရှိုဦးဆောင်သည့် ပြည်နယ်ဝန်ကြီးများနှင့် သက်ဆိုင်ရာဌာနတာဝန်ရှိသူများပါဝင်သည့်အဖွဲ့က မယ်ဟောင်ဆောင်ခရိုင် အုပ်ချုပ်ရေးမှူး Mr . Sirirat Chamupakarn ဦးဆောင်သည့် အဖွဲ့ဝင် (၃၄) ဦးပါဝင်သည့်အဖွဲ့ဖြင့် ဆွေးနွေးခြင်းဖြစ်ကြောင်း သိရသည်။
Tachileik News Agency
ဓါတ်ပုံ #ကယားပြည်နယ်အစိုးရအဖွဲ့