~~~~~~~~⊰❂ unicode ❂⊱~~~~~~~~

သီဟတင်စိုးအား စွပ်စွဲထားသည့်မုဒိမ်းမှုမှာ အိမ်အကူနှင့်ပွဲစားတို့ လိမ်လည်တိုင်ကြားခြင်းဖြစ်
*************
သရုပ်ဆောင် သီဟတင်စိုးအား မုဒိမ်းမှုဖြင့် အရေးယူရန် တိုင်တန်းချက်မှာ မှန်ကန်မှုမရှိကြောင်း ရဲတပ်ဖွဲ့က ဖော်ထုတ်ရရှိသဖြင့် လိမ်လည်တိုင်တန်းသူများကို ဥပဒေနှင့်အညီအရေးယူနိုင်ရေး ဆက်လက်ဆောင်ရွက်နေကြောင်း ရန်ကုန်တိုင်းဒေသကြီးရဲတပ်ဖွဲ့၏ သတင်းထုတ်ပြန်ချက်အရ သိရသည်။

ရုပ်ရှင်သရုပ်ဆောင် သီဟတင်စိုးအား အိမ်အကူဖြစ်သူ တရားလို ခင်မာမြင့်(ခ) ညိုညို(ခ) ဇင်မာမြင့်နှင့် အိမ်အကူပွဲစားဖြစ်သူ ဒေါ်ညိုတို့ပူးပေါင်း၍ လီဆယ်တိုင်တန်းခြင်းဖြစ်ကြောင်း ရန်ကုန်တိုင်းဒေသကြီး ရဲတပ်ဖွဲ့မှ မှုခင်းဖော်ထုတ်ရေးရဲတပ်ဖွဲ့ဝင်များက စစ်ဆေးတွေ့ရှိထားကြောင်း သတင်းထုတ်ပြန်လိုက်ခြင်းဖြစ်သည်။
ရုပ်ရှင်သရုပ်ဆောင် သီဟတင်စိုးက အိမ်အကူဖြစ်သူ ခင်မာမြင့်ဆိုသူအား ၂၀၁၈ ခုနှစ်၊ ဇူလိုင်လ (၁၃)ရက်နေ့က အဓမ္မပြုကျင့်သည်ဟုဆိုကာ သုဝဏ္ဏနယ်မြေရဲစခန်းတွင် (ပ)၃၈၆/၂၀၁၈၊ ရာဇသတ်ကြီးပုဒ်မ ၃၇၆ ဖြင့် အမှုဖွင့်ခဲ့ခြင်းဖြစ်သည်။

အဆိုပါ အမှုအားဖော်ထုတ်ရန် ရန်ကုန်တိုင်းဒေသကြီးရဲတပ်ဖွဲ့မှူးကိုယ်တိုင် အနီးကပ်ကြီးကြပ်၍ အရှေ့ပိုင်းခရိုင်ရဲတပ်ဖွဲ့မှူးနှင့် မှုခင်းနှိမ်နင်းရေးဌာနစုမှ ရဲတပ်ဖွဲ့ဝင်များ၊ သင်္ဃန်းကျွန်းမြို့နယ် ရဲတပ်ဖွဲ့မှ ရဲတပ်ဖွဲ့ဝင်များပါဝင်သော အထူးအမှုစစ်အဖွဲ့ ဖွဲ့စည်း စုံစမ်းဆောင်ရွက်ခဲ့ခြင်းဖြစ်ကြောင်း သိရသည်။

တရားလို ခင်မာမြင့်(ခ)ညိုညို(ခ)ဇင်မာမြင့်သည် လွန်ခဲ့သော (၄)နှစ်ခန့်က ခင်ပွန်းဖြစ်သူ လေဖြတ်ပြီးနောက် အိမ်အကူလုပ်ရန် ဒေါ်ညိုနှင့် ဆက်သွယ်ခဲ့ခြင်းဖြစ်ကြောင်း သိရသည်။

 ဒေါ်ညိုက ၎င်းအားအိမ်အကူလုပ်၍ အိမ်ရှင်ယောက်ျားများအား မြူဆွယ်ကာ မုဒိမ်းမှုဖြစ်စေရန် လုပ်ဆောင်ရန်နှင့် အမှုဖြစ်ပါက ငွေကြေးညှိနှိုင်းသည့်ကိစ္စကို ၎င်းမှ တာဝန် ယူဆောင်ရွက်မည်ဖြစ်ကာ ရရှိသောငွေကြေးကို ခွဲဝေသုံးစွဲမည်ဟု သင်ကြားပေးခဲ့ခြင်းဖြစ်ကြောင်း သိရသည်။

ခင်မာမြင့်(ခ)ညိုညို(ခ)ဇင်မာမြင့်သည် လွန်ခဲ့သော (၄)နှစ်ခန့်မှစ၍ ဒေါ်ညို၏ ဆက်သွယ်ပေးမှုဖြင့် အိမ်အကူအဖြစ် နေအိမ်များတွင် ဝင်ရောက်လုပ်ကိုင်ရင်း အိမ်ရှင်အမျိုးသားများအား မုဒိမ်းမှုဖြစ်စေရန် ကြိုးစားခဲ့သော်လည်း မအောင်မြင်ဘဲ (၆)အိမ်မြောက်အဖြစ် အလုပ်ဝင်ရောက်လုပ်ကိုင်သည့် ပဲခူးတိုင်းဒေသကြီး၊ ပဲခူးဈေးအနီးရှိ နေအိမ်မှ အလုပ်လုပ်သူက ၎င်းအားမုဒိမ်းကျင့်သည်ဟုဆိုကာ အိမ်ရှင်မိသားစုထံမှ လျော်ကြေးတောင်းရာ အဆင်မပြေသဖြင့် ဒေါ်ညို၏စေခိုင်းချက်အရ ပဲခူးအမှတ် (၃)ရဲစခန်းတွင် မုဒိမ်းမှုအဖြစ် လီဆယ်တိုင်တန်းခဲ့ဖူးကြောင်း သိရသည်။

ယင်းနောက် ရုပ်ရှင်သရုပ်ဆောင် သီဟတင်စိုးနေအိမ်တွင် အိမ်အကူလုပ်ရန် ဒေါ်ညို၏  ဆက်သွယ်ပေးမှုကြောင့် ၂၀၁၈ ခုနှစ် ဇူလိုင်လ(၅)ရက်နေ့တွင် အလုပ်ဝင်ခဲ့ပြီးနောက် ဒေါ်ညို သင်ပြသည့်အတိုင်း လိမ်ညာပြောဆို ကြံစည်၍ သီဟတင်စိုးအား အမှုရေးဖွင့်ခဲ့ခြင်းဖြစ်ကြောင်း သိရသည်။

ခင်မာမြင့်အား အိမ်အကူလုပ်ရန် ဆက်သွယ်ပေးသူ ဒေါ်ညိုအားစစ်ဆေးခဲ့ရာ သီဟတင်စိုးအား မုဒိမ်းမှုဖြင့် လိမ်ညာအမှုမဖွင့်မီ သီဟတင်စိုး၏ဇနီး ဇင်မာဦးထံ လျော်ကြေးကျပ်သိန်း(၁၀၀)ပေးရန် တောင်းခံရာ မရသဖြင့် လိမ်ညာ၍ အမှုဖွင့်ခဲ့ခြင်းဖြစ်ကြောင်း အစစ်ခံသည်ဟု သိရသည်။

သီဟတင်စိုးအား မှုဒိမ်းမှုဖြင့် အမှုဖွင့်လိုက်ကြောင်းသိရပြီးနောက် လူမှုကွန်ယက်စာမျက်နှာတွင် အဆိုပါ အိမ်အကူအမျိုးသမီးကို ငှားရမ်းဖူးသည့်အိမ်ရှင်များက အဆိုပါအိမ်အကူနှင့် ပွဲစားအမျိုးသမီးတို့၏ လိမ်လည်ခဲ့မှုများကို  ထုတ်ဖေါ်ရေးသားမှုများလည်း ထွက်ပေါ်ခဲ့ခြင်းဖြစ်သည်။
ဓါတ်ပုံ #ရန်ကုန်ရဲတပ်ဖွဲ့