~~~~~~~~⊰❂ unicode ❂⊱~~~~~~~~

မယ်ဆိုင်ဂူအတွင်း ပိတ်မိနေတဲ့ ၁၃ ဦးကို အပြင်ခေါ်ထုတ်ဖို့ ကြုံတွေ့နေရတဲ့အခက်အခဲများ
***************
မယ်ဆိုင်ဂူအတွင်းမှာ ဇူလိုင်လ (၂)ရက်နေ့မှာ ပြန်လည်ရှာဖွေတွေ့ရှိခဲ့တဲ့ ကလေး(၁၂)ဦးနဲ့ နည်းပြတို့ကို ဇူလိုင်လ(၅)ရက်နေ့အထိ သူတို့ကိုတွေ့တဲ့နေရာကနေ ခေါ်ထုတ်လာနိုင်ခြင်းမရှိသေးတဲ့အကြောင်းရင်းတွေကို ဇူလိုင်လ(၅)ရက်နေ့ မနက်ပိုင်းက သတင်းစာရှင်းလင်းပွဲမှာ ချင်းရိုင်းခရိုင်အုပ်ချုပ်ရေးမှူးက ရှင်းပြထားပါတယ်။

ဂူအမိုးကနေစိမ့်ကျလာတဲ့ရေကလွဲလို့ စားစရာဘာမှမရှိ မှောင်မဲနေတဲ့နေရာမှာ (၁၀)ရက်ကြာ အစာမစားရဘဲ ပိတ်မိနေတဲ့ (၁၃)ဦးကို ပုံမှန်အစားအစာကျွေးလို့မရခင် ရေတပ်အထူးအဖွဲ့ဆရာဝန်တွေက အဟာရဖြည့်အစာတွေကျွေးပြီး ကျန်းမာရေးစောင့်ရှောက်မှုပေးနေပေမဲ့ လက်ရှိအချိန်ထိ ဂူထဲကနေ ရေငုပ်ထွက်လာနိုင်တဲ့အထိ ကျန်းမာရေးအခြေအနေ၊ ကိုယ်ခန္ဓာကြံ့ခိုင်မှုမကောင်းသေးဘူးလို့ ပြောပါတယ်။

အခုလက်ရှိနေရာကနေ ဂူအဝင်ဝထိ (၄)ကီလိုမီတာအကွာအဝေးမှာ ရေတပ်အထူးအဖွဲ့ဝင်တွေတောင် တစ်ခေါက်ဖြတ်ဖို့ (၆)နာရီလောက် အချိန်ယူရတဲ့ ရေစီးသန်ပြီး ကျဉ်းမြောင်းတဲ့လမ်းကြောင်းနေရာတွေလည်း ရှိနေတယ်လို့ သိရပါတယ်။ ဒါကြောင့်လည်း ဂူထဲကရေတွေကို နည်းလမ်းမျိုးစုံသုံးပြီး ထွက်သွားအောင် လုပ်နေရတာလို့ ဆိုပါတယ်။

နောက်တစ်ချက်ကတော့ ဂူထဲမှာ ရေငုပ်ဖြတ်ရမယ့်နေရာတွေအတွက် အောက်ဆီဂျင်ဗူးတွေကို (၂၅)မီတာ အကွာတိုင်းမှာ ထားရှိထားပေမဲ့ သိပ်တော့လုံလောက်တဲ့အခြေအနေမဟုတ်ဘူးလို့ သိရပါတယ်။
အပြင်ကဝင်နေတဲ့ ရေစီးကြောင်းတွေ၊ ချောင်းတွေကို ရှာဖွေပိတ်ဆို့မှုတွေ၊ ရေလမ်းကြောင်းလွှဲတာတွေ လုပ်နေပေမဲ့ ဂူထဲကို ရေတွေဝင်နေဆဲလို့ သိရပါတယ်။

ပထမဆုံး စဉ်းစားချက်ဖြစ်တဲ့ ဂူတွင်းပိတ်မိနေသူတွေက ရေငုပ်ဝတ်စုံအကူအညီတွေနဲ့ ရေငုပ်ရမယ့်နေရာမှာ ကိုယ်တိုင်ရေငုပ်ပြီး ဂူပေါက်ကနေ ပြန်ထွက်ဖို့ဆိုပေမဲ့ သူတို့အားလုံးမှာ ရေငုပ်တာနဲ့ပတ်သက်လို့ အခြေခံသင်တန်းတောင် သင်ကြားခဲ့ရတာမဟုတ်ဘဲ အခုမှ ရေငုပ်ဝတ်စုံအပြည့်အစုံဝတ်တာတို့လို စတင်သင်ကြားပေးနေရတော့ ရေမြုပ်နေတဲ့ ဂူအတွင်းက လမ်းကြောင်းတလျှောက် တစ်ယောက်ထဲ ရေငုပ်ခိုင်းဖို့က အဆင်မပြေဘူးလို့ သိရပါတယ်။ ထိုင်းတပ်မတော်အထူးအဖွဲ့က ရေငုပ်ကျွမ်းကျင် (၃၁)ယောက်ကိုလည်း ရေတပ်အထူးအဖွဲ့နဲ့ နိုင်ငံခြားသားရေငုပ်ကျွမ်းကျင်သူများအဖွဲ့ဆီကို အင်အားဖြည့်ပေးထားပြီးဖြစ်လို့ ကလေးတစ်ယောက်ကို ကျွမ်းကျင်ရေငုပ်သမား(၂)ယောက်နှုန်းနဲ့ ဂူပြင်ကျယ်အမှတ်(၃)ဆီကို အတူခေါ်ထုတ်လာနိုင်ဖို့တော့ စဉ်းစားနေတယ်လို့ သိရပါတယ်။

မယ်ဆိုင်ဂူအတွင်းမှာ ဇွန်လ (၂၃)ရက်နေ့ကတည်းက ပိတ်မိနေခဲ့တဲ့ ကလေး(၁၂)ယောက်နဲ့နည်းပြကို ကယ်ထုတ်ဖို့အတွက် ထိုင်းနိုင်ငံက နိုင်ငံတော်အဆင့် ကယ်ဆယ်ရေးလုပ်ငန်းအဖြစ် သတ်မှတ်ဆောင်ရွက်ခဲ့သလို နိုင်ငံတကာကလည်း ပူးပေါင်းပါဝင်ကူညီပေးနေကြတာဖြစ်ပါတယ်။

သတင်း၊ဓါတ်ပုံ #Tachileik News Agency