~~~~~~~~⊰❂ unicode ❂⊱~~~~~~~~

မယ်ဆိုင်ဂူမှ ကလေး ၉ ယောက်ကို ထပ်မံကယ်ထုတ်နေရာသို့ ထိုင်းဝန်ကြီးချုပ် လာရောက်ဖွယ်ရှိ
�Update: 3:32 PM ၊ 9/7/2018�
:::::::::::::::::::::::::::::::::::::::::::
မယ်ဆိုင်ဂူအတွင်းမှ ကလေး(၉)ယောက်ကို ကယ်ထုတ်ရန် ဒုတိယအကြိမ် ကယ်ဆယ်ရေးစတင်နေသည့် ဇူလိုင်လ(၉)ရက်နေ့တွင် ထိုင်းဝန်ကြီးချုပ် ပရာယွတ်ချောင်အိုချာ မယ်ဆိုင်ကယ်ဆယ်ရေးစခန်းသို့ လာရောက်ဖွယ်ရှိသဖြင့် လုံခြုံရေးအဖွဲ့များ လုံခြုံရေးစစ်ဆေးမှုများ ဆောင်ရွက်နေကြသည်ကို တွေ့ရသည်။

ဝန်ကြီးချုပ်သည် ဇူလိုင်လ(၉)ရက်နေ့ နေ့လယ်ပိုင်းတွင် ချင်းရိုင်းလေဆိပ်သို့ ရောက်ရှိမည်ဖြစ်ပြီး မယ်ဆိုင်ကယ်ဆယ်ရေးစခန်းသို့ လာရောက်ဖွယ်ရှိသဖြင့် ပြင်ဆင်နေကြခြင်းဖြစ်ကြောင်း သိရသည်။

မယ်ဆိုင်ကယ်ဆယ်ရေးစခန်းအနီး ပုံဖာကျေးရွာအုပ်ချုပ်ရေးမှူးရုံးတွင် နေရာချထားပေးသည့် မီဒီယာစင်တာတွင် ဝန်ကြီးချုပ်ခရီးစဉ်အတွက် လုံခြုံရေးအရစစ်ဆေးမှုများကို နေ့လယ် (၃)နာရီခွဲဝန်းကျင်က ဆောင်ရွက်နေကြသည်ကို တွေ့ရသည်။

နိုင်ငံတော်အဆင့်သတ်မှတ်ထားသည့် ကယ်ဆယ်ရေးလုပ်ငန်းသို့ ကလေးများရှာမတွေ့မီက ဝန်ကြီးချုပ်တစ်ကြိမ်လာရောက်ခဲ့ပြီး ကလေးမိဘများအား အားပေးနှစ်သိမ့်မှုများ လုပ်ဆောင်ပေးခဲ့ခြင်းဖြစ်သည်။

ဇူလိုင်လ(၈)ရက်နေ့တွင် မယ်ဆိုင်ဂူအတွင်းမှ ကလေး(၄)ယောက်ကို အောင်မြင်စွာ ကယ်ထုတ်လာနိုင်ပြီး ၎င်းတို့အား ချင်းရိုင်းဆေးရုံ အထူးကြပ်မတ်ဆောင်တွင် ကုသမှုပေးနေကာ ကျန်နေသည့် ကလေး(၉)ယောက်ကို နံနက်(၁၁)နာရီက စတင်ကယ်ထုတ်နေကြပြီဖြစ်ကြောင်း သိရသည်။

သတင်း၊ဓါတ်ပုံ #ကိုဇောင်း၊ Tachileik News Agency