~~~~~~~~⊰❂ unicode ❂⊱~~~~~~~~

မယ်ဆိုင်ဂူအတွင်းမှ ကယ်ဆယ်ခဲ့ရသည့် တောဝက်ဘောလုံးအသင်းမှ ကလေး(၁၂)ဦးနှင့် နည်းပြတို့ အနက် ကလေး(၁၀)ဦးနှင့် နည်းပြတို့က ကယ်ဆယ်ရေး အတွင်း သေဆုံးခဲ့ရသည့် ဆာမန်ခူနန် အပါအဝင် ကယ်ဆယ်ရေးတွင် ပါဝင်သူများ အတွက် သင်္ကန်းဝတ်မည့် ၂၀၁၈ ခုနှစ်၊ ဇူလိုင်လ (၂၄)ရက်နေ့၌ တာချီလိတ်မြို့မှ နဂါးနှစ်ကောင်ဆရာတော်ကြွရောက်မည်ဖြစ်ကြောင်း သိရသည်။

ထိုင်းနိုင်ငံ၏ ဗုဒ္ဓဘာသာဝင်များ ဓလေ့ထုံးစံအရ သင်္ကန်းမစည်းမီ တစ်ရက်ကြို၍ ဝတ်ဖြူစင်ကြယ် ဝတ်ဆင်ကာ ဆံချခြင်း ပြုလုပ်မည်ဖြစ်ရာ ဇူလိုင်လ(၂၄)ရက်နေ့ နံနက် (၈)နာရီ (၉)မိနစ်တွင် မယ်ဆိုင်မြို့ လွယေ်ဝါင်းဘုန်းကြီးကျောင်း၌ ဆံချခြင်းကို တာချီလိတ်မြို့မှ နဂါးနှစ်ကောင်ဆရာတော်က ကြွရောက် ဆံချပေးမည်ဖြစ်ကြောင်း သိရသည်။

ယင်းနောက် ဇူလိုင်လ(၂၅)ရက်နေ့ နံနက် (၇)နာရီအချိန်တွင် လွိုင်တုန်းရှိ တောရကျောင်း၌ သင်္ကန်း သွားဝတ်ကြမည်ဖြစ်ပြီး လွယ်ဝေါင်းဘုန်းကြီးကျောင်းတွင် သီတင်းသုံးကြမည်ဖြစ်ကြောင်း သိရသည်။

တောဝက်အသင်းမှ ကလေး(၁၂)ဦးအနက် အစ္စလာမ်နှင့် ခရစ်ယာန်ဘာသာဝင် ကလေး(၂)ဦးမှလွဲ၍ ကျန်(၁၀)ဦးက (၉)ရက်ကြာ သင်္ကန်းဝတ်မည်ဖြစ်ပြီး နည်းပြက တစ်နှစ်ကြာ သင်္ကန်းဝတ်မည်ဖြစ်ကြောင်း သိရသည်။

၎င်းတို့အား ဆေးရုံမှဆင်းခွင့်ပေးလိုက်သည့် ဇူလိုင်လ (၁၉)ရက်နေ့ကလည်း မိသားစု၊ ဆွေမျိုးသားချင်းများနှင့် အတူ လွယ်ဝေါင်းဘုန်းတော်ကြီးကျောင်းတွင် ဆုတောင်းကန်တော့ခြင်းများ လုပ်ဆောင်ခဲ့ကြခြင်းဖြစ်သည်။

တောဝက်ဘောလုံး အသင်းဝင်(၁၃)ဦးကို မယ်ဆိုင်ရှိ ထမ့်လွမ်ဂူတွင်းမှ (၁၈)ရက်ကြာ ကယ်ဆယ်ရေး လုပ်ဆောင်ခဲ့စဉ်က ရေတပ်အထူးအဖွဲ့ဝင်ဟောင်း ဆာမန်ခူနန်မှာ ဂူအတွင်း အောက်ဆီဂျင်ဗူးများ သယ်ပေးစဉ် သေဆုံးသွားခဲ့ရခြင်းဖြစ်သည်။

Tachileik News Agency
AP Photo/Sakchai Lalit