~~~~~~~~⊰❂ unicode ❂⊱~~~~~~~~

မယ်ဆိုင်ဂူတွင်းမှ ကလေးများထွက်လာမည့်အချိန် မှန်းဆမရသေးကြောင်း သတင်းပြန်ကြားရေးက ထုတ်ပြန်ထားသော်လည်း ကလေးနှစ်ယောက် ထွက်လာပြီဟု သတင်းများထွက်နေ
***************
မယ်ဆိုင်ဂူအတွင်းမှ ပထမဆုံးအဖြစ် ကလေးနှစ်ဦးထွက်လာပြီဖြစ်ကြောင်း ရိုက်တာသတင်းဌာန ကအရာရှိတစ်ဦးထံမှလည်းကောင်း၊ ITVနှင့် ဘန်ကောက်ပို့စ်တို့က ရဲအရာရှိတစ်ဦးထံမှလည်းကောင်း အသီးသီး သတင်းရရှိထားသည်ဟုဆိုသော်လည်း သတင်းပြန်ကြားရေးက ထုတ်ပြန်ခြင်းမရှိသေးဘဲ အခြားသတင်းမီဒီယာများအနေဖြင့် အတည်ပြုနိုင်ခြင်းမရှိသေးကြောင်း သိရသည်။

ပထမဆုံးအဖွဲ့တွင် ပါဝင်မည့်သူများကို ဆရာဝန်များက စစ်ဆေးအတည်ပြုပေးခြင်းဖြစ်ပြီး ဂူအတွင်းပိုင်းလမ်းကြောင်းမှာ ခက်ခဲရှုပ်ထွေးလှသဖြင့် ထွက်လာနိုင်မည့်အချိန်ကို ခန့်မှန်းရခက်ခဲသည်ဟု ဆိုသည်။

ထိုင်းရေတပ်အထူးအဖွဲ့နှင့် နိုင်ငံတကာမှကျွမ်းကျင်ကယ်ဆယ်ရေးသမား(၁၃)ဦးတို့သည် ဇူလိုင်လ(၈)ရက်နေ့ နံနက် (၁၀)နာရီမှစ၍ ကယ်ဆယ်ရေးကိုစတင်နေခြင်းဖြစ်ပြီး ယင်းတို့အနက် (၁၀)ဦးက ကလေးများရှိရာ ဂူအတွင်းအခန်းအမှတ်(၉)နှင့် ဂူလမ်းကြောင်းဆုံရာ ဂူအမှတ်(၆)သို့ စီစဉ်ထားသည့်အတိုင်း သွားရောက်ခဲ့ကြကြောင်း သတင်းထုတ်ပြန်ထားသည်။

အခြားရေငုပ်သမား (၃)ဦးကလည်း ရေငုပ်အဖွဲ့အားကူညီရန် နေ့လယ်(၂)နာရီတွင် ထပ်မံဝင်ရောက်သွားကြောင်း သိရသည်။

လက်ရှိဂူအတွင်းကယ်ဆယ်ရေးတွင် ထိုင်း၊ အမေရိကန်၊ သြစတေးလျ၊ တရုတ်နျင့် ဥရောပမှ ဂူအတွင်းကယ်ဆယ်ရေးကျွမ်းကျင်သည့် ရေငုပ်သမားများက ဂူအတွင်း အခန်းအမှတ်(၃)နှင့် ဝင်ပေါက်လမ်းကြောင်းများတွင် ရှိနေကြောင်း သိရသည်။

ဂူအမှတ်(၂)နှင့် (၃)ကြားရှိ သွားရခက်သည့်နေရာများ၌ ကြိုးအကူအညီသွားနိုင်ရန် စီစဉ်ထားခြင်းဖြစ်ကြောင်း သိရသည်။

လူမှုကွန်ယက်စာမျက်နှာတွင် รวมพล คนรักทหารเรือ (I Love Navy) က ထိုင်းစံတော်ချိန် ညနေ (၅)နာရီ (၃၇)မိနစ်တွင် ကလေးနှစ်ယောက်အပြင်ကို ရောက်လာပြီဟု ရေးသားထားသော်လည်း ယင်းနှင့်ပတ်သက်၍ အတည်ပြုထုတ်ပြန်ခြင်းများ မရှိသေးကြောင်း တွေ့ရသည်။

ဂူအတွင်းမှ ပထမဆုံးထွက်လာနိုင်မည့်အဖွဲ့မှာ ည(၉)နာရီတွင် ရောက်ရှိလာနိုင်ကြောင်း တာဝန်ရှိသူများက ခန့်မှန်းပြောဆိုထားခြင်းဖြစ်သည်။

အဆိုပါကယ်ဆယ်ရေးလုပ်ငန်းခွင်အနီးတွင် နိုင်ငံတကာမီဒီယာသမားပေါင်း (၁၀၀၀)ဝန်းကျင်ရှိနေပြီး ချင်းရိုင်းဆေးရုံအနီးတွင်လည်း မီဒီယာသမားများ စောင့်ဆိုင်းသတင်းရယူနေကြခြင်းဖြစ်သည်။