~~~~~~~~⊰❂ unicode ❂⊱~~~~~~~~

မယ်ဆိုင်ဂူတွင်းမှ နောက်ဆုံးခေါ်ထုတ်လာမည့်အဖွဲ့တွင် နည်းပြပါဝင်လာမည်
�Update: 3: 52 PM(MMTime)၊ 10/7/2018�
:::::::::::::::::::::::::::::::::::::::::::
မယ်ဆိုင်ဂူအတွင်းမှ ဇူလိုင်လ(၁၀)ရက်နေ့၌ နောက်ဆုံး ခေါ်ထုတ်လာမည့် (၅)ဦးအဖွဲ့တွင် နည်းပြ ပါလာမည်ဖြစ်သည်။

“အားလုံးအဆင်ပြေတယ်ဆိုရင်တော့ ကလေး(၄)ယောက်နဲ့ နည်းပြရယ်၊ သူတို့နဲ့အတူနေပေးနေတဲ့ ဆရာဝန်တစ်ယောက်၊ ရေတပ်အထူးအဖွဲ့တွေ အတူတူပြန်ထွက်လာကြတော့မှာပါ”ဟု ကယ်ဆယ်ရေးကို ကြီးကြပ်နေသည့် ချင်းရိုင်းခရိုင်အုပ်ချုပ်ရေးမှူးဟောင်း နာရွန်ဆတ်အိုစထာနာကွန်းကလည်း ဇူလိုင်လ(၁၀)ရက်နေ့ သတင်းစာရှင်းလင်းပွဲတွင် ပြောကြားထားသည်။

မယ်ဆိုင်ဂူအတွင်းမှ လက်ရှိခေါ်ထုတ်ထားပြီးသည့် (၈)ယောက်မှာ အသက်(၁၄)နှစ်မှ (၁၆)နှစ်အရွယ်များဖြစ်ကြောင်း ချင်းရိုင်းဆေးရုံတွင် ဇူလိုင်လ(၁၀)ရက်နေ့ နံနက်ကပြုလုပ်သည့် သတင်းစာရှင်းလင်းပွဲတွင် ကျန်းမာရေးဝန်ကြီးက ထုတ်ဖေါ်ပြောကြားထားခြင်းဖြစ်သည်။

ဂူအတွင်းမှ ကလေးများအား ခေါ်ထုတ်ရာတွင် ကလေးများနှင့်အတူရှိနေသည့် ဆရာဝန်က စစ်ဆေးပြီး ကျန်းမာရေးအကောင်းဆုံးအဖွဲ့ဖြင့် ကယ်ဆယ်ရေးကို စတင်ခြင်းဖြစ်ကြောင်း သိရသည်။

ကျန်နေသည့်(၅)ဦးအား ကယ်ဆယ်ရေးကို ထိုင်းစံတော်ချိန် နံနက်(၁၀)နာရီကတည်းကစတင်နေခြင်းဖြစ်ပြီး ယမန်နေ့များထက် ပို၍မြန်မြန် ဆောင်ရွက်နိုင်မည်ဟု ခန့်မှန်းထားကြသည်။

သတင်း -Tachileik News Agency
ဓါတ်ပုံ #PR Chaingrai